Íslenskt mál og almenn málfræði - 01.01.2010, Page 11

9
Kjartan G. Ottósson
Kjartan var fjögur ár í Maryland en lauk aldrei seinni doktorsritgerð-
inni því að aðrar skyldur kölluðu haustið 1992 er hann tók við prófessors-
embætti í íslensku við Óslóarháskóla. í Ósló sökkti Kjartan sér ofan í
norska málsögu og fékk sérstakan áhuga á nýnorsku sem hann tileinkaði
sér og ritaði óaðfinnanlega. Einnig var honum veittur norskur ríkisborg-
araréttur en við það fékk föðurnafn hans ritmyndina Ottosson. Færni
Kjartans í nýnorsku og áhugi á henni vakti athygli enda ekki ýkja algengt
að útlendingar í Noregi leggi sig eftir nýnorsku. Ekki leið á löngu þar til
Kjartan var kominn í raðir helstu fræðimanna á sviði nýnorsku og norskr-
ar málsögu og þegar hann lést var hann einn af ritstjórum og höfundum
væntanlegs yfirlitsrits um norska málsögu en því miður auðnaðist honum
ekki að ljúka skrifum sínum fyrir það rit áður en hann lést.
Við Óslóarháskóla vann Kjartan meðal annars að undirbúningi nýrrar
fræðilegrar útgáfu á Heimskringlu Snorra Sturlusonar og tók þátt í ýms-
um alþjóðlegum rannsóknarverkefnum, svo sem Linguistic Theory and
Grammatical Change við Centre for Advanced Study í Ósló 2004—2005
og FORSE — Forskergruppe i samfunn og sprákendring við Björgvinjar-
háskóla frá 2007. Kjartan stýrði framhaldsnámi í málvísindum og texta-
fræði við Óslóarháskóla 2000-2002 og árin 2000-2007 átti hann sæti í
ritstjórn tímaritsins Collegium Medievale. í febrúar 2008 hlaut hann
verðlaun Ingerid Dal og Ulrikke Greve Dal fyrir framúrskarandi rann-
sóknir á indóevrópskum málum og sögu íslenskrar tungu.
í ársbyrjun 2007 greindist Kjartan með krabbamein og fljótt varð ljóst
hvert stefndi. Hann tók veikindum sínum af yfirvegun og sinnti fræða-
störfum og öðrum hugðarefnum eins og kraftar leyfðu.
Þótt Kjartan byggi erlendis í ríflega tvo áratugi hélt hann alltaf sam-
bandi við félaga sína á íslandi og var afskaplega áhugasamur um fræðileg
viðfangsefni okkar sem yngri vorum. Heimsóknir hans á Islandi voru oft
stuttar en hann var engu að síður gjafmildur á tíma sinn og ávallt reiðu-
búinn að ræða málfræðileg rannsóknarefni og lesa greinauppköst á ýms-
um stigum.
Kjartan sameinaði í verkum sínum skarpa innsýn í nýjustu kenningar í
málvísindum og yfirgripsmikla þekkingu á málsögu og fornum mál-
heimildum; þau munu halda nafni hans á lofti um langan aldur. Hjá okkur
sem kynntumst honum lifir minning um góðan dreng sem var kallaður á
brott alltof snemma og þakklæti fyrir vináttu, leiðbeiningu og hvatningu.
Haraldur Bernharðsson