Þjóðlíf - 01.06.1987, Blaðsíða 42

ÞORVARÐUR ÁRNASON
■ FullkomiA stjórnborft. Alllr fréttamenn fi stól og síma.
Alger umskipti
Úr þrengingum og loftleysi í glæný húsakynni
NÚ FÁ ALLIR sér stól og sér síma. Það
hafa allir hér á fréttastofunni þráð í fleiri ár.
Þetta leggst mjög vel í okkur,“ segir Kári
Jónasson, fréttastjóri ríkisútvarpsins, við
Þjóðlíf og mælir þar fyrir munn 22 starfs-
manna fréttastofunnar sem eru nú heldur
kampakátir með nýju aðstöðuna í húsa-
kynnum útvarpsins við Efstaleiti. Fréttaliðið
flutti sig úr gamla Skúlagötuhúsinu fyrir
nokkrum dögum og svo fékk nýja útvarps-
húsið formlega vígslu síðdegis 19. júní.
Það var hátíðarstemmning yfir athöfninni
þegar forseti íslands, Vigdís Finnbogadótt-
ir, vígði nýja Efstaleitishúsið og gleðibragur
á mannskapnum. Stórum áfanga náð í sögu
RÚV því byrjað var að stinga fyrir bygging-
unni í menntamálaráðherratíð Vilhjálms
Hjálmarssonar fyrir meira en áratug. Klukk-
an sjö um kvöldið fóru svo fyrstu fréttir í
loftið frá nýju fréttastofunni.
„Fréttastofan hefur verið í Skúla-
götubyggingunni frá 1969, áður var hún í
húsnæði á horni Klapparstígs og Hverfis-
götu og þar áður í gamla Landsímahúsinu,"
segir Kári. „Þetta eru alger umskipti fyrir
fréttastofuna og nú erum við t.d. með stórt
stjórnborð eða fréttaborð þar sem vakt-
stjórar og fréttamenn í stuttum fréttum sitja
fyrir utan stúdíógluggann.
Og nú blasir nýtt útsýni við frétta-
mönnum. Við höfum Reykjanessfjall-
garðinn og Álftanesið fyrir okkur í stað
Sambandshússins og Seðlabankans, en auð-
vitað söknum við þess að eygja ekki lengur
Esjuna og Kolbeinshausinn úr norðurher-
berginu á gömlu fréttastofunni. Það er auð-
vitað slæmt að geta ekki horft út á hafið og
fylgst með skipaferðum en það kemur efa-
laust eitthvað í staðinn s.s. flugferðir því nú
erum við staðsett í aðflugslínu að Reykja-
víkurflugvelli.“
Tæknilegar aðstæður batna líka til muna
við þessa tilflutninga. Tölvuskjám hefur ver-
ið fjölgað og nú koma allar erlendu fréttirn-
ar inn á tölvur, að sögn Kára. „Og þessa
dagana erum við líka að byrja að fá fréttir
frá fréttastofum á Norðurlöndunum, Rit-
zau, NTB, TT í Svíþjóð og FNB í Finnlandi
og erum fyrsti íslenski fjölmiðillinn sem
fáum þessar fréttasendingar - beint í tölvu.
Það er út af fyrir sig mikill áfangi og alger
tilviljun að það gerist um leið og við flytjum
í nýju aðstöðuna í Efstaleitinu," bætir hann
við.
Svo hlustendur œttu að verða varir við þcer
breytingar sem eru orðnar á högum frétta-
manna RÚV?
„Já, ég ætla að vona það og má bæta því
við að nú fáum við miklu fullkomnara stúdíó
til nota fyrir fréttamenn. Áður var það svo
að í gamla stúíóið nr. 6 á Skúlagötunni mátti
með illu móti koma þremur mönnum fyrir
og aðstaðan var slík að eftir tíu mínútur var
orðið ólíft þar inni vegna loftleysis nema
hurðin væri höfð upp á gátt, en eins og gefur
að skilja er ekki beint þægilegt fyrir menn
að tala í útvarpið fyrir opnum dyrum. Þarna
fáum við bæði mjög fullkomið upptöku -
og útsendingarborð og mun rýmra stúdíó og
það er sérstakt við þetta stúdíó fréttamann-
anna í Efstaleiti, að það er eina stúdíóið
með glugga sem snýr ekki bara til tækni-
mannsins heldur sjáum við fram á fréttastof-
una úr því og svo suður á fjöllin á Reykja-
nesinu.“
22 fréttamenn starfa á fréttastofu ríkisút-
varpsins og einnig eru fastráðnir fréttamenn
á Akureyri, ísafirði og Egilsstöðum. Auk
þess heyrir morgunvakt útvarpsins undir
fréttastofuna, fréttir á ensku fyrir ferða-
menn og síðdegisþátturinn Hringiðan. Þetta
er mikið batterí sem nú er alfarið flutt í nýja
Efstaleitishúsið en ekki er þó öll starfsemi
gömlu gufunnar horfin frá Skúlagötunni því
einhverjar upptökur verða áfram gerðar i
gamla húsnæðinu.
„Fréttastofan er í gangi hér um bil allan
sólarhringinn, alla daga ársins og við státum
okkur af því að vera eini fréttamiðillinn á
landinu sem nær yfir allt landið og miðin og
þess vegna hefur verið lögð ríkuleg áhersla á
að ganga sem best frá allri aðstöðu á frétta-
stofunni. Þar er unnið frá klukkan sex á
morgnana og fram yfir miðnætti."
Og þið eruð þá vœntanlega enn betur 1
stakk búin nú til að taka þátt í fjölmiðlasant-
keppninni?
„Jú, og við óttumst ekki samkeppnina
enda trúum við því og treystum að fólk
hlusti á fréttir ríkisútvarpsins. Nýjasta út-
varpsstöðin hefur líka beinlínis lýst því yf,r
að hún ætli ekki að fara í samkeppni við
okkur á fréttasviðinu. Slíkir séu yfirburðir
okkar að samkeppni sé þýðingarlaus."
■ Ómar Fri&riksson