Tímarit lögfræðinga - 01.05.1991, Qupperneq 3

TIMARIT wQ
LÖGFRÆÐINGA
1.HEFTI 41. ÁRGANGUR MAÍ1991
DÓMHÚS VIÐ LÆKJARTORG
Þau ánægjulegu tíðindi hafa borist að Útvegsbankahúsið við Lækjartorg hefur
verið keypt sem dómhús fyrir héraðsdómstólinn í Reykjavík. Um tíma leit út
fyrir að annar og lakari kostur yrði valinn fyrir dómhús Reykvíkinga og er því
sérstök ástæða til þess að fagna þessari niðurstöðu. Ber að þakka þeim aðilum
sem unnu að því að þessi ákvörðun var tekin.
Þegar landsmönnum var tilkynnt þessi niðurstaða kom jafnframt fram að
ætlunin væri að takmarka mjög það fjármagn sem leggja ætti í endurbætur og
breytingar á húsinu vegna breyttrar notkunar þess. Gagngerar breytingar verða
að vísu gerðar á tveimur neðstu hæðum hússins, en að öðru leyti verður húsið
látið halda sér óbreytt að mestu.
Ekki er ástæða til þess að gagnrýna aðhald fjárveitingavaldsins í þessu efni.
Oft virðist hafa verið lagt út í gífurlega kostnaðarsamar endurbætur á húsnæði,
við breytta notkun þess, án þess að séð verði að niðurstaðan réttlæti kostnaðinn.
Útvegsbankahúsið er allt hið vandaðasta og því ástæða til þess að ætla að
skipuleggja megi starfsemi dómstólsins í samræmi við núverandi innréttingar
hússins fremur en að umturna þar öllu til þess að skapa óskaumhverfið.
En þrátt fyrir aðhaldið verður að tryggja að dómhúsið rísi undir nafni. Hvað
varðar staðsetningu og ytri virðuleika verður ekki betur gert. Innihaldið þarf að
vera til samræmis. Fyrst og fremst þarf auðvitað að tryggja dómurum og öðrum
starfsmönnum dómstólsins góða vinnuaðstöðu, en hinu má ekki gleyma að í
dómhúsið eiga fleiri erindi. Það verður að tryggja lögmönnum eðlilega vinnuað-
stöðu, en á hana hefur mjög skort við dómstólana í Reykjavík og á flestum
stöðum úti á landi. Þá þarf að tryggja aðilum og vitnum í dómsmálum viðunandi
aðstöðu, en það er algengt að þetta fólk þurfi að bíða langan tíma eftir því að
þess tími komi í yfirheyrslum. Loks verður aðgangur almennings að dómsölum
hússins að vera greiður þannig að réttarhöld verði í raun opin almenningi.
1