Bændablaðið - 12.02.2015, Page 2
2 Bændablaðið | Fimmtudagur 12. febrúar 2015
Gríðarlegur vöxtur í kjötinnflutningi
Árið 2014 jókst innflutningur á kjöti
samkvæmt innflutningsskýrslum
um 38% frá fyrra ári.
Þegar litið er fimm ár aftur
í tímann er aukningin 277%.
Langmest aukning varð í innflutningi
nautgripakjöts eða sem nemur
8,5-földun á magni á fimm árum.
Svínakjötsinnflutningur hefur
aukist um 351% á sama tíma og
alifuglakjötsinnflutningur um 155%.
Ekki er nóg með að innflutningur
hafi aukist að magni heldur hefur
hlutdeild hans í neyslu þessara
kjöttegunda hér innanlands einnig
vaxið hröðum skrefum. Árið 2010
nam hann 6% af neyslu þessara
þriggja kjöttegunda en 21% árið
2014.
Verðmæti þessa innflutnings
komið að hafnarbakka hér á Íslandi
(cif) árið 2014 nam alls 1.611,5 millj.
kr. Þar af var verðmæti innflutts
nautakjöts 912 millj.kr., svínakjöts
271,5 millj. kr. og kjúklingakjöts
428 millj. kr.
Þegar nánar er rýnt í
innflutningstölur má sjá frá hvaða
löndum kjöt er flutt inn til Íslands.
Þær upplýsingar er áhugavert
að setja í samhengi við tölur
um lyfjanotkun frá Evrópsku
lyfjastofnuninni (EMA – European
Medicine Agency). Lyfjanotkun er
lýst með PCU (Population correction
unit) sem mælir lyfjanotkun á massa
(þyngd) búfjár.
Stofnun gefur árlega út skýrslu um
lyfjanotkun í Evrópu. Meðfylgjandi
töflur sýna lyfjanotkun í nokkrum
löndum, m.a. þeim sem mest er flutt
inn af kjöti frá til Íslands.
Hér er aðeins horft til fjögurra
búgreina, þ.e. þeirra sem mest er
neytt af kjöti af.
Minnst lyfjanotkun á Íslandi
Lyfjanotkun er minnst í Noregi
mælt á massa dýra samkvæmt
EMA en næstminnst á Íslandi.
Heildarlyfjanotkun er hins
vegar minnst á Íslandi. Í þessum
samanburði er lyfjanotkun á Íslandi
mælt í mg/PCU aðeins 2% af því
sem gerist á Spáni og 3% af því sem
gerist í Þýskalandi. Þá notar Ísland
innan við 1% af því magni sem Danir
og Hollendingar bera í sitt búfé en
landið er 2,5 sinnum stærra.
Dapurleg niðurstaða fyrir
íslenska neytendur
Erna Bjarnadóttir, aðstoðar-
framkvæmdastjóri Bændasamtaka
Íslands, segir þessa niðurstöðu vera
dapurlega fyrir íslenska neytendur.
„Stærstur hluti innflutts kjöts kemur
frá mesta lyfjanotanda í landbúnaði
í Evrópu samkvæmt skýrslu EMA.
Holland, lítið land að flatarmáli,
er 12 stærsti lyfjanotandinn. Hefur
íslensk verslun ekki meiri metnað
en þetta, eða er hún einfaldlega að
mæta kröfum forkólfa neytenda sem
telja innflutning kjötvara eitt stærsta
hagsmunamál þeirra?“ /HKr.
Fréttir
Lyfjanotkun við kjötframleiðslu getur skipt miklu máli fyrir heilsu manna:
Læknar um allan heim vara
við sýklalyfjaónæmi
Læknar um allan heim hafa
árum saman varað við ofnotkun
sýklalyfja. Það á bæði við beina
notkun einstaklinga og notkun
sýklalyfja við dýraeldi og sem
vaxtahvetjandi efnis.
Samkvæmt upplýsingum
Evrópumiðstöðvar sjúkdóma varna
ECDC látast um 25.000 Evrópubúar
árlega vegna sýklalyfjaónæmis.
Sýklalyfin virka einfaldlega ekki til
að meðhöndla sjúkdóma þessa fólks
og þessi vandi fer ört vaxandi. Það
sem hefur þó valdið sprengingu í
áunnu ónæmi fólks fyrir sýklalyfjum
er þó talið vera ofnotkun þeirra sem
vaxtarhvata í landbúnaði víða um
heim, aðallega við eldi á nautgripum,
kjúklingum og svínum. Um 70 til
80% af öllum sýklalyfjum fara til
notkunar í landbúnaði. /HKr.