Dagblaðið Vísir - DV - 11.01.2013, Side 36

S
unnudaginn 13. janúar
mun félag Pólverja á Íslandi
standa fyrir góðgerðaupp-
ákomu í húsnæði embætt-
is ræðismanns Póllands í
Reykjavík. Uppákoman tilheyrir pól-
skri hefð en samkvæmt henni er einn
dag á ári safnað fyrir veik börn í Pól-
landi með fulltingi fólks sem reiðu-
búið er til að gefa framlag sitt – hvort
heldur sem er í formi lista eða muna
sem boðnir eru upp. Þetta í þriðja
skipti sem Pólverjar á Íslandi standa
fyrir söfnun á Íslandi. Íslenskir tón-
listarmenn hafa stutt framtakið og
má til gamans geta þess að á meðal
þeirra sem veittu söfnuninni liðsinni
sitt í fyrra var hljómsveitin Dikta og
gaf alla sína vinnu. Uppskera söfn-
unarinnar árin 2010 og 2011 var
850.000 krónur sem án efa hafa kom-
ið þessum ágæta málstað vel.
Um gervallt Pólland
Söfnunin hefur allar götur frá stofn-
un WOSP verið haldin fyrsta eða
annan sunnudag hvers nýs árs og
sem fyrr segir verður blásið til henn-
ar á Íslandi í þriðja skiptið á sunnu-
daginn. Hið sama verður gert um
gervallt Pólland, því í þorpum, bæj-
um og borgum munu Pólverjar taka
höndum saman og skipuleggja tón-
listaruppákomur og uppboð með
það fyrir augum að safna fé til handa
veikum börnum þar í landi. Söfnun-
in er í ár haldin í 21. skipti.
Vararæðismaður Póllands á Ís-
landi, Michał Gierwatowski, og
pólska ræðismannsskrifstofan láta
sitt ekki eftir liggja í þetta sinn því
húsnæði embættisins við Þórunnar-
tún 2, áður Skúlatún, í Reykjavík
mun hýsa viðburðinn.
Tónlist og tertur
Það er engin nýlunda að tónlist-
armenn séu boðnir og búnir til að
leggja góðu málefni lið og Pólverjar á
Íslandi komu ekki bónleiðir til búðar
hvað það varðaði. Blómaskreytingar-
konan Magdalena Kowalonek, sem
ber hitann og þungann af skipulagn-
ingu viðburðarins, á vart orð til
að lýsa ánægju sinni með vilja ís-
lenskra tónlistarmanna til láta gott
af sér leiða. Auk Magdalenu hafa
Pólska menningarfélagið í Reykjavík
og Project Poland komið mikið að
skipulagningu söfnunarinnar.
Þeir tónlistarmenn sem leggja sitt
af mörkum í ár eru Myrra Rós, Þór-
unn Antonía, Daníel Jónsson, betur
þekktur sem Dj Danimal, og söng-
konan Íris Þórarinsdóttir. Þess má
geta að Myrra Rós og Dj Danimal
fóru í hljómleikaferðalag um Pól-
land í fyrra og búa því að eins konar
tengingu við land og þjóð.
En ekki verður aðeins um veislu
fyrir eyrun að ræða því, sem fyrr seg-
ir, verður einnig haldið uppboð. Ekki
er með góðu móti hægt að fullyrða
hvað verður boðið upp en að sögn
Magdalenu mun kenna ýmissa grasa
í þeim efnum. Meðal þess sem verð-
ur í boði eru tertur skreyttar hjarta-
laga merki WOSP, enda er hjarta-
gæska sá grunnur sem svona söfnun
hlýtur að byggja á.
Ekki eingöngu söfnun
Hingað til hafa WOSP-samtökin lagt
áherslu á málefni tengd börnum en
í ár er brugðið út af þeim vana og
segir Magdalena einfalda skýringu á
þeirri stefnubreytingu. „Það er veru-
legur skortur á umönnunarheimil-
um fyrir aldrað fólk í Póllandi. Einnig
skortir verulega á nægan fjölda öldr-
unarlækna í landinu; íbúar lands-
ins eru um 40 milljónir og öldrunar-
læknar eru innan við 300 talsins,“
segir Magdalena sem telur að tími
sé til kominn að létta öldruðum
ævikvöldið með hætti sem hæfi 21.
öldinni. „WOSP-samtökin vilja ýta
undir nýjan hugsunarhátt með tilliti
til aldraðs fólks.“
Að sögn Magdalenu voru tvær
síðustu safnanir ekki vel sóttar af
Íslendingum sem sé ákveðin von-
brigði: „Málið snýst ekki eingöngu
um að safna fé fyrir gott málefni
heldur einnig að skapa gott samfélag
Pólverja á Íslandi, samfélag sem nær
að tengjast íslensku samfélagi.“
Að sögn Magdalenu verður stað-
ið fyrir söfnun í pólsku versluninni
Minimarket í Reykjavík og Keflavík á
laugardag og sunnudag.
Á meðal þess sem í boði verður í
söfnuninni verða tveir miðar á tón-
leika Deep Purple og köfun í Silfru,
svo eitthvað sé nefnt.
Sem fyrr segir á söfnun WOSP
sér stað víða í heiminum á sunnu-
daginn; fimmtán viðburðir hafa
verið skipulagðir í Bretlandi og
fimm í Bandaríkjunum.
„Auk Bretlands og Bandaríkj-
anna má nefna Afganistan, Belg-
íu, Austurríki, Frakkland, Írland,
Kanada, Litháen, Holland og Ítal-
íu og Þýskaland, en þar í landi
hafa verið skipulagðir sex viðburð-
ir,“ segir Magdalena Kowalonek að
lokum. n
kolbeinn@dv.is og kristjana@dv.is
36 Menning 11.–13. janúar 2013 Helgarblað
Heil þjóð
verður eitt
Sögu þessarar söfnunar má rekja aftur
til ársins 1993 þegar fjórir Pólverjar,
Jerzy Owsiak, Lidia Niedzwiedzka-
Owsiak, Bohdan Maruszewski, and
Piotr Burczyńsk, settu á laggirnar
góðgerðastofnunina Wielka Orkiestra
Swiatecznej Pomocy, WOSP, með það
fyrir augum að vernda heilsu og líf
barna með því að
útvega almenn-
ingssjúkrahúsum
nauðsynlegan
tækjakost. Nafn
stofnunarinnar skír-
skotar til jólaandans og
góðverka um jólin.
n „Tákn stofnunarinnar er hjarta og hef-
ur verið allar götur frá stofnun hennar
og allir sem styðja söfnunina fá límmiða
í formi rauðs hjarta. Í Póllandi skartar
nánast hvert einasta mannsbarn slíku
hjarta þann dag og má segja að í því
felist sá boðskapur að þann dag sé
pólska þjóðin sem ein manneskja,“ segir
Magdalena Kowalonek, skipuleggjandi
söfnunarinnar á Íslandi.
Í Póllandi og annars staðar þar sem
Pólverjar búa flykkjast sjálfboðaliðar
á götur út með söfnunarbauka og
víða stofnað til samkoma tengdum
söfnuninni.
n Á meðal þess sem WOSP hefur látið
sig varða má nefna hjartaaðgerðir á
börnum, meðferð krabbameins í börn-
um, háls-, nef- og eyrnalækningar og
fæðingargalla hjá börnum. Árleg söfnun
WOSP er styrkt af einstaklingum auk
fjölda fyrirtækja víða í heiminum.
Frá upphafi söfnunarátaks WOSP hefur
stofnuninni tekist að safna um 170
milljónum Bandaríkjadala.
Kærleikur þekkir
engin landamæri
n Íslenskir tónlistarmenn og Pólverjar taka höndum saman n Safna fé fyrir veik börn í Póllandi
Myrra Rós og Danimal
Túruðu um Pólland og
leggja söfnuninni lið.
MynD sigTRyggUR aRi
Þórunn antonía Er á meðal íslensku
tónlistarmannanna sem styðja við söfnun
WOSP.
Íris Þórarins Söngkonan slóst í hóp
tónlistarmannanna íslensku.
skipuleggjandi söfnunarinnar á
Íslandi Magdalena Kowalonek skipuleggur
söfnunina, sem nú er haldin í þriðja skipti á
Íslandi.