Ritröð Guðfræðistofnunar - 01.09.2008, Qupperneq 162

trúleysishugtakið.32 Öllu máli skiptir þó í þessu samhengi hvernig McGrath
skilur hugtakið.
Megin forsendan í greiningu McGraths á guðleysi er sú að það er trúarlegt
og hafnar hann því að afstaða Dawkins og fylgismanna hans til Guðs hafi
ekkert með trú að gera. I bókinni Daivkins’ God: Genes, Memes and the
Meaning of Life segir McGrath t.d.: „Sú hugmynd að guðleysi sé tegund
trúar veldur engum vandamálum. Það jafngildir litlu meira en að fullyrða
það sem allir vita að er rétt: Að oftast verða ekki færðar sönnur á það sem
skiptir raunverulegu máli í lífinu. Engum mun takast að útkljá spurninguna
um tilvist Guðs með fullkominni vissu. ... Það er ekki hægt að sanna þetta
með vísindalegum hætti ,..“33 Þetta sjónarmið áréttaði McGrath jafnframt
í fyrirlestri sínum og svörum við fyrirspurnum í Hátíðarsal Aðalbyggingar
Háskóla íslands skömmu áður en hann áritaði nýútkomna íslenska þýðingu
bókarinnar en þar lýsti hann m.a. sjálfum sér á sínum yngri árum sem
trúuðum marxískum guðleysingja. Það er því ekki rétt sem fram kemur
á bakkápu íslensku bókarinnar að McGrath hafi sjálfur verið „trúleysingi
á yngri árum“ og enn síður er það rétt sem fram kemur í gegnum alla
íslenska þýðingu bókarinnar að hann sé þar að fjalla um trúleysi Dawkins
og skoðanasystkina hans.
Það er bagalegt að íslensk þýðing bókarinnar skuli með þessari röngu
hugtakanotkun gjörbreyta málflutningi höfundarins og láta hann halda því
fram sem hann andmælir á frummálinu. Klúðrið er slíkt að íslensk þýðing
bókarinnar er ónothæf og væri best að öll eintök hennar væru tekin úr
dreifingu og hún endurprentuð í leiðréttri útgáfu því að það er virkileg þörf
á henni fyrir íslenska lesendur.
32 Sennilega ganga íslenskar orðabækur sem þýða enska hugtakið „atheism" sem „trúleysi" eingöngu
út frá harla þröngri skilgreiningu á trúarhugtakinu. Það breytir því samt ekki að þýðingin er
röng eins og sýnt er fram á í þessari grein. Dæmi um orðabók sem þýðir hugtakið rangt með
þessum hætti er ensk-íslensk orðabók Arnars og Örlygs. (Sören Sörensson: Ensk-íslensk orðabók
með alfrœðilegu ivafi. Örn og Örlygur. Reykjavík. 1984. Bls. 60.)
33 McGrath, Alister E.: Dawkins’ God. Genes, Memes and the Meaning of Life. Blackweil. Oxford.
2005. BIs. 96.
160