Fréttablaðið - 26.04.2003, Blaðsíða 29

Kristín Magnúsdóttir er 46 áragömul og býr við Víðihlíð
ásamt tveimur öðrum konum,
þeim Auði Einarsdóttur og Maríu
Sveinbjörnsdóttur. Allar hafa þær
sér íbúð en stofa og eldhús á neðri
hæð eru sameiginleg. Kristín
kemur brosandi til dyra og býður
blaðamanni inn. Eftir að hafa
gengið um neðri hæðina þar sem
allt er í röð og reglu býður hún inn
til sín. „Þetta er mín íbúð og hérna
tek ég á móti gestum,“ segir hún.
Íbúðin er lítil en mjög notaleg.
Komið er inn í lítinn gang og ann-
ars vegar er svefnherbergi og
hins vegar notaleg stofa sem
Kristín hefur búið eigin húsgögn-
um. „Ég er alin upp í Mosfellsbæ
hjá foreldrum mínum og var
heima þar til ég var þrítug. Mér
þótti mjög gott að flytja burtu og
enn betra var þegar ég fékk litla
íbúð fyrir sjálfa mig fyrir tæpum
þremur árum,“ segir hún. Hún
sýnir stolt myndir á veggjum og
fallega muni sem hún hefur keypt
í ferðalögum á sumrin. „Ég er að
safna englum,“ segir hún og það
klingir í tveimur óróum í stofunni.
Í vinnu á gistiheimili
Kristín starfaði á vinnustof-
unni Ási í tuttugu ár og segist
hafa verið orðin leið á vinnunni
þar þegar hún fór að leita sér að
nýrri vinnu. Hún var svo lánsöm
að fá vinnu á gistiheimili hjá Guð-
mundi Jónassyni í Borgartúni við
þrif og tiltekt á skrifstofunni. Það
var stór dagur í lífi hennar þegar
hún kvaddi Ás með viðurkenning-
arplagg í ramma og mætti í fyrsta
sinn í nýja vinnu. „Hjá Guðmundi
Jónassyni er ég eins og aðrir
starfsmenn og vinn fyrir launum
á sama hátt og þeir. Mér líkar það
vel og er ekki ánægð þegar ég er
litin öðrum augum en venjulegt
fólk,“ segir Kristín. Hún fer út að
skemmta sér með samstarfs-
mönnunum og í ferðir þegar
þannig háttar til. Í vinnunni er
hver dagur skemmtilegur og bíð-
ur hún með eftirvæntingu eftir að
mæta til vinnu á morgnana. Hún
er í vinnu til klukkan tvö á daginn
og tekur strætó til og frá vinnu.
„Ég fer eiginlega allt sem mig
langar í strætó. Skemmtilegast er
að fara á kaffihús og Kringluna og
stundum fer ég í Smáralind,“ seg-
ir Kristín. Hún fær reglulega svo-
kallaða liðveislu sem er fólgin í að
stúlka kemur til hennar og þær
gera það sem Kristínu langar að
gera hverju sinni. „Við förum oft í
gönguferðir, stundum í bíó eða
leikhús. „Við gerum bara það sem
okkur dettur í hug,“ segir hún og
strýkur kusk á buxunum sínum.
Langar að læra margt
Kristín hefur mjög gaman af
því að elda mat og það dæmist oft-
ar á hana en hinar þess vegna.
Henni þykir það ekki leitt og talar
um að hún ætli sér að fara í nám-
skeið í matreiðslu til að læra
meira. Hana langar einnig að læra
ensku og bútasaum. Námskeiðin
sækir hún hjá Fjölmennt og fyrir
þau greiðir hún sjálf. „Mig langar
að búa til teppi fyrir litla frænda
minn sem er nýfæddur og búa til
eitthvað fallegt fyrir börnin í fjöl-
skyldunni,“ segir hún. Fjölskyld-
an samanstendur af móður henn-
ar og uppkomnum systkinum sem
eiga börn og barnabörn. „Ég
heimsæki þau oft og fer í veislur
til þeirra. Þau koma líka stundum
til mín. Þá býð ég þeim upp í íbúð-
ina mína. Oftar er ég samt bara
eitthvað að dunda mér eins og að
horfa á sjónvarpið,“ segir Kristín
og gjóir augum í átt til sjónvarps-
ins sem hún á alveg út af fyrir sig.
Fyrir dyrum stendur hjá Krist-
ínu að fara í heilsuátak og hreyfa
sig meira. Hún bendir á að hægt
sé að fara í skemmtilegar göngu-
ferðir nærri Víðihlíðinni. „Ég þarf
að grenna mig dálítið,“ segir hún
og strýkur magann á sér. Hvort
hún eigi kærasta svarar hún
ákveðið: „Neiii aldeilis ekki...mig
langar sko ekki mikið í kærasta,“
segir hún og klappar sér á læri til
áherslu á þeim orðum. „Ég er ekki
hrifin af strákum og finnst þeir
ekkert skemmtilegir,“ bætir hún
við.
Kristín segist vera afar sátt við
líf sitt. Hún er ánægð með kon-
urnar sem búa í Víðihlíðinni með
henni og allt er í föstum skorðum.
Hún hefur þegar pantað sér ferð
til Benidorm í sumar og fer með
ferðafélögum sem hún veit ekki
enn hverjir verða. Það er í gegn-
um ferðaskrifstofu sem tekur að
sér að skipuleggja ferðir fyrir
fatlaða. „Ég er mjög spennt og
hlakka mikið til að vita herjir
verða ferðafélagar mínir. Ég vona
bara að þeir verði skemmtilegir,“
segir hún og brosandi. ■
LAUGARDAGUR 26. apríl 2003 29
KRISTÍN MAGNÚSDÓTTIR
Hefur mjög gaman af eldamennskunni.
Kristín Magnúsdóttir:
Ekki ánægð þegar hún er litin
öðrum augum en aðrir