Bændablaðið - 29.03.2012, Blaðsíða 12

Bændablaðið | fimmtudagur 29. mars 201212
Fréttir
Góð þátttaka í Nautgriparæktarskóla Búgarðs:
Þátttakendur eiga að geta heimfært
það sem þeir nema á sitt bú
Nautgriparæktarskóli Búgarðs
hóf göngu sína um miðjan síðasta
mánuð og var sjónum í fyrstu beint
að frjósemi mjólkurkúa. Þorsteinn
Ólafsson sérgreinadýralæknir hjá
MAST og Sigríður Bjarnadóttir
ráðunautur á Búgarði sáu um
kennsluna. Alls voru mættir
33 fulltrúar frá 28 kúabúum í
Eyjafirði og degi síðar var sams
konar námskeið haldið á Húsavík
þar sem mættu 15 fulltrúar frá
12 kúabúum. Óhætt er að segja
að heimtur hafi verið góðar því
fulltrúar frá rúmum fjórðungi
kúabúa á Búgarðssvæðinu eru
þátttakendur í skólanum.
Sigríður Bjarnadóttir, ráðunautur
hjá Búgarði, hefur umsjón með
Nautgriparæktarskólanum. Segir
hún að áður hafi verið boðið upp
á sauðfjárræktarskóla, sem hafi
sýnt sig og sannað og bændur tekið
góðan þátt í honum. Því hafi menn
ákveðið að prófa að setja á stofn
Nautgriparæktarskóla líka. Um er að
ræða röð 8 námskeiða sem ná yfir eitt
ár. Efnistökin eru að sögn Sigríðar
afmörkuð í hvert skipti og snúa beint
að því sem bændurnir eru að fást við
í sínu daglega starfi. „Auk þess er
reynt að flétta það inn í umfjöllun
hverju sinni með hvaða hætti bænd-
urnir geti nýtt sér þær upplýsingar
sem fyrir liggja um bú þeirra – og
sem þeir eru að skrá og skila hvort
sem er – til að meta stöðu sína. Þeir
vita best sjálfir hvað liggur bak við
þær upplýsingar og geta þá endur-
metið stöðuna með tilliti til þess og
hugsanlegrar nýrrar vitneskju eða
upprifjunar á eldri vitneskju,“ segir
Sigríður.
Pakki sem nær yfir víðfeðmt svið
Sigríður segir að af og til í gegnum
árin hafi verið boðið upp á nám-
skeið og fyrirlestra af ýmsu tagi fyrir
bændur, sem að sjálfsögðu sé af hinu
góða, en nautgriparæktarskólinn sem
slíkur og uppsetning hans sé ný af
nálinni.
„Í nautgriparæktarskólanum erum
við að útbúa eins konar pakka sem
nær yfir víðfeðmt svið nautripa-
ræktarinnar og er, þar sem við á, í
samhengi við ákveðinn tíma ársins,“
segir Sigríður en á námskeiði sem
haldið verður um miðjan næsta
mánuð verður farið yfir beit og
fóðuröflun mjólkurkúa.
„Við bjóðum auk þess fleiri en
einum aðila innan bús að mæta
hverju sinni en jafnframt verður
bú sem er skráð til þátttöku að taka
þátt í öllum námskeiðunum. Þannig
tryggjum við þátttöku í öll skiptin en
komum til móts við búin með þeim
hætti að hver og einn innan bús mætir
þá eftir áhuga á efninu sem tekið er
fyrir,“ segir hún.
Fjölbreyttur hópur
Allir sem áhuga hafa á að kynna sér
efnið, sem í boði er, eru velkomnir og
segir Sigríður að hópurinn sem sækir
skólann sé fjölbreyttur, bæði ungir
bændur, eldri hjón og samrekstrarað-
ilar. „Það er sérstaklega gaman að fá
unga fólkið til okkar, þá sem eru að
hugsa um að fara út í búskap og mæta
með foreldrum sínum.“
Sigríður segir að á Búgarðs-
svæðinu séu tæplega 160 kúabú í
rekstri og fjórðungur þeirra eigi full-
trúa í skólanum. „Við renndum alveg
blint í sjóinn með þátttöku en ég get
ekki sagt annað en hún sé mjög góð,“
segir hún. Þátttakendurnir koma af
öllu svæðinu, úr öllum búnaðarfélög-
um Eyjafjarðar og flestum búnaðar-
félögunum í Suður-Þingeyjarsýslu.
Sigríður segir að kostnaði sé
haldið í skefjum, húsnæði sem fyrir
er sé nýtt til námskeiðahalds og eins
það fagfólk sem er innan seilingar.
Þá fái skólinn til liðs við sig utanað-
komandi sérfræðinga á viðkomandi
fagsviði, sé þörf fyrir og tök á.
Gott að sjá hlutina í öðru ljósi
Um ávinning þess fyrir bóndann að
sækja námskeiðið segir Sigríður að
þátttakendur eigi að geta heimfært
það sem þeir nema á sitt bú og unnið
úr efninu. Vissulega sé ýmislegt af
því sem farið er yfir þekkt, hafi verið
kennt áður og kynnt, en góð vísa sé
aldrei of oft kveðin. Með umfjöllun
og upprifjun komi ýmis atriði upp
í hugann þegar bústörfum sé sinnt.
„Bara það að sjá hlutina með
öðrum hætti getur verið gott – þó
ekki sé nema til staðfestingar á því
að ástandið sé gott, eða þá að það ýtir
fólki út í breytingar til hins betra.“
/MÞÞ
Kappsláttur– síðasta
keppnin hérlendis?
Vorið 1918 vakti sá merki fræði-
maður Guðmundur Finnbogason
athygli á því með grein í
Búnaðarritinu að með breyttum
vinnubrögðum og verkfærum mætti
bæta hið aldagamla starf – að slá
með orfi og ljá. Hann sýndi fram
á það að auka mætti afköst sláttu-
manna án þess að meiri orku væri
varið til verksins.
Jón Hannesson bóndi í Deildar-
tungu í Borgarfirði hafði nokkrum
árum fyrr vakið máls á mikilvægi
sláttukennslu fyrir ungmenni. Til
þess að gera langa sögu stutta höfðaði
Guðmundur til ungmennafélaganna
um að taka málefnið upp. Hann kynnti
hugmyndir sínar um framkvæmd, m.a.
reglur fyrir kappslátt.
Ungmennasamband Borgarfjarðar,
sem Jón bóndi í Deildartungu átti þá
stjórnaraðild að, efndi til kappsláttar á
Hvítárbakka í byrjun ágúst 1918, þess
fyrsta á landinu að talið er. Guðmundur
gerði rannsóknir á sláttumönnunum,
sem þátt tóku, svo og sláttuháttum
þeirra. Myndarleg verðlaun voru í
boði. Seinna um sumarið voru sams
konar kappsláttarmót haldin að
Torfastöðum í Biskupstungum og í
Odda á Rangárvöllum, og þar rann-
sakaði Guðmundur einnig þátttakendur
og aðstæður. Næstu árin var efnt til
kappsláttar all víða um land, að því er
heimildir sýna. Þótti hann áhuga verður
þáttur héraðs hátíða og íþrótta móta.
Ég er að draga saman efni í íslenska
sláttusögu. Í henni á m.a. að gera
kappslætti dálítil skil. Nokkrar skrif-
legar heimildir um hann hefur rekið
á fjörur mínar en sárafáar ljósmyndir,
t.d. af kappsláttumönnum. Ég hef að
svo komnu stöðvast við það að síðasti
kappsláttur á vegum ungmennafélaga
muni hafa verið háður á Héraðsmóti
HVÍ að Núpi í Dýrafirði sumarið 1962.
Grun hef ég samt um að það hafi ekki
verið síðasta sláttukeppnin hérlendis.
Með þessum greinarstúfi langar
mig að komast í samband við heim-
ildarmenn, sem gætu miðlað frekari
fróðleik, munnlegum eða skriflegum,
myndefni og öðru er varðar þessa
athyglisverðu keppnisgrein. Hvað eina
skiptir máli þótt smátt kunni að þykja;
líka ábendingar um aðra heimildar-
menn. Vinsamlegast hafið þá samband
við mig í síma Landbúnaðarsafns, 844
7740, eða með tölvupósti á bjarnig@
lbhi.is.
Bjarni Guðmundsson Hvanneyri.
Nautgriparæktarskóli Búgarðs hóf göngu sína í liðnum mánuði og er átta skiptum dreift yfir árið. Hér fylgjast fróð-
leiksfúsir þingeyskir kúabændur með erindi um frjósemi mjólkurkúa. Mynd / MÞÞ
LbhÍ og MB taka höndum saman:
Nýrri námsbraut hleypt af stokkunum í haust
Nýrri námsbraut í samstarfi
Starfs- og endurmenntunardeildar
Landbúnaðarháskóla Íslands og
Menntaskóla Borgarfjarðar verð-
ur hleypt af stokkunum haustið
2012.
Ber námsbrautin nafnið
Náttúrufræðibraut - búfræðisvið.
Henni er ætlað að veita nemendum
undirbúning undir háskólanám í
náttúru- og búvísindum og mun
hún taka að jafnaði 4 ár. Nemendur
taka tvö fyrstu árin í Menntaskóla
Borgarfjarðar þar sem megináherslan
er á kjarnagreinar til stúdentsprófs
og valdar greinar á sviði raunvís-
inda. Tvö seinni árin taka nemendur
við búfræðibrautina á Hvanneyri.
Nemendur brautskrást bæði með
stúdentspróf frá Menntaskóla
Borgarfjarðar og búfræðipróf frá
Landbúnaðarháskóla Íslands.
„Með þessari námsbraut gefst
nemendum með áhuga á lífinu og
landinu sérstakt tækifæri til að afla
sér stúdentsprófs sem veitir góðan
grunn í hagnýtri náttúrufræði, þar
sem tvinnað er saman ýmsum grunn-
greinum náttúruvísinda og hagnýtrar
náttúrufræði, tækni- og hagfræði-
greina sem tengjast landbúnaði og
smárekstri. Fáar námsbrautir gefa
nemendum jafn hagnýtan undir-
búning fyrir lífið, óháð því hvað
þeir munu taka sér fyrir hendur, en
með náminu verða þeir þó sérstak-
lega vel í stakk búnir til að takast
á við háskólanám á þeim sviðum
sem Landbúnaðarháskóli Íslands
býður (búvísindi, náttúrufræði o.fl.)
auk annars náms á skyldum sviðum
við aðra háskóla,“ sagði Björn
Þorsteinsson, prófessor og aðstoðar-
rektor kennslumála.
Hvanneyri. Mynd / Theodór Kristinn Þórðarson.
Bændafundur á
Vopnafirði
Almennur bændafundur verður haldinn
þriðjudaginn 3. apríl nk. í Kaupvangi á
Vopnafirði. Fundurinn hefst kl. 13:00.
Umræðuefnið er m.a. fyrirhugaðar breytingar
á ráðgjafarþjónustu í landbúnaði, staða
landbúnaðarins og viðfangsefni bænda á
komandi misserum.
Frummælendur eru Haraldur
Benediktsson, formaður BÍ, og
Vigdís M. Sveinbjörnsdóttir stjórn-
armaður í BÍ.
Landbúnaðarfyrirtæki undir hatt Siðvistar
Á ársfundi Nýsköpunarmiðstöðvar
Íslands fyrr í mánuðinum voru
nokkur fyrirtæki, sem falla undir
þá skilgreiningu að þau grænki
íslenskt atvinnulíf, heiðruð sér-
staklega. Með því er átt við fyrir-
tæki sem hafa að leiðarljósi að
sporna við neikvæðum umhverf-
isáhrifum og takmarka um leið
kolefnisfótspor íslensks atvinnu-
lífs.
Meðal þeirra fyrirtækja sem heyra
þarna undir eru Biobú og Móðir jörð.
Nýsköpunarmiðstöðin hefur búið
til hugtakið Siðvist fyrir þetta verk-
efni, þar sem sjálfbærni og siðferði
eru höfð að leiðarljósi. Miðstöðin
mun veita verkefnum á þessu sviði
stuðning í formi rannsókna og þró-
unar og hjálpa frumkvöðlum og
stjórnendum fyrirtækja með hand-
leiðslu. /ehg
Eymundur Magnússon í Vallanesi þakkar þann áhuga, sem Nýsköpunarmið-
stöð Íslands hefur sýnt fyrirtæki hans, við svokallað grænt borð á ársfundi
miðstöðvarinnar fyrr í mánuðinum. Mynd / ehg