Fréttablaðið - 18.10.2007, Qupperneq 80

Margir hlakka til villibráðartímabilsins sem gengur í
garð með lækkandi sól. Stefán Baldvin Guðjónsson
vínþjónn lumar á ýmsum góðum ráðum varðandi vín-
valið með veislumatnum.
„Með gæsakjöti og rjúpu mæli ég með bragðmiklu
rauðvíni sem er líka kryddmikið, og hefur eikar- og
vanillubragð í bakgrunni,“ sagði Stefán. „Bordeaux
eða Cabernet Sauvignon frá Bandaríkjunum eða
Chile virkar vel, og vín eins og Chateau Lascombes
Grand cru frá Margauz er tilvalið með bragðmiklu
fuglakjöti,“ sagði hann. Hann mælir einnig með Car-
men Cabernet Reserve frá Chile fyrir þá sem vilja
ódýrara vín. „Það verða að teljast dúndurgóð kaup,“
sagði Stefán.
Með önd segir Stefán betra að hafa fínlegra vín,
eins og Pinot Noir. „Frá Nýja-Sjálandi kemur Pinot
Noir sem er fínlegt með miklu bragði af jarðarberj-
um, villisveppum og hindberjum og smellpassar,“
sagði hann. „Fyrir þá sem vilja aðeins þyngra og
flóknara vín mæli ég með Faiveley Mercurey,“ bætti
hann við.
Hreindýrakjöt krefst bragðmikils rauðvíns að sögn
Stefáns. „Það er bragðmikið og þungt. Ástralskt Shir-
az með góðu myntu-, sólberja- og eikarbragði passar
vel með. Vín eins og d’Arenberg The Footbolt Shiraz
er gott val,“ sagði Stefán. Fyrir þá sem vilja þurrara
vín með meira krydd- og ávaxtabragði mælir hann
með víni frá Rhone í Frakklandi. „Til dæmis Guigal
Côtes du Rhône,“ sagði Stefán.
Stefán heldur úti heimasíðunni www.smakkarinn.
is, þar sem er að finna mun fleiri góðar ábendingar
um vín.
Vín með villibráðarveislu
Mundu …
… eftir búðingnum þegar þú ferð
að hafa áhyggjur af næsta
eftirrétti. Það þarf ekki heldur að
skammast sín fyrir að grípa í
gamla góða Royal-pakkann, hann
á enn upp á pallborðið hjá
flestum.
Tónleikaröðin Rafmagnslaust í
Rauða húsinu stendur nú sem
hæst í Rauða húsinu á Eyrar-
bakka. „Þetta er annað árið sem
við höldum þessa tónleikaröð,“
sagði Ingi Þór Jónsson, eigandi
veitingastaðarins. „Hugmyndin
var að leyfa fólki að njóta góðs
matar og tónlistar á svolítið
öðrum nótum en almenningi
gefst yfirleitt kostur á. Það ger-
ist með þeirri nálægð sem skap-
ast hérna hjá okkur. Þetta er
mjög persónulegt og notaleg
stund og stemning,“ sagði Ingi.
Jón Ólafsson og Hildur Vala
syngja fyrir gesti næstkomandi
laugardag, og í þeirra fótspor
feta svo tónlistarmenn á borð
við Eyjólf Kristjánsson, Tríó
Leone Tinganelli og Kristjönu
Stefánsdóttur.
„Við bjóðum upp á þriggja
rétta matseðil í sambandi við
þetta, sem er svona í okkar anda.
Það er humarsúpa, lamb og súkk-
ulaðikaka. Það er spilað undir
borðhaldi, en fólk þarf samt ekki
endilega að fá sér að borða,“
útskýrði Ingi Þór.
Nánari upplýsingar má fá á
raudahusid.is eða í síma 483
3330.
Ljúf tónleikaröð
Ágúst Ólafsson, stöðvar-
stjóri RÚV á Akureyri,
bar sigur úr býtum í mat-
reiðslukeppni leikmanna
á sýningunni Matur-inn á
Akureyri um síðustu helgi.
Keppendur í matreiðslukeppni
þjóðþekktra leikmanna fengu í
hendurnar það sem kallað er
„mystery basket“, en þá vita þeir
ekki fyrirfram hvaða hráefni
þeir hafi úr að spila. „Við fengum
bara poka þegar keppnin var sett
af stað, og í honum var sitt lítið af
hverju: nautalund, beikon, kart-
öflur, gulrætur, spergilkál og
fleira, sem við áttum að nota í
veislumáltíð fyrir fjóra,“ útskýrði
Ágúst, sem sagði keppnina hafa
verið hina skemmtilegustu.
„Þetta var ofboðslega gaman og
mikil stemning,“ sagði hann.
Hann deilir hér verðlaunaupp-
skrift sinni með lesendum Frétta-
blaðsins, en segist þó hafa notið
aðstoðar leynilegs stuðnings-
manns. „Leynivopnið mitt í
keppninni er sonur minn, sem er
að læra matreiðslu á Vox á Hilton
Reykjavík Nordica. Ég leyni því
ekki að hann hefur verið minn-
bakhjarl síðustu ár og hann var
búinn að gefa mér ýmis góð ráð,“
sagði Ágúst og hló við.
Ágúst segist þó hafa afskaplega
gaman af að elda sjálfur og þá
helst villibráð og lambakjöt.
„Mér finnst óskaplega gaman að
vera í eldhúsinu heima hjá mér á
tyllidögum og gera góðan mat.
Jólarjúpan er til dæmis algjör-
lega mín deild,“ sagði Ágúst.
Nautasteik: Hreinsið nautalund-
ina, geymið afskurðinn. Steikið
lundina í smjöri á pönnu í um 3
mín. á hverri hlið. Kryddið með
salti og pipar. Eldið í 120 gráðu
heitum ofni í um 20 mín., eða þar
til kjarnhiti er 50 gráður. Þá á
hún að vera „medium rare“.
Kartöflufantasía: Bakið kartöfl-
ur í 160 gráðu heitum ofni í um 40
mín. Skerið í tvennt og skafið
innan úr hýði. Steikið smásaxað
beikon á pönnu þar til stökkt.
Blandið saman kartöflum, beik-
oni, gráðaosti og rjóma. Kryddið
með salti og pipar.
Grænmeti: Strimlið gulrætur,
skerið spergilkál frá stilknum.
Sjóðið í 3 mín. í söltu vatni.
Grófsaxið sveppi og strimlið
papriku. Léttsteikið í smjöri,
kryddið með salti og pipar.
Sósa: Steikið afskurðinn af kjöt-
inu í smjöri á pönnu. Kryddið
með salti og pipar. Léttsteikið
saxaðan lauk, hvítlauk, gulrætur
og sellerí í potti. Hellið í tveimur
glösum af rauðvíni og sjóðið
niður um helming. Leysið einn
tening af nautakrafti upp í hálf-
um lítra af vatni og hellið út á
ásamt afskurði. Sjóðið í 10 mín.
við vægan hita. Sigtið, þykkið
með smjörbollu og dekkið sósuna
með matarlit ef þarf. Skreytið
með rósmaríni.

Ís í eftirrétt fullkomnar allar máltíðir