Fréttablaðið - 23.10.2008, Qupperneq 8

23. október 2008 FIMMTUDAGUR
SAMFÉLAGSMÁL „Það er engu líkara
en þetta hafi verið ritað í gær,“
segir Hjalti Guðröðsson, starfs-
maður verktakafyrirtækisins
Spýtunnar, en hann rakst á 122 ára
gamla blaðagrein milli þilja í gær
þegar hann var að rífa niður
skemmda veggi í húsi í Hnífsdal.
Húsið hafði orðið fyrir bruna-
skemmdum í síðasta mánuði.
Í greininni, sem birtist í Ísafold,
er brýnt fyrir lesendum að missa
ekki móðinn þótt útlitið sé svart.
Þar segir meðal annars: „Ástand
lands vors er nú eins og stendur
sannarlegt hættuástand: veðurátt
ill og hörð, allir aðalatvinnuvegir
ógreiðir, verzlun og stjórn óhag-
stæð. Í slíkum kringumstæðum
gætir mest, að landsmenn missi
ekki móðinn.“
Hjalti segir að þótt váin sem nú
blasi við sé vissulega af öðrum
toga sé boðskapur greinarinnar
eins og úr nýprentuðu fréttablaði.
„Þarna er til dæmis mikið fjallað
um það að hætta sé á því að fólk
kunni að hverfa af landi til að leita
að betri lífsskilyrðum í útlönd-
um,“ segir Hjalti en það ber nokk-
urn keim af fréttum þessa dagana
um að fólk í ákveðnum stéttum sé
farið að huga að atvinnutækifær-
um erlendis eftir að syrta tók í
álinn hér á landi.
Skrifari hvetur fólk til að spara
og gefa sig síður að sögum af hrak-
förum og bágindum sem dragi
móð úr mönnum sem fara þá
kannski á sveitina en slíkt er mikil
vá fyrir þjóðfélagið að sögn grein-
arhöfundar. En einnig virðist hann
nokkuð framsýnn því hann segir:
„Fiskveiðar í sjó og vötnum eru að
voru áliti einn höfuðþáttur í fram-
tíðarvon lands vors; þess vegna
ríður á að veita þeim athygli.“
„Það er algengt að finna blöð
milli þilja og ég hef ósköp gaman
af því að lesa þetta,“ segir Hjalti.
„Þannig að ef seinlega gengur að
rífa þá er líklegasta skýringin sú
að ég hef dottið niður á gamalt og
gott lesefni,“ segir hann og hlær
við. Hann telur þessa grein vera
ágætt innilegg í kreppuumræðuna
sem nú tröllríður þjóðinni. „Það er
ágætt að minnast þess að þjóðin
hefur áður horft fram á svarta
tíma og ekki látið bugast,“ segir
hann.
Á fréttavefnum bb.is segir að
húsið hafi verið byggt árið 1908
svo þetta innlegg hefur beðið
umræðunnar milli þilja í heila öld.
jse@frettabladid.is
Fann 122 ára grein
sem á vel við í dag
Í Hnífsdal fannst 122 ára gömul blaðagrein milli þilja í gær en sá sem hana fann
segir engu líkara en hún hafi verið rituð í gær. Lesendur eru hvattir til að herða
upp hugann og dvelja ekki við sögur af bágindum og hrakförum þó hart sé í ári.
HJALTI MEÐ BLAÐAGREININA Blaðagreinin sem fannst milli þilja virðist ekki svo ólík
þeim sem Hjalti fær inn um lúguna þótt 122 ár skilji þær að.
MYND/SVEINBJÖRN HALLDÓRSSON BB.IS
DÓMSMÁL Ríkissaksóknari hefur
ákært karlmann um þrítugt fyrir
ítrekaðar hótanir um líflát og lim-
lestingar í garð starfsmanna í fang-
elsinu að Litla-Hrauni á afplánun-
artíma hans þar.
Honum er gefið að sök að hafa
hótað deildarstjóra í fangelsinu að
ráðast inn á heimili hans og fjöl-
skyldu hans og valda þar eigna-
spjöllum með því að taka þar til.
Síðar réðst fanginn á deildar-
stjórann og hrækti á hann þannig
að hrákinn lenti á einkennisskyrtu
hans.
Þá hótaði maðurinn fangaverði
að smita hann með eyðni og lifrar-
bólgu C. Hann hótaði þessum sama
fangaverði og starfsbróður hans að
drepa þá. Það væri ekkert mál að
koma byssu inn í fangelsið og þeir
væru fyrstir á lista hjá honum.
Fangelsislæknir varð einnig
fyrir barðinu á manninum sem hót-
aði honum að stinga hann með
sprautu svo hann smitaðist af HIV.
Þannig lét maðurinn hótanir
dynja á starfsmönnum Litla-Hrauns
bæði með orðum og látbragði.
Meðal annars hótaði hann
fangaverði að koma á heimili
hennar, skaða hana með bitlausum
skærum og drepa hana er hann
væri laus úr fangelsi, að því er
segir í ákæru. Þá hrækti hann í
andlit annars fangavarðar. Ákæran
á hendur manninum er í fjórtán
liðum. Hann neitaði sök við
þingfestingu málsins. - jss
LITLA-HRAUN Starfsfólkið sætti sífelld-
um hótunum.
Ríkissaksóknari ákærir karlmann um þrítugt sem hefur afplánað á Litla-Hrauni:
Hótaði lífláti og limlestingum
SVÍÞJÓÐ Ríkisstjórnir Svíþjóðar og Finnlands hafa
kynnt til hvaða aðgerða verður gripið til stuðnings
bönkunum. Aðgerðapakkinn gildir fram á næsta ár
og í sumum tilfellum út árið eins og til dæmis í
Finnlandi.
Sænska ríkisstjórnin hefur kynnt áætlun sem
miðar að því að ná jafnvægi og ró til lengri tíma á
sænskum fjármálamarkaði. Ríkisstjórnin hyggst
leggja fram 1.500 milljarða sænskra króna, eða
jafnvirði tæplega 23.000 milljarða íslenskra króna
til að styðja banka, húsnæðisfélög og íbúðalánasjóði.
Upphæðin er hámarksupphæð, að sögn sænska
blaðsins Dagens Nyheter. Mats Odell, fjármála-
markaðsráðherra Svíþjóðar, segir að þetta séu
aðgerðir til að styðja við fyrirtæki og heimili í
Svíþjóð og meðal annars eigi að koma á fót sérstök-
um stöðugleikasjóði. Aðgerðirnar eru tímabundnar
og gilda til 30. apríl með möguleika á framlengingu
til ársloka 2009.
Finnska ríkisstjórnin hefur tilkynnt aðgerðaáætl-
un upp á 7.500 milljarða íslenskra króna í þriggja
mánaða til fimm ára ábyrgð til bankanna. Þessi
áætlun gildir út næsta ár. Þessu til viðbótar kemur
ýmislegt annað til greina, að sögn finnska ríkisút-
varpsins YLE, eins og til dæmis að ríkið fjárfesti í
bönkunum til að auka stöðugleika.
Í Noregi hefur umræðan síðustu daga snúist um
meint innherjasvik en talið er að starfsmenn norska
bankans DnB NOR hafi fengið upplýsingar um
aðgerðaáætlun norsku ríkisstjórnarinnar og tekist
að selja hluti í bankanum áður en hún var kynnt
fyrir rúmri viku. - ghs
KYNNA AÐGERÐAPAKKA Finnsk og sænsk stjórnvöld hafa
kynnt aðgerðapakka en Norðmenn kynntu sinn fyrir rúmri
viku. Myndin er af öllum forsætisráðherrum á Norðurlöndum.
FRÉTTABLAÐIÐ/NORDEN.ORG
Finnska og sænska ríkisstjórnin með aðgerðir til stuðnings bönkunum:
Áætlunin gildir út næsta ár