Morgunblaðið - 10.03.2008, Blaðsíða 14
14 MÁNUDAGUR 10. MARS 2008 MORGUNBLAÐIÐ
ERLENT
LEIÐTOGAR tveggja stærstu
flokkanna í Pakistan undirrituðu í
gær yfirlýsingu um myndun sam-
steypustjórnar. Asif Ali Zardari,
ekkill Benazir Bhutto, fyrrverandi
forsætisráðherra, og Nawaz Sharif,
fyrrverandi forsætisráðherra, und-
irituðu yfirlýsinguna og hvöttu
Pervez Musharraf forseta til að
kalla þingið saman sem allra fyrst.
Stjórnarmyndunin er álitin enn
eitt áfallið fyrir Musharraf eftir að
flokkur hans beið ósigur í kosn-
ingum í febrúar. Flestir stjórn-
málaskýrendur telja að hún verði
annaðhvort til þess að völd forset-
ans minnki eða valdabarátta blossi
upp milli hans og þingsins.
Sharif hefur krafist þess að Mus-
harraf láti af embætti. Flokkarnir
tveir náðu samkomulagi um að allir
dómarar sem Musharraf hafði vikið
úr hæstarétti landsins yrðu skip-
aðir í dómstólinn að nýju innan
mánaðar eftir að stjórnin tæki við
völdunum.
Ný samsteypustjórn álitin
mikið áfall fyrir Musharraf
Reuters
Samstarf Nawaz Sharif og Asif Ali
Zardari á blaðamannafundi í gær.
EVRÓPSKA geimvísindastofnunin ESA skaut í gær á
loft stóru mannlausu geimfari sem flytja á matvæla- og
eldsneytisbirgðir til Alþjóðlegu geimstöðvarinnar (ISS)
og tengjast henni sjálfvirkt. Er þetta stærsta og flókn-
asta far sem stofnunin hefur sent út í geiminn.
Geimfarið ATV getur flutt allt að 7,6 tonna farm og
var nær 20 tonn þegar því var skotið á loft í Frönsku
Gvæjana. Geimfarið er 10,3 metra langt, 4,5 metra breitt
og á stærð við stóran strætisvagn. Heildarkostnaðurinn
nam 1,3 milljörðum evra, sem svarar rúmum 130 millj-
örðum króna, en ráðgert er að smíða að minnsta kosti
fjögur önnur geimför af þessari gerð.
Geimfarið er með búnað sem gerir því kleift að tengjast við geimstöðina
án nokkurrar aðstoðar manna. Gert er ráð fyrir því að farið tengist við
geimstöðina 3. apríl. Það á síðan að fara frá geimstöðinni um hálfu ári síð-
ar og flytja þaðan rusl sem safnast hefur fyrir. Geimfarið á síðan að brenna
upp ásamt ruslinu yfir Kyrrahafinu.
Sjálfstýrðu evrópsku
flutningafari skotið út í geim
Geimflauginni
skotið á loft í gær.
BARACK Obama bar sigurorð af
Hillary Clinton í Wyoming á laug-
ardag með 61% atkvæða gegn 38% í
forkosningum demókrata. Obama
fékk sjö af tólf landsfundarfulltrú-
um Wyoming. Hann hefur nú fengið
alls 1.578 fulltrúa á flokksþing, sem
velur forsetaefni demókrata form-
lega í ágúst, og Clinton hefur feng-
ið 1.468, að sögn fréttastofunnar
AP. Til að sigra í forkosningunum
þarf frambjóðandi að fá 2.025 full-
trúa.
Næst verður kosið í Mississippi-
ríki á morgun og barist verður þá
um 33 fulltrúa. Baráttan færist síð-
an til Pennsylvaníu, sem fær 158
fulltrúa, en kosið verður þar 22.
apríl.
Reuters
Atkvæðaveiðar Barack Obama
heilsar kjósendum í Wyoming.
Obama sigraði
í Wyoming
BAREIGENDUR í Minnesota telja sig hafa fundið mjög
menningarlega leið til að sniðganga reykingabann sem
tekið hefur gildi í ríkinu. Samkvæmt lögunum eru leik-
arar undanþegnir reykingabanninu þegar þeir taka þátt
í sviðsetningum. Barirnir hafa því breyst í leikhús og
gestirnir eru orðnir leikarar.
Nokkrir baranna hafa látið prenta „leikskrá“ þar sem
barþjónarnir eru kynntir sem leikarar og öskubakkarnir
teljast nú leikmunir. Gestir mæta í búningum og eiga
það til að tala með torkennilegum hreim.
Á einum baranna útskýrði eigandinn hvers vegna
gestirnir sætu bara, drykkju og reyktu við háværa tón-
list án þess að sýna leikræna tilburði. „Þeir leika sjálfa sig eins og þeir voru
áður en bannið tók gildi,“ sagði hann. „Sýningin heitir Fyrir bannið.“
Reykingar sviðsettar á börum
Spunaleikari í
Minnesota.
KÍNVERSK yfirvöld sögðu í gær að
„hryðjuverkamenn“, sem biðu bana
í áhlaupi öryggissveita í Xinjiang-
héraði, hefðu skipulagt hryðjuverk
í tengslum við ólympíuleikana í
Peking í sumar. Tveir menn biðu
bana og fimmtán voru handteknir í
áhlaupinu 27. janúar í Urumqi, höf-
uðstað Xinjiang, sem er víð-
áttumikið hérað í grennd við nokk-
ur Mið-Asíulönd. Múslímar eru í
meirihluta í héraðinu.
Ríkislögreglustjóri Kína hefur
sagt að sumarólympíuleikunum í
Peking stafi mest hætta af hugs-
anlegum hryðjuverkum. Mannrétt-
indasamtök hafa sakað kínversk yf-
irvöld um að notfæra sér baráttuna
gegn hryðjuverkum til að þagga
niður í andófsmönnum í Xinjiang-
héraði.
Hryðjuverki
afstýrt í Kína?
METSNJÓKOMA hefur verið í Ohio
í Bandaríkjunum og raskað sam-
göngum og annarri þjónustu. Í Col-
umbus er nú um 50 cm jafnfallinn
snjór. Hermt er að fjórir hafi dáið
af völdum fannfergisins.
Metfannfergi
STUTT
JAPANSKAR konur ganga berfættar á glóandi kolum
á eldgönguhátíð við rætur Takao-fjalls í Hachioji, í
norðvestanverðri Tókýóborg í gær. Hátíðin er haldin
árlega í tilefni af komu vorsins á þessum slóðum.
AP
Gengið á glóandi kolum á vorhátíð
Eftir Boga Þór Arason
bogi@mbl.is
SÓSÍALISTAFLOKKURINN á
Spáni, flokkur Luis Rodriguez Za-
pateros forsætisráðherra, fékk mest
fylgi í þingkosningum, sem fram fóru
í gær, en virtist ekki hafa fengið
meirihluta þingsæta, samkvæmt
kjörtölum sem birtar voru í gær-
kvöldi.
Sósíalistaflokknum var spáð 168
sætum af 350 á þinginu, en Þjóðar-
flokknum (PP) 154 þegar 93% at-
kvæða höfðu verið talin. Sósíalistar
þurftu að fá 176 sæti til að geta
myndað meirihlutastjórn án stuðn-
ings annarra en líklegt er að hann
þurfi að leita aftur eftir stuðningi
þjóðernissinnaðra flokka í héruðum
sem berjast fyrir auknum sjálfstjórn-
arréttindum.
Sósíalistaflokkurinn fékk 164 þing-
sæti í síðustu kosningum og hann
vantaði þá tólf sæti til að ná meiri-
hluta.
Kjörsóknin var um 75% sam-
kvæmt kjörtölum í gærkvöldi, svipuð
og í kosningunum fyrir fjórum árum
þegar hún var 75,66%.
Telja morðið hafa haft áhrif
Metkjörsókn í mars 2004 er talin
hafa átt stóran þátt í óvæntum sigri
sósíalista í þingkosningum sem fram
fóru aðeins þremur dögum eftir að
191 maður beið bana í sprengjuárás-
um á lestakerfi Madrídborgar. Kjós-
endur reiddust fullyrðingum stjórnar
Þjóðarflokksins á þeim tíma um að
ETA, aðskilnaðarhreyfing Baska,
hefði staðið fyrir hryðjuverkunum
þótt fram hefðu komið vísbendingar
um að íslamskir öfgamenn hefðu ver-
ið að verki til að mótmæla þátttöku
spænska hersins í stríðinu í Írak.
Stjórn Zapateros kallaði spænska
herliðið í Írak heim eftir kosningarn-
ar.
Morð á baskneskum stjórnmála-
manni, Isaias Carrasco, fyrrverandi
bæjarfulltrúa úr röðum sósíalista,
varpaði skugga á kosningarnar í gær
og varð til þess að stærstu flokkarnir
stöðvuðu kosningabaráttu sína á
föstudag. Engin hreyfing hefur lýst
morðinu á hendur sér en spænsk yf-
irvöld segja að allt bendi til þess að
ETA hafi verið að verki.
Dóttir Carrascos flutti ávarp á
laugardag til að hvetja Spánverja til
að sýna samstöðu gegn hryðjuverka-
mönnum með því að flykkjast á kjör-
staði. Nær öll dagblöð landsins birtu
myndir af dóttur Carrascos syrgja
föður sinn og hægrisinnaðir fjöl-
miðlar sögðu áskorunina auka líkurn-
ar á sigri sósíalista í kosningunum.
„Myndirnar hafa vakið samúð með
sósíalistum og Zapatero,“ sagði
hægriblaðið El Mundo í forystugrein.
„Sumir eru þegar farnir að hreyfa
þeirri hugmynd að vinni sósíalistar
stærri sigur en spáð var sé það vegna
morðsins á Isaias Carrasco,“ sagði
vinstriblaðið El País.
Zapatero, sem er 47 ára, hefur
komið á umfangsmiklum lagabreyt-
ingum í samfélagsmálum síðustu
fjögur árin. Undir stjórn hans hafa
Spánverjar m.a. lögleitt hjónabönd
samkynhneigðra, auðveldað hjóna-
skilnaði, innleitt lög sem stuðla að
jafnrétti kynjanna og hert baráttuna
gegn heimilisofbeldi.
Í kosningabaráttunni lögðu for-
ystumenn Þjóðarflokksins áherslu á
áhyggjur af vaxandi atvinnuleysi og
fjölgun innflytjenda í landinu. Inn-
flytjendunum fjölgaði úr hálfri millj-
ón í 4,5 milljónir á einum áratug og
þeir eru nú um 10% íbúa landsins.
Mariano Rajoy, leiðtogi Þjóðar-
flokksins, hét því m.a. að skylda inn-
flytjendur til að undirrita samning
þar sem þeir lofuðu að virða spænsk-
ar venjur og læra spænsku.
Rajoy sakaði stjórn sósíalista um
linkind í baráttunni við hryðjuverka-
samtök með því að hefja misheppn-
aðar friðarviðræður við ETA. Hann
gagnrýndi einnig sósíalista fyrir að
vilja auka sjálfstjórnarréttindi hér-
aðanna.
Fékk mest kjör-
fylgi en náði ekki
meirihluta á þingi
Reuters
Sigurfögnuður Stuðningsmenn Sósíalistaflokksins fagna sigri hans fyrir
utan höfuðstöðvar hans í Madríd eftir að fyrstu kjörtölur voru birtar.
Sósíalistaflokkurinn
hrósaði sigri á Spáni