Tímarit lögfræðinga - 01.05.1991, Blaðsíða 72

SAMTÖK EVRÓPSKRA LAGANEMA
Lögfræðingar þekkja vel til starfsemi Orators, félags laganema, og hafa stutt
starfsemi félagsins á ýmsan hátt. Hins vegar vita færri að innan lagadeildarinnar
er starfandi annað félag sem annast samskipti íslenskra laganema við aðra
evrópska laganema. Hér er átt við ELSA, Samtök evrópskra laganema, en
ELSA er skammstöfun á „The European Law Students’ Association.“
ELSA var stofnað af laganemum frá Austurríki, Vestur-Þýskalandi og
Ungverjalandi árið 1981. Frá þeim tíma hefur aðildarlöndum fjölgað jafnt og
þétt. Þau eru nú 22 og félagsmenn vel yfir 150 þúsund. í stofnskrá samtakanna
segir að hlutverk þeirra sé að „stuðla að og auka samstarf laganema, lögfræðinga
og lögmanna á sviði lagakennslu og fræðistarfa.“ Þörfin fyrir þess háttar samtök
er augljós, ekki síst á tímum sameiningar í Evrópu. Stórfelld aukning alþjóða-
samskipta á sviði verslunar og iðnaðar leiðir til þess, að lögmenn sem starfa í
viðskiptalífinu verða í síauknum mæli að vinna með starfsbræðrum sínum í
öðrum löndum. Stofnendur ELSA vildu koma til móts við þessar þarfir og nú 10
árum síðar sjáum við að samtökunum hefur orðið vel ágengt á ýmsum sviðum.
Eg vil í stuttu máli gera grein fyrir helstu þáttum starfseminnar í þeirri von að
vekja áhuga lögfræðinga á því sem ELSA hefur upp á að bjóða.
A sviði fræðistarfa má nefna útgáfu tímaritsins Law Review sem kom út í
fyrsta skipti árið 1989. Stefnt er að því að birta í tímaritinu fræðigreinar í lögfræði
sem ekki hafa birst áður í alþjóðlegum lögfræðitímaritum. í tímaritinu verða
birtar greinar um lagakerfi ýmissa landa og lögfræðileg vandamál sem hafa
víðtæk alþjóðleg áhrif. Höfundar þessara greina verða lögmenn, laganemar og
fræðimenn í lögfræði. Þess má geta að í næsta tölublaði verður birt grein eftir dr.
Magnús K. Hannesson lektor við lagadeild H.í. Hægt er að gerast áskrifandi að
tímaritinu gegn vægu gjaldi og er þeim sem áhuga hafa bent á að hafa samband
við stjórn ELSA á Islandi sem hefur aðsetur á skrifstofu Orators í Lögbergi.
Undanfarin ár hefur verið unnið að því að koma á rannsóknarstarfi innan
ELSA. Meðal þess sem þegar hefur verið komið á fót er „Legal Research
Programme and Assistance.“ Með þessari starfsemi gefst lögfræðingum og
laganemum kostur á að fá upplýsingar um gildandi rétt annarra þjóða og aðstoð
við úrlausn einstakra álitaefna. Starfseminni er ætlað að skapa tengsl annars
vegar á milli starfandi lögfræðinga og fyrirtækja, sem eru í leit að upplýsingum,
og hins vegar áhugasamra laganema, en þessi rannsóknarvinna getur jafnvel
orðið hluti laganámsins.
Það starf sem einna lengst er komið á veg innan ELSA eru vinnuskiptin en
með þeim eru laganemum og ungum lögfræðingum boðin sumarstörf í aðildar-
löndum ELSA. Lögfræðiskrifstofur og aðrir atvinnurekendur á þessu sviði
erlendis hafa sýnt vinnuskiptunum mikinn áhuga og þeim störfum sem í boði eru
fjölgar ár frá ári. Hér er bæði um að ræða störf sem svipuð eru almennum
70