Dagblaðið Vísir - DV - 19.08.2014, Blaðsíða 4

4 Fréttir Vikublað 19.–21. ágúst 2014
Fjölbreyttar vörur
í öllum litum fyrir
bæjarhátíðina!
FAXAFEN 11 • 108 REykjAvík • 534-0534
Hjónin fengu að
sameinast á ný
n Samuel hefur loksins fengið vilyrði um dvalarleyfi n Kom til Íslands á föstudag
S
em betur fer er þessari baráttu
lokið,“ segir Dagný Alberts-
dóttir, eiginkona Samuels
Eboigbe Unuko frá Nígeríu,
en hann hefur fengið dvalar-
leyfi á Íslandi eftir langa baráttu við
kerfið. DV hefur fjallað um mál þeirra
Dagnýjar og Samuels síðustu misseri
en hann kom hingað til lands í des-
ember 2011 sem hælisleitandi en var
vísað til Svíþjóðar síðastliðinn nóv-
ember á grundvelli Dyflinnarreglu-
gerðarinnar. Þau giftu sig þar ytra í
janúar en hafa verið meira og minna
aðskilin síðan þá vegna þess langa
tíma sem það hefur tekið að fá dval-
arleyfi fyrir Samuel.
„Hann kom bara heim á föstu-
daginn,“ segir Dagný sem er mik-
ið létt vegna þessarar nýlegu niður-
stöðu Útlendingastofnunar. Hún
reyndi ýmislegt til þess að flýta fyr-
ir meðferð málsins og færði meðal
annars lögheimili sitt til Svíþjóðar í
þeirri von að þar myndi málið ganga
hraðar fyrir sig. Hún segist hafa
fengið afar misvísandi skilaboð frá
Útlendingastofnun sem hafi flækt
málin enn frekar. Þrátt fyrir að
Samuel hafi loks fengið dvalarleyfi
á Íslandi sé það háð þeim skilyrð-
um að hún flytji lögheimili sitt aftur
til Íslands og að hann skili inn nýrri
passamynd. „Ég er búin að færa lög-
heimilið mitt og Samuel er að vinna í
því að skila inn myndinni þannig að
þetta endaði heldur betur vel.“
Kærkomnar fréttir
DV greindi frá því þann 15. júlí að
Samuel hefði verið synjað um dval-
arleyfi á Íslandi. Í ákvörðunarorð-
um Útlendingastofnunar sem bárust
Dagnýju kom fram að umsókn hans
uppfyllti ekki skilyrði um að framfær-
sla, sjúkratrygging og húsnæði hans
yrði tryggt hér á landi. Dagný furðaði
sig á þessu: „Þetta er allt hið undar-
legasta mál enda hef ég þegar sýnt
fram á mun hærri framfærslu en lág-
markið segir til um.“
Þá sagðist hún orðin langþreytt á
því að reka sig á veggi hjá útlendinga-
yfirvöldum. „Mér er algjörlega mis-
boðið, ég er alveg búin að fá nóg.“
Hjónin fóru fram á endurupptöku á
málinu sem varð á endanum til þess
að Samuel fékk loks fyrrgreint dval-
arleyfi í upphafi þessa mánaðar. Dag-
ný segir að Samuel hafi þá verið bú-
inn að fá þau skilaboð úti í Svíþjóð
að hann yrði sendur til Nígeríu í lög-
reglufylgd en þar óttast hann um líf
sitt. Hún segir fréttirnar því hafa ver-
ið kærkomnar: „Þetta var eiginlega of
gott til þess að vera satt.“
Í skuld við ríkissjóð
DV hefur fjallað ítarlega um mál
þeirra hjóna að undanförnu en sem
fyrr segir giftu þau sig úti í Svíþjóð
í janúar síðastliðnum. Samuel kom
til Íslands í desember 2011 og sótti
um hæli sem flóttamaður. Mál hans
var aldrei tekið efnislega fyrir og að
endingu staðfesti Hæstiréttur Íslands
úrskurð Útlendingastofnunar um að
honum skyldi vísað úr landi á grund-
velli Dyflinnarreglugerðarinnar.
Hann var handtekinn og fluttur
úr landi í nóvember í fyrra. Þá var
honum gert að afhenda aleigu sína
ellegar skrifa undir skuldaviðurkenn-
ingu og skuldbinda sig þannig til þess
að greiða 197 þúsund krónur fyrir
flutning og fylgdarmenn. Hann valdi
síðari kostinn og var því í skuld við
ríkissjóð þar til nýlega sem þau Dag-
ný greiddu skuldina en það var ein af
forsendunum fyrir dvalarleyfi.
Hún er forviða yfir þeirri
framkomu sem hún og eiginmað-
ur hennar hafa orðið fyrir af hálfu
íslenska ríkisins síðustu mánuði.
„Viðhorfið sem hefur mætt okkur hjá
þessum stofnunum er bara svo ótrú-
lega ómannlegt.“
Bjartari tímar
„Ég hef verið á Íslandi í tvö ár, unnið
fyrir mér, eignast kærustu sem hef-
ur reynst mér svo vel og á í raun nýja
fjölskyldu. Mér fannst ég loksins vera
búinn að öðlast friðsælt líf þegar
ákveðið var að taka það allt frá mér á
einu bretti,“ sagði Samuel í samtali við
DV í júní. Hann er að vonum ánægð-
ur með hina langþráðu niðurstöðu
enda hefur hann þurft að láta lítið fyr-
ir sér fara hjá vini sínum í Svíþjóð síð-
ustu mánuði. Þau Dagný kynntust í
Hjartagarðinum á fjölmenningardegi
Reykjavíkur sumarið 2012 og vörðu
öllum stundum saman þar til honum
var vísað úr landi. Þau sjá því fram á
bjartari tíma.
Mál Dagnýjar og Samuels svipar
til mála sem fjallað var um í fjölmiðl-
um í maí síðastliðnum. Þannig var
Hassan Al Haj, eiginmanni Margrétar
Láru Jónasdóttur, til að mynda vísað
úr landi á grundvelli Dyflinnarreglu-
gerðarinnar þrátt fyrir að þau væru
gift. Hassan fékk síðar að snúa aftur
til Íslands eftir baráttu þeirra hjóna
við Útlendingastofnun en þau lýstu
samskiptum sínum við stofnunina á
svipaðan hátt og Dagný og Samuel.
Skilaboðin hefðu verið misvísandi og
erfitt að vita nákvæmlega hvað þau
þyrftu að gera til þess að fá að sam-
einast á ný. n
Jón Bjarki Magnússon
jonbjarki@dv.is
„Þetta var eigin-
lega of gott til
þess að vera satt
Sameinuð
á ný Dagný
og Samuel sjá
fram á bjartari
tíma nú þegar
hann hefur
fengið vilyrði
um dvalarleyfi
á Íslandi.
Þrýst á Árna
að hætta strax
Árni Þór Sigurðsson hefur sagt
af sér sem þingmaður Vinstri
hreyfingarinnar græns fram-
boðs en það gerði hann með
bréfi til flokksmanna og fjöl-
miðla á mánudag. Sem kunn-
ugt er hefur Árni Þór verið
skipaður sendiherra af Gunnari
Braga Sveinssyni utanríkis-
ráðherra. Sú skipan hefur hins
vegar verið afar umdeild líkt
og DV hefur fjallað um, ekki
síst innan þingflokks Vinstri
grænna. Árni Þór gerist ekki
sendiherra fyrr en eftir ára-
mót og herma heimildir DV
að hann hafi hugsað sér að
sitja sem þingmaður þangað
til. Árni mun hins vegar hafa
fengið skýr skilaboð frá flokks-
forystunni um að það væri
hreinlega ekki í boði. Má því
segja að Árna hafi verið bol-
að út eftir að hafa gert VG, það
sem margir segja vera, póli-
tískan óleik. Eins og fram kom
í umfjöllun DV um málið þá
kom sú ákvörðun Árna að taka
sendiherrastöðuna stjórnend-
um og þingflokki VG í opna
skjöldu, þótt vitað hafi verið
að hann hafi leitað sér að út-
gönguleið úr stjórnmálum um
nokkra hríð. Eins og flestum er
kunnugt var Geir H. Haarde,
fyrrverandi forsætisráðherra
Sjálfstæðisflokksins, einnig
skipaður sendiherra og vilja
margir meina að sú ákvörðun
Árna að þiggja boð Gunnars
Braga hafi auðveldað þeim síð-
astnefnda að skipa Geir.
Efla starfsemi á landsbyggðinni
Ný yfirstjórn RÚV hyggst snúa við skertri starfsemi á landsbyggðinni
R
ÚV ætlar að efla starfsemi
sína á landsbyggðinni á næstu
misserum, með því að efla
starfsstöð sína á Akureyri, að
því er segir í tilkynningu frá stofnun-
inni. Þar segir að fram undan verði
unnið við endurskipulagningu, þró-
un og uppbyggingu til framtíðar á
starfsemi RÚV utan höfuðborgar-
svæðisins.
Starfsemi RÚV á Akureyri var
skert að miklu leyti árið 2010, en þá
var svæðisútvarp lagt niður þar. Mál-
ið vakti hörð viðbrögð meðal margra,
sem töldu að aðgerðirnar hefðu í för
með sér skerta athygli á landsbyggð-
ina í dagskrárgerð og fréttaflutningi
RÚV.
En svo virðist sem ný yfirstjórn
RÚV hyggist snúa þessari þróun við
og í því samhengi hefur RÚV ákveðið
að auglýsa stöðu svæðisstjóra RÚV á
Akureyri lausa til umsóknar. Svæð-
isstjórinn mun leiða þær breytingar
sem fram undan eru á starfsemi RÚV
á landsbyggðinni.
„Hlutverk svæðisstjóra á Akur-
eyri er með nokkuð breyttu sniði en
hlutverk stöðvarstjóra var áður þar
sem svæðistjóri mun stýra starfsemi
RÚV á Akureyri sem og starfsemi
á landsbyggðinni,“ segir í tilkynn-
ingunni. Þar segir að í starfinu felist
meðal annars ábyrgð á fréttaflutn-
ingi og dagskrárgerð svæðisstöðva í
sjónvarpi, útvarpi og á vefnum. Ýms-
ar breytingar eru áformaðar, meðal
annars verður lögð aukin áhersla á
miðlun svæðisbundinna frétta á vef
RÚV.
RÚV er með fréttamenn og
fréttaritara í öllum landshlutum en
starfsfólki RÚV á landsbyggðinni
hefur fækkað umtalsvert á síðustu
árum. Endurskipulagning starfsem-
innar á Akureyri er fyrsta skrefið í að
efla þessa starfsemi á ný. n
RÚV Yfirstjórn RÚV hyggst efla starfsemi
sína á landsbyggðinni á ný.