Tímarit lögfræðinga - 01.05.1991, Blaðsíða 37

4. SKIPULAG OG UPPBYGGING
Dómstóllinn getur ýmist starfað fullskipaður eða í deildum í einstökum
málum. Aðalreglan er sú að allir dómararnir 13 dæma í hverju einstöku
dómsmáli. Þó er heimild til þess að dómurinn geti undir vissum kringumstæðum
starfað fullskipaður með einungis 7 dómurum.
Deildirnar eru nú 6 að tölu og eru 4 þeirra skipaðar 3 dómurum en 2 eru
skipaðar 5 dómurum.
Ákveðnar reglur eru um hvaða mál skuli dæmd af fullskipuðum dómi, og
hvaða mál af deildum, en ekki verður farið nánar út í þær reglur hér. Vegna þess
hve álagið á Dómstólinn hefur aukist jafnt og þétt, er æ fleiri málum vísað til
deildanna. Þess má þó geta að deild getur á hvaða stigi málsmeðferðar sem er
vísað máli til fullskipaðs dóms.6 7
Heimilt er að nota 10 tungumál fyrir Dómstólnum. Þau eru danska, enska,
franska, gríska írska, ítalska, hollenska, portúgalska, spænska og þýska.
Meginreglan er sú, að tungumál það sem notað er í dómsmáli er það mál sem
notað er í stefnunni til Dómstólsins. Þegar einstaklingur, lögaðili eða aðildarríki
stefnir einhverri af stofnunum bandalagsins, er meginreglan hins vegar sú að
sóknaraðili má velja eitthvert af hinum 10 tungumálum sem þingmál. Ef hins
vegar aðildarríki, einstaklingi eða lögaðila er stefnt, getur varnaraðilinn valið
þingmálið. í svokölluðum forúrskurðarmálum skal þó alltaf nota tungumál þess
aðildarríkis Evrópubandalagsins sem óskar forúrskurðarins. Forúrskurða verð-
ur nánar getið hér síðar.
Til hagræðis hefur Dómstóllinn valið sér frönsku sem vinnumál, þannig að öll
skjöl hvers máls eru að minnsta kosti þýdd á frönsku.'
5. DÓMARAR
Dómstóll Evrópubandalagsins er skipaður 13 dómurum eins og fyrr sagði.
Þeir eru skipaðir af ríkisstjórnum aðildarríkjanna í sameiningu. Þótt engar
lagareglur kveði á um af hvaða þjóðerni dómararnir skuli vera, er það þó svo í
framkvæmd að einn dómari er skipaður frá hverju aðildarríki, en tveir frá einu
þeirra.
Hver dómari er skipaður til sex ára í senn, en endurkjósa má dómara svo oft
sem verða vill, ávallt til sex ára í hvert skipti. Regla þessi hefur verið gagnrýnd
nokkuð þar sem hún er ekki í samræmi við þá meginreglu sem víða gildir, að
dómara skuli skipa ævilangt. Hefur m.a. verið á það bent að aðildarríki geti beitt
6 Sjá nánar m.a. Brown bls. 14-70, Kapteyn og Verloren Van Themaat bls. 145-148 og Lasok og
Bridge bls. 248-252.
7 Sjá nánar Hartley bls. 66-70, Kapteyn og Verloren Van Themaat bls. 63-65 og Lasok og Bridge
bls. 89-97.
35