Muninn - 01.05.1997, Side 12

Fylgt úr hlaði
Slímugar trefjar hins vélvædda holds
fara lævísum lúkum um innviði sálar minnar.
Stálpuðum stöfum er þrykkt á berskjaldað hörund
mitt og hreinleikinn svertur. Gangur lífsins er
stiginn af framandi fótum og andi minn bundinn
hugarljómun þroskaheftra hugsjónamanna sem
sjá ekki sömu augum og sjötugur fangi á síberískri
grund. Ég er andlaus gjaldmiðill ólíkra skoðana
og máttur minn vanskapaður. Bernskunni var rænt
af huglausum helgispjöllum sem byggðu þykka
varnarveggi úr ökrum úreltra gilda þar sem
yfirborðskenndum vexti er haldið niðri af
brennimerktum rótum hinnar alvitru uglu. Ég er
ásóttur af illa löguðum andlitum sem munda gömul
prik með glott á vör. Allt er gert til að hylma yfir
ódæðisverk yfirvalda og rotþró sú er safnast hefur
fyrir undir þéttum rassi ráðandi meistara
mammons ber keim af hroka og hleypidómi hins
menntaða manns. Af færibandinu stíg ég, plasti
sleginn eins og nýfermdur kórdrengur sem átt
hefur vingott við meðhjálparann. Hrum sál á ekkert
erindi á gapastokk nútímans.
í kjallaralausri kompu svíf ég um í
óravíddum hins reikula mannshuga og get mig
hvergi hrært. Örlög mín eru ákveðin af öðrum og
mín bíður ekkert nema biðin.
Bjarki Valtýsson
12 M U N
N N
19 9 7