Morgunblaðið - 22.04.2004, Page 1

STOFNAÐ 1913 109. TBL. 92. ÁRG. FIMMTUDAGUR 22. APRÍL 2004 PRENTSMIÐJA ÁRVAKURS HF. mbl.is
Latibær á
Sólheimum
Fatlaðir og ófatlaðir á öllum aldri setja
upp barnaleikritið vinsæla Listir
Viðskipti | Skin og skúrir í útrásinni
Einkaframkvæmd

Hlutabréf og fjölmiðlafár Úr verinu | Sóknardagakerfið
í deiglunni
Gagnabanki fyrir þorskeldi
KOFI Annan, framkvæmdastjóri Samein-
uðu þjóðanna (SÞ), hét því í gær að graf-
ist yrði fyrir um hvað væri hæft í ásök-
unum um spillingu og mútuþægni
starfsmanna SÞ í tengslum við áætlun
samtakanna um sölu Íraka á olíu í skipt-
um fyrir mat í valdatíð Saddams Huss-
eins. Sagði Annan að ný nefnd yrði skipuð
til að rannsaka málið ítarlega.
Öryggisráðið samþykkti í gær sam-
hljóða ályktun þar sem skorað er á allar
aðildarþjóðir samtakanna að vinna með
nefndinni, en formaður hennar er Paul
Volcker, fyrrverandi yfirmaður banda-
ríska seðlabankans.
Ásakanirnar um mútuþægni starfs-
manna SÞ komu fyrst fram í janúar þegar
íraskt dagblað birti lista yfir mörg hundr-
uð manns frá yfir 40 löndum og sagði að
fólkinu hefði verið gefið að sök að hafa
þegið greiðslur frá stjórn Saddams.
Fréttamenn bandarísku sjónvarpsstöðv-
arinnar ABC kváðust á þriðjudaginn hafa
séð skjal frá íraska olíuráðuneytinu sem
benti til, að yfirmaður olíu- og matvæla-
skiptaáætlunar SÞ, Benon Sevan, hefði
verið einn af að minnsta kosti þrem emb-
ættismönnum hjá SÞ sem þegið hefðu
greiðslur frá stjórn Saddams. Sevan, sem
á að fara á eftirlaun í næsta mánuði, hefur
neitað ásökununum.
Matvæla- og olíuáætluninni var hleypt
af stokkunum í desember 1996, og sam-
kvæmt henni máttu írösk yfirvöld – sem
þá sættu alþjóðlegum viðskiptaþvingun-
um – selja olíu og nota tekjurnar til að
kaupa matvæli og aðra aðstoð sem íraska
þjóðin þurfti.
Kofi Ann-
an heitir
ítarlegri
rannsókn
Starfsmenn SÞ sagðir
hafa þegið mútur frá
Saddam Hussein
Sameinuðu þjóðunum. AFP.
BJÖRK Guðmundsdóttir er
nú í Lundúnum að leggja loka-
hönd á vænt-
anlega breið-
skífu, The
Lake Exper-
ience, sem
gefa á út á
þessu ári.
Upptökum
lauk hér á
landi fyrir viku. Á plötunni
heyrast engin hljóðfæri, allir
taktar og undirspil er búið til
með röddum Bjarkar og sam-
starfsmanna hennar. Þeirra á
meðal eru japanski raddlista-
maðurinn Dokaka, Mike Patt-
on söngvari Fantomas, kanad-
íska inúítasöngkonan Tagaq,
sem söng með Björk á tónleik-
um hér á landi, Mark Bell, sem
hefur oft unnið með Björk,
Rahzel úr The Roots og ís-
lenskur kór sem settur var
saman til að syngja á plötunni.
Björk og
raddirnar
einar
HÁSKÓLARNIR hér á landi, sem
alls eru tíu talsins, finna fyrir gríð-
arlegri aðsókn fyrir næsta haust.
Þó að endanlegar tölur liggi ekki
fyrir fyrr en í sumar, þegar um-
sóknarfrestur um skólavist rennur
víðast hvar út, stefnir í talsverða
fjölgun frá þeim nærri 16 þúsund
nemendum sem skráðir voru til
náms í skólunum tíu í vetur. Tals-
menn skólanna, sem Morgunblaðið
ræddi við í gær, skýra aukna að-
sókn einkum með auknum mennt-
unarkröfum atvinnulífsins og því
að atvinnuástand sé lakara en
reiknað hafi verið með á tímum
stórframkvæmda. Dæmi eru um að
allt að fimm nemendur séu um
hvert laust pláss og þurfa háskól-
arnir að vísa frá hundruðum, jafn-
vel þúsundum umsækjenda þegar
allt er talið.
Margir skólar, jafnt smáir sem
stórir, eru að auka námsframboð
sitt en það eru einkum smærri há-
skólarnir sem keppast við að fá
fleiri nemendur.
Líkt og fram kom í blaðinu í gær
ætlar Háskólinn á Akureyri að
grípa til fjöldatakmarkana í öllum
sínum deildum næsta haust og þá
hefur Háskóli Íslands þrengt inn-
tökuskilyrðin þannig að eingöngu
er tekið við nemendum með stúd-
entspróf af bóknámssviði.
Til dæmis um aukna aðsókn hef-
ur Kennaraháskóli Íslands aldrei
fengið fleiri umsóknir um fram-
halds- og kennsluréttindanám.
Umsóknarfrestur rann nýlega út
og alls bárust 328 umsóknir um
framhaldsnám, samanborið við 260
umsóknir fyrir ári, og 306 umsókn-
ir bárust um kennsluréttindanám í
fjarnámi. Þar verða aðeins 100
nemendur teknir inn. Aðeins í
Kennaraháskólanum var nærri eitt
þúsund umsóknum vísað frá í
fyrra. Um 2.300 manns voru skráð-
ir í skólann í vetur og gæti þeim
fjölgað um allt að 200 næsta skóla-
ár.
Nám með starfi
sífellt vinsælla
„Það er að verða æ vinsælla að
taka nám meðfram starfi. Til við-
bótar hefur ekki ræst það sem
menn höfðu spáð, að atvinnuástand
myndi stórbatna með framkvæmd-
unum á Austurlandi. Við höfðum
búið okkur undir að það myndi
herða að hjá okkur en það hefur
ekki gengið eftir,“ segir Ingvar
Sigurgeirsson, deildarforseti og
prófessor í kennslufræði við KHÍ,
um skýringar á aukinni aðsókn í
háskólanám.
Magnús Árni Magnússon, að-
stoðarrektor Viðskiptaháskólans í
Bifröst, segir að menntunarkröfur
atvinnulífsins séu stöðugt að
aukast og ef fólk ætli að eiga mögu-
leika á vinnumarkaði þurfi það að
mennta sig meira. Á Bifröst hafa
verið um 350 nemendur í vetur en
að sögn Magnúsar Árna stefnir í að
þeir verði um 400 á næsta skólaári.
Fleiri sækja í háskólanám og stefnir í að margir fái ekki skólavist
Minni atvinna og aukn-
ar kröfur auka aðsókn
 Háskólarnir/10
KÖTTUR sem flaug með farþegaþotu
um Bandaríkin þver og endilöng inni-
lokaður í farang-
ursrýminu kom
heim í gær til eig-
enda sinna í
Þýskalandi. Þessi
sannkallaði Þotu-
Brandur slapp út
úr búrinu sínu
þegar eigendurnir,
Günther og Ingrid
Kölbl, voru á leið
frá Phoenix í Arizona til Fíladelfiu með
hundinn sinn og kettina þrjá.
Brandur fannst ekki í farangursrým-
inu og Kölbl-hjónin urðu að halda
áfram heim til München án hans. Átján
dögum síðar fundu flugvirkjar í Man-
chester í New Hampshire köttinn, öllu
grennri og harla þreytulegan. „Það er
áreiðanlega engin mús eftir í flugvél-
inni,“ sagði Ingrid Kölbl er hún tók á
móti Þotu-Brandi á flugvellinum í
München.
Þotu-Brandur
München. AFP.
HLÝNANDI veður og hækkandi
sól fylgir sumrinu og því fagna
margir sumardeginum fyrsta í
dag. Veðrið var landsmönnum
hagstætt í gær og mældist hæsti
hitinn 15 gráður á Kjalarnesi og
Hvanneyri. Í dag er spáð hlýju
sunnan og vestan til björtu víðast
hvar en þó skúrum suðaustan-
lands. Hlýtt verður áfram í veðri
næstu daga, einkum nyrðra. Það
er ekki laust við að aukinn leikur
færist í börnin á skólalóðunum
þegar þau komast út í sólina eins
og myndin ber með sér. Sam-
kvæmt hefð er dagurinn oft nýtt-
ur af fjölskyldum til leikja og
samverustunda.
Morgunblaðið/RAX
Gleðilegt
sumar
MOAMMAR Gaddafi Líbýuforseti hyggst leggja
leið sína til Evrópu í næstu viku og ræða við hátt-
setta menn í Brussel. Er þetta haft til marks um
aukinn vilja hans til að bæta samskipti Líbýu við
Vesturlönd, en Gaddafi hefur þegar heitið því að
Líbýumenn muni láta af tilraunum til að verða sér
úti um geryðingarvopn.
Gaddafi mun á þriðjudag snæða hádegisverð
með Romano Prodi, forseta framkvæmdastjórnar
Evrópusambandsins, og kvöldverð með Guy Ver-
hofstadt, forsætisráðherra Belgíu. Dagskrá miðvikudagsins er
óráðin. Þetta er í fyrsta sinn sem Gaddafi fer í opinbera heimsókn út
fyrir Afríku og Miðausturlönd síðan 1989.
Gaddafi
Brussel. AFP.
Gaddafi til Evrópu
Viðskipti og Úr verinu í dag