Tímarit lögfræðinga - 01.07.2002, Page 83

ísland situr því við sama borð og aðildarríki ESB bæði hvað varðar tímafrest
og efni landslaga sem setja skal til að fara að tilskipuninni. Frumvarp til að lög-
leiða tilskipunina á Islandi var lagt fram á Alþingi á haustþingi 2001.
2. MARKMIÐ
Rafræn viðskipti þekkja engin landamæri. Þetta er megineinkenni rafrænna
viðskipta og það sem gerir þau frábrugðin öðrum hefðbundnari aðferðum. Þá
gerast þau með meiri hraða en hefur áður þekkst um aðferðir til að koma á
viðskiptum. Því var markmiðið með setningu tilskipunarinnar að skapa raun-
verulegt svæði án landamæra fyrir þjónustu í upplýsingasamfélaginu. I tilskip-
uninni er fyrst og fremst leitast við að ná þessu markmiði með því að skapa
réttaröryggi og tiltrú neytenda.
Tilskipunin er þverfagleg. Hún gildir um þjónustu á hvaða sviði sem er, s.s.
á sviði fjarskipta, fjármálaþjónustu eða læknisfræðilegrar ráðgjafar, svo framar-
lega að hún fari fram með rafrænum hætti.
3. GILDISSVIÐ - ÞJÓNUSTA í UPPLÝSINGASAMFÉLAGINU
Tilskipunin notar hugtakið „þjónusta í upplýsingasamfélaginu“ í stað þess að
tala um netið, Internetið eða beinlínutengda starfsemi. Með þessu er verið að
leitast við að nota „tæknilega hlutlaust" hugtak, sem er víðtækt og lítil hætta á
að úreldist. I frumvarpi því til laga sem ætlað er að lögleiða tilskipunina á
Islandi er þó notað hugtakið „rafræn viðskipti“.
Tilskipunin hefur að geyma eftirfarandi skilgreiningu á „þjónustu í upplýs-
ingasamfélaginu“:
Þjónustan er venjulega veitt gegn greiðslu (en er ekki nauðsynlega greidd
af þeim sem nýtur hennar).
Þjónustan er veitt úr fjarlægð.
Þjónustan er veitt með rafrænum búnaði fyrir gagnavinnslu og gagna-
geymslu.
Þjónustan er veitt að beiðni þess einstaklings sem þiggur þjónustuna.
Dæmi um þjónustu sem fellur undir ofangreinda skilgreiningu er pöntunar-
sjónvarp (gagnvirkt sjónvarp) eða viðskiptaorðsendingar í tölvupósti, en aftur á
móti eru sjónvarp og útvarp ekki talin til slíkrar þjónustu því að það efni er ekki
látið í té samkvæmt sérstökum beiðnum. Þá er notkun tölvupósts af hálfu ein-
staklinga ekki talin til þjónustu í þessum skilningi, þótt hún sé liður í samn-
ingagerð, nema hún sé gerð í atvinnuskyni.
Tilskipunin nær einungis til sviða sem eru samræmd í Evrópusambandinu.
Því nær hún ekki til skattlagningar svo að dæmi sé nefnt. Þá gildir hún ekki um
réttarsvið þar sem ítarleg Evrópulöggjöf hefur verið sett um, s.s. vemd
persónuupplýsinga eða samkeppnisrétt. Tilskipunin gildir aðeins fyrir þann
hluta viðskiptanna sem fram fer á netinu eða með öðmm rafrænum hætti.
177