Morgunblaðið - 26.11.2005, Blaðsíða 6

6 LAUGARDAGUR 26. NÓVEMBER 2005 MORGUNBLAÐIÐ
FRÉTTIR
FALLEGT SVÍNARÍ!
- amazon.de
Svínsleg saga um ást
handa þeim yngstu og elstu.
Og öllum hinum líka ...
Tvær bækur í einni!
Fyndin, ljúf og hlý!
ÉG tek hiklaust og djarflega þátt í
þjóðmálaumræðum á Íslandi, ég segi
minn hug og geng að því vísu að ég búi
hér við réttaröryggi, að ég megi segja
hug minn. Ég hlýt að vera bundinn af
velsæmi og meiðyrðalöggjöf á Íslandi
þegar ég læt orð falla,“ sagði Hannes
Hólmsteinn Gissurarson á blaða-
mannafundi í gær þar sem hann
kynnti greinargerð sem lögð hefur
verið fram í héraðsdómi vegna kröfu
Hannesar um endurupptöku meið-
yrðamáls Jóns Ólafssonar á hendur
honum. Málið var dæmt í Bretlandi í
haust og var Hannes dæmdur til að
greiða Jóni 12 milljónir króna í skaða-
bætur. Lögmaður Jóns Ólafssonar
hefur nú tveggja vikna frest til að
skila greinargerð sinni í málinu.
Á fundinum í gær sagðist Hannes
reyna að vera löghlýðinn borgari en
hins vegar væri vegið að sér úr laun-
sátri mörgum árum seinna í öðru
landi þar sem væru allt aðrar leikregl-
ur en á Íslandi. „Ég get sagt hér og nú
að ég hef enga löngun til að spilla fyrir
Jóni Ólafssyni í hans fjárfestingum
eða umsvifum erlendis,“ sagði hann.
„Ég segi bara: Verði honum að góðu.
Það sem ég gerði eingöngu var að lýsa
efasemdum mínum á Íslandi um það
að maður sem væri jafnumdeildur og
bæri jafnmikinn skugga og Jón, svo
ég vitni í það sem segir í öllum þessum
blöðum [Morgunpóstinum, Helgar-
póstinum og fleiri blöðum], væri jafn
áhrifamikill og hann var á Íslandi á
sínum tíma.“
Á að svipta menn aleigunni?
Hannes spurði í þessu tilliti hvort
svipta ætti íslenska ríkisborgara
aleigunni fyrir að taka á skorinorðan
hátt þátt í íslenskri þjóðmálaumræðu
á íslenskum forsendum haldandi að
þeir væru að hlýða íslenskum lögum.
Hannes rakti tildrög málsins eins
og segir í greinargerð hans, til ársins
1999 þegar hann í ræðu á blaða-
mannaþingi í Reykholti lýsti áhyggj-
um af því að hér ættu umdeildir menn
með óþægilega fortíð stóra fjölmiðla.
Umræddur maður var Jón Ólafsson
sem Hannes lýsti á fundinum í gær
sem einum voldugasta og áhrifamesta
manni landsins. „Það liggur fyrir að
hann hafði þá jafnvel verið að reyna
að hafa áhrif á stjórnarmyndanir og
átti stærsta fjölmiðlafyrirtækið. Auð-
vitað grunaði mig þá ekki að hann
myndi nokkrum árum síðar flytjast til
Bretlands og höfða meiðyrðamál gegn
mér í Bretlandi. Ég hagaði orðum
mínum þannig að ég væri ekki að
brjóta íslensk lög á sama hátt og væri
ég í Bretlandi myndi ég reyna að haga
orðum mínum þannig að ég væri að
brjóta bresk lög. Það kom mér því
fullkomlega á óvart, og ég held að það
sé hægt að jafna því við lögsókn úr
launsátri, þegar ég var árið 2004 dreg-
inn fyrir dóm í Bretlandi fyrir orð sem
ég hafði látið falla á Íslandi um ís-
lenskar aðstæður árið 1999.“
Úrdráttur úr ræðu Hannesar birt-
ist á vefsíðu hans hjá Háskóla Íslands
og sagðist hann hafa beðið vefstjóra
HÍ að taka niður síðuna þegar bresk
lögmannsstofa bað hann í júní 2004
um að taka ummælin af heimasíðunni.
Sagðist hann engan áhuga hafa haft á
að troða illsakir við Jón Ólafsson. „Ég
ákvað hins vegar að biðjast ekki af-
sökunar á þessum ummælum vegna
þess að ég taldi að þau væru sönn og
eðlileg í því samhengi sem þau voru
sett fram í. Ég óskaði eftir því við há-
skólann 3. júlí 2004 að heimasíðan yrði
tekin niður og ætlaði síðan að kanna
málið í betra tómi. Fyrir einhverja
handvömm vefstjóra háskólans var
heimasíðan ekki tekin niður þannig að
lögmenn Jóns stefndu mér í septem-
ber 2004 og þá lokaði ég umsvifalaust
heimasíðunni.“
Eitt af því sem Hannes leggur
áherslu á í greinargerð sinni til hér-
aðsdóms er blátt bann við því að um-
mælin verði þýdd yfir á ensku og þeim
dreift á svæðum sem lögsaga breskra
dómstóla nær til enda bannar breski
dómurinn að ummælin verði höfð eft-
ir.
Snýst um hvort íslensk lög
gildi hér eða lög annarra þjóða
Hannes sagði málið nú snúast um
það hvort íslensk lög eigi að gilda á Ís-
landi eða lög annarra þjóða. „Það
snýst líka um það hvort lög séu aft-
urvirk,“ sagði Hannes. „Það virðist
vera mikil réttaróvissa um Netið.
Bandarískir dómstólar eru hættir að
fullnusta meiðyrðadóma frá Bretlandi
því þeir segja að meiðyrðalöggjöfin í
Bretlandi stríði gegn stjórnarskrár-
ákvæðinu um mál- og hugsunarfrelsi
sem er ríkulega verndað í Bandaríkj-
unum. Í rauninni má segja að þetta
mál hér verði um það hvort tjáning-
arfrelsið njóti ekki jafnríkrar verndar
og í Bandaríkjunum.“
Í greinargerð Hannesar segir að al-
gerlega sé ljóst að hann yrði aldrei
dæmdur fyrir meiðyrði á Íslandi
vegna ummæla sinna um Jón, „vegna
þess að þau eru annars vegar gild-
ismat sem ég er frjáls að því að hafa,
og hins vegar óvéfengjanlegar stað-
reyndir.“
Aðspurður sagðist Hannes hafa
selt húseign sína til að eiga fyrir mála-
rekstrinum og vonaðist hann til að
geta keypt hana aftur síðar ef hún
stæði honum til boða og hann ætti fyr-
ir henni. Aðspurður hvort vefstjóri HÍ
hefði lofað að heimasíða hans yrði tek-
in niður að hans beiðni, sagðist hann
hafa sent vefstjóranum tölvupóst áður
en hann fór til Bandaríkjanna. Hann
hefði ekki athugað málið aftur fyrr en
um haustið og hefði það komið flatt
upp á hann þegar það var ekki gert.
Aðspurður hvort hann ætti þá end-
urkröfu á HÍ sagði Hannes að það
gæti vel komið til greina. „Mér finnst
það mjög miður að þetta skuli hafa
farið svona. Ég held alls ekki að það
hafi verið viljaverk,“ sagði hann. Að-
spurður um hvort hann hefði sjálfur
sett inn efnið á heimasíðu sína sagði
hann aðstoðarmann sinn á þeim tíma
hafa sett upp síðuna en að hann hefði
sjálfur tekið hana niður þegar málið
var komið af stað ytra.
Hannes birti ummæli sín um Jón á
ensku á vefsíðu sinni en það er helsta
ástæða þess að Jón ákvað að höfða
meiðyrðamál gegn honum. „Enska er
alþjóðlegt mál,“ sagði Hannes. „Og
þess vegna væri hægt að höfða mál
gegn manni sem birtir ummæli á
ensku í Zimbabwe þar sem hún er
einnig töluð þar,“ sagði hann og benti
á, að mál sitt gæti orðið prófmál hvað
varðar birtingu ummæla á alþjóðlegu
máli á Netinu.
„Geng að því vísu að
ég búi í réttarríki“
Morgunblaðið/RAX
Ég hlýt að vera bundinn af velsæmi og meiðyrðalöggjöf á Íslandi þegar ég
læt orð falla,“ segir Hannes Hólmsteinn Gissurarson.
Eftir Örlyg Stein Sigurjónsson
orsi@mbl.is
 Aðilaskýrsla | 18
RÚMLEGA 750 umsóknir bárust
vegna byggingarréttar á lóðum við
Kópavogstún í Kópavogi en af-
greiðslu þeirra var frestað á fundi
bæjarstjórnar Kópavogs í fyrradag.
Birgir H. Sigurðsson, skipulags-
stjóri Kópavogs, segir hafa verið
viðbúið að svo margir sæktu um.
„Það er mjög mikil ásókn í þetta,
enda er þetta frábær staður niðri
við sjóinn,“ segir Birgir. Þetta snýr
í suður og er frábært bygging-
arland í góðum tengslum við þjón-
ustu. Svona svæði eru vandfundin.“
Alls er um að ræða 13 einbýlis-
húsalóðir, 10 parhúsalóðir, þar sem
verða 20 íbúðir, 83 íbúðir í fjölbýli
og 57 þjónustuíbúðir. Samtals er
því hér um að ræða 173 íbúðir.
Flosi Eiríksson, fulltrúi Samfylk-
ingar í bæjarstjórn Kópavogs, sagði
sig frá umfjöllun og afgreiðslu á
umsóknunum þar sem hann og fjöl-
skylda hans eru meðal umsækj-
enda.
Yfir 750 sóttu
um 173 íbúðir
HÉRAÐSDÓMUR Reykjaness hefur
dæmt karlmann á fertugsaldri í
tveggja mánaða skilorðsbundið
fangelsi fyrir að bera eld að lyftara
sem stóð við Smáratorg í Kópavogi,
með þeim afleiðingum að ökumanns-
sæti og klæðning brann. Maðurinn
starfaði sem öryggisvörður hjá ör-
yggisþjónustu og var í eftirlitsferð.
Öryggisvörðurinn tilkynnti sjálf-
ur um brunann nótt eina í desember
á síðasta ári en þegar lögregla kom
á staðinn hafði maðurinn slökkt eld-
inn með handslökkvitæki. Grunur
féll síðan á hann þegar upptökur úr
eftirlitsmyndavélakerfi voru skoð-
aðar. Maðurinn neitaði alfarið sök
en dómarinn segir í niðurstöðum
sínum, að hafið sé yfir skyn-
samlegan vafa að hann hafi kveikt í
lyftaranum. Er manninum virt það
til refsiþyngingar, að hann var að
gegna mikilsverðu trúnaðarstarfi
við öryggiseftirlit þegar hann
framdi brot sitt. Á hinn bóginn var
litið til þess að tjón af brotinu varð
lítið. Dómari var Finnbogi Alexand-
ersson héraðsdómari, verjandi Jón
Höskuldsson hdl. og sækjandi Karl
Ingi Vilbergsson, fulltrúi lög-
reglustjórans í Kópavogi.
Dæmdur fyrir að
kveikja í lyftara
Í DAG verður Laugavegurinn í
Reykjavík formlega opnaður á ný
eftir framkvæmdir milli Snorra-
brautar og Barónsstígs og nýtt
bílahús tekið í notkun. Athöfnin
fer fram við nýja bílahúsið á
Laugavegi 86–94 og hefst hún kl.
12. Alfreð Þorsteinsson, forseti
borgarstjórnar Reykjavíkur, mun
formlega taka hið nýja bílahús í
notkun.
Hið nýja bílahús rúmar 193 bíla
í kjallara hússins og verða stæðin
gjaldfrjáls fyrst um sinn. Fram-
kvæmdir við efri hæðir bygging-
arinnar, sem eru í eigu Ístaks hf.,
munu standa fram á mitt ár 2006.
Þar verður um 950 fermetra versl-
unarrými á götuhæð og 31 íbúð á
2.–4. hæð.
Ýmis skemmtiatriði
Boðið verður upp á kaffiveiting-
ar við harmónikkuundirleik í bíla-
húsinu að athöfn lokinni og þá
verður skemmtidagskrá á vegum
verslunareigenda á Laugavegi.
Jólasveinar verða á ferð og flugi,
sýnt verður atriði úr nýju barna-
leikriti Þjóðleikhússins Leitin að
jólunum, Guðjón Friðriksson sagn-
fræðingur mun segja frá gamla
Laugaveginum, Davíð Ólafsson og
Valgerður Gunnarsdóttir syngja
revíulög og leikhópur frá Hinu
húsinu mun koma fram.
Á laugardag verður einnig árleg
hundaganga niður Laugaveginn og
er hún áætluð kl. 13. Að lokinni
hundagöngu verður Laugavegur-
inn allur opinn fyrir bílaumferð og
þá verður bílahúsið opið fyrir al-
menna notendur.
Efnt verður til samkeppni um
nafn á bílahúsið. Tillögum um nafn
má skila til og með 23. desember
2005. Bílastæðasjóður leggur til-
lögurnar fyrir Framkvæmdaráð á
fyrsta fundi ráðsins í janúar 2006
þar sem niðurstaða samkeppninn-
ar ræðst. Ef fleiri en einn hafa
lagt fram sömu tillögu og valin
verður, verður dregið um nafn
vinningshafa.
Nýtt hús fyrir um 200
bíla tekið í notkun
Morgunblaðið/Þorkell
Eiríkur Ásmundsson og Grétar Einarsson kepptust í gær við að leggja síð-
ustu hönd á merkingar í nýja bílastæðahúsinu sem opnað verður í dag.