Morgunblaðið - 13.06.2007, Blaðsíða 18

18 MIÐVIKUDAGUR 13. JÚNÍ 2007 MORGUNBLAÐIÐ
HÖFUÐBORGARSVÆÐIÐ
AKUREYRI
KVENFÉLAGIÐ Hlíf heldur upp á aldar af-
mæli sitt á þessu ári. Það var stofnað 4. febrúar
1907. Af því tilefni hefur félagið gefið út veglegt
afmælisrit þar sem farið er
yfir starfið „frá fyrstu stund
til dagsins í dag,“ eins og
Margrét Baldursdóttir for-
maður Hlífar kemst að orði.
Margrét segir félagið eiga
erindi við fólk í samtímanum,
enda „alltaf að gefa af sér“.
Höfuðmarkmið þess er að
afla fjár til styrktar Barna-
deild F.S.A., sem nefnt er
„óskabarn“ Hlífar í afmælis-
ritinu: „Hlutverk okkar hef-
ur lengi verið að hjálpa börnum, og þá aðallega
Barnadeild og Barnageðdeild FSA. Við störfum
náið með yfirlæknum og starfsmönnum deild-
anna. Þeir einfaldlega láta okkur vita hvað vant-
ar og þá förum við og söfnum fyrir því.“
Á þessu gerir Kvenfélagið eingöngu undan-
tekningar ef málefnin snerta börn og tengjast
félagssvæði Hlífar. „Að auki höfum við mikið
starfað með heimsforeldrum UNICEF og
styrkjum starf þess,“ segir Margrét.
Léttur andi á fundunum
Kvenfélagið Hlíf er með elstu kvenfélögum
landsins. Í félaginu eru 36 virkir félagar og 2
heiðursfélagar og er andinn léttur að sögn Mar-
grétar: „Við höfum fundi átta sinnum á ári, alla
vetrarmánuði nema janúarmánuð. Sú venja hef-
ur myndast að fyrsti haustfundurinn fer fram í
rútuferð á milli staða á Norðurlandi. Á fundum
förum við yfir erindi sem okkur hefur borist auk
þess sem við höfum fengið til okkar fyrirlestra
eða skemmtilegar uppákomur.“
Félagskonur eru á öllum aldri. Sú yngsta er
enn á þrítugsaldri og sú elsta er fædd árið 1922,
og þar af leiðandi 85 ára gömul. „Það er ofsalega
gefandi að kynnast þessum fullorðnu konum
sem muna tímana tvenna. Og það er eitt jákvætt
við fundina: þeir eru hafnir yfir trúmál og póli-
tík. Þó svo konur hafi misjafnar skoðanir er eng-
inn ágreiningur um þessi mál á fundum, sem er
rosalega gott.“
Fjársöfnunin orðin erfiðari
Gjafirnar sem félagið hefur látið af hendi
rakna í gegnum tíðina hafa verið veglegar. Sem
dæmi má nefna hitakassa árið 1973 og fullkomið
gjörgæslutæki árið 2000, en það var gefið ásamt
öðrum kvenfélögum frá Blönduósi til Vopna-
fjarðar. Ásamt því hefur félagið gefið barna-
deild FSA smærri gjafir úr sérstökum minning-
arsjóði Hlífar, nú síðast tréleikborð fyrir
barnageðdeildina.
Margrét segir félagið búa yfir ýmsum ráðum
til að fjármagna styrkina: „Við öflum aðallega
fjár með styrkjum frá fyrirtækjum. Svo höfum
við haldið bingó, bögglauppboð, happdrætti og
selt jólakort.“ Reyndar segir Margrét að
styrkjaöflun verði sífellt erfiðari því samkeppn-
in sé hörð. Að auki hefur ein aðalfjáröflun fé-
lagsins, kökudagurinn á sumardeginum fyrsta,
verið lögð niður: „Þetta gerðist bara smám sam-
an, með breyttu samfélagi. Áður vorum við ein-
ar með þennan dag, en nú eru margir með fjár-
aflanir. Í stað þess höfum við verið með
kökubasara á Glerártorgi á sumardaginn fyrsta
og í nóvember, sem hafa gefið ágæta afkomu.“
Félagskonur verða að vilja gefa af sér
Á sumrin tekur Kvenfélagið Hlíf sér frí, enda
félagskonur þá gjarnan staddar víðsvegar í
heiminum. Í lok ágúst kemur stjórnin aftur
saman, þá iðulega full af tilhlökkun eftir fríið.
Aðspurð hvaða erindi félagið eigi við ungar
konur í dag, segir Margrét: „Það hefur nú ekki
gengið neitt rosalega vel að fá ungar konur til
liðs við okkur. Ég held hins vegar að þessi fé-
lagsskapur eigi ekkert síður erindi við ungar
konur í dag heldur en þegar ég kom inn. Það er
líka vítamínsprauta fyrir okkur af eldri kynslóð-
inni þegar ungar konur koma inn. En allar kon-
ur í félaginu verða að hafa þann neista í sér að
vilja gefa af sjálfum sér. Það gefur líka margt til
baka að vinna að málefni, sjá það fara frá sér og
finna að allir eru glaðir.“
Rætt við Margréti Baldursdóttur formann um starfið á liðnum árum
100 ár liðin frá stofnun
Kvenfélagsins Hlífar
Ljósmynd/Matthías Gestsson
Ötult starf Kvenfélagið Hlíf á erindi við samtímann, enda „alltaf að gefa af sér“, segir Margrét.
Margrét
Baldursdóttir
ÁHUGASÖMUM gefst í kvöld kl. 19:30
tækifæri til að sjá hvernig Akureyri lítur
út af sjó. Þá verður boðið upp á ókeypis
kvöldsiglingu meðfram Akureyri um borð
í Húna II. Hanna Rósa Sveinsdótttir, sér-
fræðingur hjá Minjasafninu á Akureyri,
mun sjá um leiðsögn um borð í skipinu og
segja frá því sem fyrir augu ber.
„Lagt verður upp frá Torfunefs-
bryggju og ferðin tekur góðan klukku-
tíma,“ segir Hanna Rósa. „Um er að ræða
óvenjulega söguskoðun, söguskoðun frá
sjó. Þannig fæst annað og jafnvel
skemmtilegra sjónarhorn á bæjarmynd-
ina heldur en þegar maður gengur eftir
götunum.
Til að byrja með verður siglt suður
pollinn og að elsta hluta Akureyrar. Svo
fikrum við okkur áfram eins og bærinn
þróar sig. Við siglum aftur í áttina að
Oddeyrinni og Oddeyrartanganum og
fjöllum þá um það sem snýr að atvinnu-
þáttum og atvinnuvegum.
Á ferðinni fléttast saman sögulegur
fróðleikur og staðreyndir um það hvernig
bærinn hefur breyst og mótast í gegnum
tíðina. Við gerum ráð fyrir að fara út fyr-
ir Krossanes og jafnvel út að Dagverð-
areyri en förum svo nær Svalbarðsströnd
til baka áður en komið er aftur á Torfu-
nefsbryggju.“
Siglingin er í boði Akureyrarstofu,
Minjasafnsins á Akureyri og Hollvina
Húna II. Um borð í Húna II verður eins og
endranær boðið upp á kaffi fyrir gesti.
Sigla með
Húna II og
skoða Akureyri
Eftir Unu Sighvatsdóttur
una@mbl.is
Reykjavík | Nemendaverðalaun menntaráðs
Reykjavíkur voru veitt í fimmta sinn í ár og
hlutu alls 30 nemendur á aldrinum sex til sextán
ára viðurkenningu fyrir námsárangur, fé-
lagsstörf og fleira. Einnig voru veitt hvatning-
arverðlaun og viðurkenningar til sex grunnskóla
fyrir framúrskarandi þróunar- og nýbreytni-
verkefni. Eyþór Þrastarson var einn þeirra sem
hlutu nemendaverðlaunin í ár, en hann er nýút-
skrifaður úr 10. bekk Hólabrekkuskóla. Eyþór
var tilnefndur af starfsfólki skólans fyrir náms-
árangur, dugnað og góða félagsfærni.
Heiður að fá verðlaun
Eyþór segist ánægður með að fá verðlaunin,
það sé vissulega ákveðinn heiður. Hann dvelur
hins vegar ekki lengi við það sem er að baki því
mörg ný verkefni eru framundan og hefst það
fyrsta strax í næstu viku. „Ég ætla að vinna fyr-
ir Hitt húsið í sumar, við að bæta aðgengi
blindra og sjónskertra í Reykjavík,“ segir Ey-
þór. Hann er sjálfur blindur og vann meðal ann-
ars að því með Hinu húsinu í fyrrasumar að búa
til matseðla með stækkuðu letri og blindraletri.
„Það sem við ætlum að reyna að gera núna er að
benda á hluti sem allir hafa gagn af, til dæmis að
setja upp betri skilti og merkingar í Reykjavík.
Það er eitthvað sem er betra fyrir alla.“
Fötlunin ekki hindrun
Þegar Eyþór var í 9. bekk lauk hann sam-
ræmdum prófum í ensku og íslensku með ágæt-
um, og samhliða námsefni 10. bekkjar kláraði
hann einnig þrjá áfanga í ensku við Fjölbrauta-
skólann í Breiðholti. Þrátt fyrir það stefnir hug-
urinn í miðborgina, því í haust ætlar Eyþór að
hefja nám við félagsfræðibraut Kvennaskólans
Reykjavík. Hann segist velja sér skóla al-
gjörlega eftir eigin höfði en ekki með tilliti til
þess hvernig aðgengi sé fyrir blinda, enda lætur
hann blinduna ekki stjórna lífi sínu. „Það skiptir
bara engu máli. Sumt fólk, sem til dæmis gengur
við hækjur, lætur kannski stiga stoppa sig. Mér
finnst það svo innilega rangt. Það er alveg ótrú-
legt.“
Eyþór segir sér alltaf hafa fundist gaman að
lesa og nefnir íslensku og samfélagsfræði sem
uppáhaldsfög. Hann segir þó að stundum hafi
verið skortur á námsefni fyrir hann, það hafi oft
ekki verið tilbúið fyrr en liðið var á veturinn.
„Það er víst verið að vinna í því að auðvelda
blindum að fá námsefni, þetta hefur alltaf verið
dálítið vesen.“ Hann heldur samt ótrauður
áfram í náminu og stefnir á háskólanám eftir
stúdentsprófið. „Ég hef íhugað að fara í sál-
fræði, sjúkraþjálfun eða jafnvel blaðamennsku.“
Eyþór hefur ekki bara staðið sig vel í vinnu og
skóla, því hann æfir einnig sund af kappi. Hann
hefur farið í þó nokkrar keppnisferðir og tók
meðal annars þátt í heimsmeistaramóti fatlaðra
í sundi 2006, sem fór fram í Suður-Afríku. „Eins
og staðan er núna stefni ég á að halda áfram í
sundinu líka,“ segir Eyþór. Það er því óhætt að
segja að hann sé vel að viðurkenningunni kom-
inn.
Menntaráð Reykjavíkurborgar verðlaunar grunnskóla og nemendur fyrir metnað og árangur
Hvatning fyrir krakkana
Morgunblaðið/G.Rúnar
Afreksmaður Eyþór Þrastarson tekur lífið
með trompi og lætur ekkert stoppa sig.
Verðlaunahafar Börkur Vígþórsson, skólastjóri Grandaskóla, tekur við Hvatningarverðlaunum
menntaráðs sem Grandaskóli hlaut fyrir verkefnið Tónlistaruppeldi. Verðlaunin afhenti Júlíus Vífill
Ingvarsson, formaður menntaráðs Reykjavíkur. Verðlaunagripinn hannaði Pjetur Stefánsson.
Breki Þórðarson, Austurbæjarskóla
Kristín Erla Jónsdóttir, Álftamýrarskóla
Helga Magnadóttir, Árbæjarskóla
Gísli Þór Þórðarson, Borgaskóla
Hulda Lilja Hannesdóttir,
Breiðagerðisskóla
Baldur Jóhannesson, Breiðholtsskóla
Yrsa Ósk Finnbogadóttir, Engjaskóla
Finnur Kristjánsson, Fellaskóla
Jóhanna Edwald, Foldaskóla
Hekla Helgadóttir, Háteigsskóla
Björg Finnbogadóttir, Hlíðaskóla
Eyþór Þrastarson, Hólabrekkuskóla
Vilborg Inga Magnúsdóttir, Húsaskóla
Sveinbjörn Pálmi Karlsson,
Ingunnarskóla
Dagný Harðardóttir, Korpuskóla
Katrín Björnsdóttir og Oddur Björnsson,
Laugalækjarskóla
Ingvar Ásbjörnsson og
Kjartan Guðmundsson, Rimaskóla
Bjarki Þórsson, Seljaskóla
Sigríður Þórdís Pétursdóttir,
Skóla Ísaks Jónssonar
Valgarð Hrafnsson, Sæmundarskóla
Sæunn Marin Harðardóttir, Tjarnarskóla
Sólveig Vaka Eyþórsdóttir,
Vesturbæjarskóla
Ásta Kristín Pjetursdóttir, Víkurskóla
Ásta Guðrún Sighvatsdóttir, Vogaskóla
Ísak Bjarnason og Þengill Jónsson,
Ölduselsskóla
Einar Kári Guðmundsson,
Öskjuhlíðarskóla
Heiðrún Eva Gunnarsdóttir,
Öskjuhlíðarskóla
Kristín Hrefna Halldórsdóttir,
Öskjuhlíðarskóla
Jón Margeir Sverrisson, Öskjuhlíðarskóla
Hvatningarverðlaun grunnskóla
Þeir skólar sem hlutu hvatning-
arverðlaunin í ár voru Grandaskóli, Vík-
urskóli og Öskjuhlíðarskóli, auk þess sem
Húsaskóli, Laugarnesskóli og Foldaskóli
hlutu viðurkenningar.
Verðlaunahafar
menntaráðs