Morgunblaðið - 01.11.2006, Side 10

10 MIÐVIKUDAGUR 1. NÓVEMBER 2006 MORGUNBLAÐIÐ
ALÞINGI
TEKJUSKATTUR lögaðila hækk-
aði um 11 milljarða frá árinu 2005 til
2006. Álagningin í ár nemur samtals
73,9 milljörðum króna, en það er
hækkun um 46% frá fyrra ári. Fjöldi
gjaldenda tekjuskatts er nær 15.000
og hefur þeim fjölgað frá fyrra ári
um 11%.
Tekjuskattur lögaðila hefur hækk-
að nær stöðugt frá því skatthlutfall
var lækkað í 18% tekjuárið 2002, að
því er fram kemur í fréttatilkynn-
ingu frá fjármálaráðuneytinu.
Kaupþing banki greiðir
hæstu gjöldin
Fjármagnstekjuskattur lögaðila
nemur 6,2 milljörðum en þar er að
mestu um að ræða greiðslu ríkis-
sjóðs á fjármagnstekjuskatti aðal-
lega vegna sölu Landssímans en
hann nam 5,6 milljörðum króna.
Einu lögaðilarnir sem greiða fjár-
magnstekjuskatt eru þeir sem eru
undanskildir greiðslu tekjuskatts.
Tryggingagjald nemur samtals
32,5 milljörðum króna og hefur
hækkað um 17,7% frá fyrra ári.
Tryggingagjald er innheimt í stað-
greiðslu og er hér því um uppgjör að
ræða. Álagningartölur fyrir trygg-
ingagjald innifela markaðsgjald og
iðgjald slysatryggingar sjómanna.
Kaupþing banki borgaði hæstu op-
inberu gjöldin eða samtals 6.956
milljónir. Þá kemur Fjársýsla ríkis-
ins með 5.780 milljónir og launaaf-
greiðsla Fjársýslunnar með 4.535
milljónir. Í fjórða sæti er Lands-
banki Íslands með 3.648 milljónir og
þá Íslandsbanki (nú Glitnir) með
1.793 milljónir. Reykjavíkurborg
greiðir 1.216 milljónir og Straumur-
Burðarás greiðir 811 milljónir.
Samtals greiða íslensku bankarnir
fjórir um 13,2 milljarða í opinber
gjöld.
Í yfirliti frá Skattstjóranum í
Reykjavík kemur fram að 24 lögaðil-
ar greiða meira en 100 milljónir í op-
inber gjöld. Athygli vekur að Há-
skólasjóður Eimskipafélags Íslands
greiddi 160 milljónir í skatta.
Alcan greiðir hæstu gjöldin á
Reykjanesi eða tæplega milljarð.
Þar á eftir koma Kópavogsbær, P.
Samúelsson, varnarliðið og Hafnar-
fjarðarbær.
Greiddu um 74
milljarða í gjöld
Tekjuskattur lögaðila hækkaði um
11 milljarða milli ára eða um 46%
FRÉTTIR
ÞINGMENN stjórnarandstöðunnar
hafa lagt fram á Alþingi frumvarp
um breytingar á ýmsum ákvæðum
laga um jafna stöðu og jafnan rétt
kvenna og karla. Kolbrún Halldórs-
dóttir, þingmaður Vinstrihreyfing-
arinnar – græns framboðs, mælti
fyrir frumvarpinu á Alþingi í gær.
Í frumvarpinu er m.a. lagt til að í
umrædd lög bætist við eftirfarandi
málsgrein: „Launamanni er hvenær
sem er heimilt að veita þriðja aðila
upplýsingar um laun og önnur
starfskjör sín.“ Í greinargerð segir
að markmiðið með ákvæðinu sé að
koma í veg fyrir svokallaða launa-
leynd. Ákvæðið eigi sér fyrirmynd í
dönskum lögum.
Í greinargerðinni segir að launa-
leynd komi í veg fyrir að starfs-
menn geti borið saman kjör sín. Þar
með verði illmögulegt að komast að
því hvort fyrirtæki mismuni starfs-
mönnum sínum, m.a. á grundvelli
kynferðis.
Launaleynd
verði aflétt
Eftir Örnu Schram
arna@mbl.is
MÆLT var fyrir því á Alþingi í gær
að gerð yrði úttekt á því hvaða breyt-
ingar hafa orðið á rafmagnsverði til
almennra notenda og fyrirtækja í
kjölfar breytinga sem urðu á skipu-
lagi raforkumála í ársbyrjun 2005.
Sigurjón Þórðarson, þingmaður
Frjálslynda flokksins, mælti fyrir
þingsályktunartillögu þessa efnis, en
hann er fyrsti flutningsmaður henn-
ar. Meðflutningsmenn eru, auk þing-
manna Frjálslynda flokksins, þing-
menn úr Samfylkingu og
Vinstrihreyfingunni – grænu fram-
boði. Fram kom í umræðum á Alþingi
í gær að Kristinn H. Gunnarsson,
þingmaður Framsóknarflokks, er
meðmæltur tillögunni. Hann var eini
stjórnarliðinn sem tók þátt í umræð-
unum.
Í tillögugreininni er nánar lagt til
að gerð verði grein fyrir þróun raf-
orkuverðs sundurliðað eftir helstu
notendaflokkum og gjaldskrársvæð-
um. Þá er lagt til að niðurstaða úttekt-
arinnar, sem nái til allra tegunda við-
skipta raforku, liggi fyrir hinn 15.
febrúar nk.
Í greinargerð tillögunnar segir
m.a. að Samtök iðnaðarins hafi bent á
að fjöldi fyrirtækja hafi fengið
tugprósenta hækkun á raforkureikn-
ingum í kjölfar gildistöku nýju raf-
orkulaganna árið 2005. Þó nokkur
dæmi væru um allt að 70% hækkun.
Sigurjón sagði, er hann mælti fyrir
tillögunni í gær, að fjöldi hagsmuna-
aðila hefði ályktað um þetta mál.
„Þetta mál liggur mjög þungt á mörg-
um og ekki síst bændum þessa lands
sem hafa fengið gríðarlega hækkaða
rafmagnsreikninga.“ Sigurjón sagði
óþolandi að stjórnvöld hefðu innleitt
tugprósenta hækkun sem þessa með
raforkulagabreytingunum árið 2005.
Stjórnvöld hefðu sagt að nýju lögin
ættu að leiða til samkeppni og hag-
ræðingar á raforkumarkaði. „En al-
mennir neytendur hafa einungis séð
hækkun [á raforkuverði],“ sagði
hann. Því þyrfti að gera úttekt á þess-
um hækkunum og ástæðum þeirra.
Þingsályktunartillaga þingmanna stjórnarandstöðunnar
Úttekt verði gerð á
þróun raforkuverðs
Morgunblaðið/Eyþór
Upplýsingar Þingmenn stjórnarandstöðunnar vilja fá upplýsingar um
hvaða breytingar hafa orðið á rafmagnsverði til notenda frá 2005.
Í HNOTSKURN
»Alþingi samþykkti ný raf-orkulög haustið 2004. Lögin
tóku gildi í ársbyrjun 2005. Þar
með varð gjörbreyting á skipu-
lagi raforkumála landsins.
»Raforkulögin voru sam-þykkt með atkvæðum þing-
manna ríkisstjórnarflokkanna
og Samfylkingarinnar. Einn
þingmaður Samfylkingarinnar
sat hjá, Helgi Hjörvar, sem og
þingmenn Vinstri grænna og
Frjálslyndra.
Í FRUMVARPI sem
fjármálaráðherra, Árni
M. Mathiesen, hefur
lagt fram á Alþingi eru
m.a. lagðar til nokkrar
breytingar á lögum um
tekjuskatt. Breytingar-
tillögurnar eru m.a. í
samræmi við yfirlýs-
ingu ríkisstjórnarinnar
frá 22. júní sl. Þær eru
þar með hluti af að-
gerðum sem ætlað er
að stuðla að stöðugleika
á vinnumarkaði, að því
er fram kemur í at-
hugasemdum frum-
varpsins.
Í fyrsta lagi er í frumvarpinu lagt
til að frá og með 1. janúar 2007
lækki tekjuskattur einstaklinga um
1% í stað 2%, eins og áður var fyr-
irhugað, þ.e. úr 23,75% í 22,75%.
Í öðru lagi er í frumvarpinu lögð
til breyting á aldursmarki barna-
bóta, þ.e. lagt er til að um næstu
áramót verði teknar upp greiðslur
barnabóta til 18 ára aldurs í stað 16
ára aldurs. Áætlað er að greiðslur
barnabóta muni aukast um 500 til
600 milljónir króna verði frumvarpið
að lögum, að því er segir í athuga-
semdum þess.
Í þriðja lagi er lögð til hækkun á
persónuafslætti, sjómannaafslætti
og vaxtabótum frá 1. janúar 2007.
„Verði frumvarpið að lögum mun
persónuafsláttur einstaklinga
hækka úr 356.180 kr. í 385.800 kr á
ári. Með þessari hækkun, og breyt-
ingu tekjuskattshlutfalls, hækka
skattleysismörk ein-
staklinga úr 79 þúsund
kr. í 90 þúsund kr. á
mánuði eða um 14%.
Áætlað er að lögfest-
ing þessara ákvæða
leiði til þess að tekjur
ríkissjóðs verði 800
millj. kr. hærri en ann-
ars hefði orðið,“ segir í
athugasemdunum.
Endurskoða per-
sónuafslátt árlega
Fjárhæð sjómanna-
afsláttar mun skv.
frumvarpinu hækka
um 6%, þ.e. úr 787 kr.
í 834 kr. á dag og viðmiðunarfjár-
hæðir vaxtabóta munu hækka um
6%. „Er það í samræmi við áætlaðar
launahækkanir á almennum vinnu-
markaði á miðju þessi ári og í byrj-
un næsta árs. Áætlað er að útgjöld
ríkissjóðs vegna hækkunar viðmið-
unarfjárhæða vaxtabóta verði um
350 millj kr.,“ segir í athugasemd-
um.
Fleiri breytingar eru lagðar til í
frumvarpinu. M.a. er lagt til að per-
sónuafsláttur verði endurskoðaður
árlega, í fyrsta sinn frá 1. janúar
2008, og að fjárhæð hans breytist
þannig í samræmi við breytingar á
gildandi vísitölu neysluverðs næst-
liðinna tólf mánaða.
Þá er m.a. lagt til að styrkir sem
foreldrar eða forráðamenn barns fá
frá sveitarfélagi til að annast barn
heima verði undanþegnir skatt-
skyldu.
Tekjuskattur
lækki um 1%
í stað 2%
Lögð er til hækkun á persónuafslætti,
sjómannaafslætti og vaxtabótum
Árni M. Mathiesen
ALLS eru tilgreind 37 tungumál
sem móðurmál nemenda í grunn-
skólum landsins, að því er fram kem-
ur í skýrslu menntamálaráðherra
um framkvæmd skólahalds í grunn-
skólum á árunum 2001 til 2004.
Skýrslunni var dreift á Alþingi í
gær.
Í skýrslunni segir að við talningu
nemenda með erlent móðurmál, sé
miðað við að forráðamenn nemand-
ans, annar eða báðir, hafi annað
tungumál að móðurmáli en íslensku
og noti það mál að staðaldri í dag-
legum samskiptum sínum við barnið.
Í skýrslunni er vitnað í tölur frá
árunum 2001 til 2003 og greint frá
því að nemendum með erlent móður-
mál hafi fjölgað um 148 eða um 11%
frá skólaárinu 2001–2002 til skóla-
ársins 2003–2004.
37 tungumál
♦♦♦
HÉRAÐSDÓMUR Reykjavíkur
hefur dæmt 26 ára karlmann í fang-
elsi til fjögurra mánaða, en frestað
fullnustu tveggja mánaða af refsi-
vistinni, fyrir líkamsárás í maí á sl.
ári. Honum var auk þess gert að
greiða fórnarlambi sínu rúmar 550
þúsund krónur í miskabætur auk 240
þúsund króna í sakarkostnað.
Ákærða er gert að sök að hafa ráð-
ist á karlmann á fertugsaldri á
skemmtistað í Reykjavík, slegið
höfði hans við barborð, margsinnis
slegið hann hnefahögg og sparkað í
andlit hans og líkama, dregið hann á
hárinu eftir gólfinu og misþyrmt
honum með öðrum hætti. Við aðfar-
irnar hlaut fórnarlambið m.a. brot á
þvertindum 1.–3. lendahryggjar
hægra megin, brot á 7. og 8. rifi
vinstra megin og nefbrot.
Við málsmeðferðina var m.a. sýnd
myndbandsupptaka af árásinni þar
sem sést að ákærði ræðst fyrirvara-
laust á fórnarlamb sitt. Einnig kom
fram að ákærði er um tveir metrar á
hæð og er með brúnt belti í sjálfs-
varnaríþróttinni Jiu jitsu.
Við yfirheyrslur bar ákærði við að
nóttina áður en hann lagði til árásar
hefði unnusta hans skýrt frá því að
hún hefði haldið fram hjá honum
með fórnarlambinu. Ákærði kvaðst
hafa tekið frásögnina nærri sér.
Afbrýðisemi réð för
Í niðurstöðum dómsins segir að
nægileg sönnun sé fyrir því að
ákærði hafi ráðist á fórnarlambið
með þeim hætti sem í ákæru greinir.
Kemur fram að ef litið er til upptöku
úr öryggismyndavél sést ótvírætt
hvernig ákærði lét högg og spörk
dynja á andliti og líkama fórnar-
lambsins, dregur hann á hárinu og
keyrir höfuð hans í barborðið.
Við ákvörðun refsingar var til þess
litið að ákærði á ekki að baki sak-
arferil. Hins vegar var atlaga hans
heiftúðleg og hrottafengin og ekki
annað ráðið af framburði vitna en að
afbrýðisemi hafi ráðið för.
Héraðsdómarinn Ásgeir Magnús-
son kvað upp dóminn. Dagmar Arn-
ardóttir fulltrúi lögreglustjórans í
Reykjavík flutti málið af hálfu
ákæruvaldsins en Hilmar Ingimund-
arson hrl. varði manninn.
Heiftúðleg og
hrottafengin árás
„VIÐ lýsum yfir miklum vonbrigðum og undrun með
þessar hækkanir í ljósi þeirrar umræðu sem átt hefur
sér stað á undanförnum misserum um kjör eldri borg-
ara. Þessi hækkun kemur hreinlega eins og blaut tuska
framan í okkur,“ segir Margrét Margeirsdóttir, formað-
ur Félags eldri borgara, og vísar þar til ákvörðunar vel-
ferðarráðs Reykjavíkurborgar um að hækka gjaldskrá
velferðarsviðs borgarinnar um 8,8% frá og með næstu
áramótum. Hækkunin var rædd á fundi framkvæmda-
stjórnar FEB í gær og mun félagið í framhaldinu senda
frá sér ályktun þar sem henni verður mótmælt.
Segir Margrét ljóst að hækkunin muni koma allra
verst við þá eldri borgara sem lakast eru settir og munar um hvaða upphæð
sem er. Segir hún tímasetningu hækkunar einnig koma á óvart og að eðli-
legra hefði verið af hálfu borgarinnar að bíða með hækkanir þar til ljóst
væri hvernig rekstrarárið kæmi út í heild. Heimaþjónustan er greiðsluskyld
fyrir alla sem hana nýta nema þá sem aðeins hafa bætur frá TR. Að sögn
Margrétar á framkvæmdastjórnin fund með borgarstjóra nk. mánudag þar
sem m.a. á að ræða hækkunina. Segist hún halda í vonina um að horfið verði
frá boðaðri gjaldskrárhækkun.
Undrast hækkun þjón-
ustugjalda eldri borgara
Margrét
Margeirsdóttir