Morgunblaðið - 12.08.2015, Blaðsíða 31

MENNING 31
MORGUNBLAÐIÐ MIÐVIKUDAGUR 12. ÁGÚST 2015
Helgi Snær Sigurðsson
helgisnaer@mbl.is
Jazzhátíð Reykjavíkur hefst í dag kl.
17 með djassgöngu niður Laugaveg
að Hörpu þar sem hátíðin verður
haldin fram á sunnudag, 16. ágúst.
Gangan hefst við plötuverslunina
Lucky Records við Hlemm og eru all-
ir sem hljóðfæri geta valdið hvattir til
að mæta og spila með, eins og segir í
tilkynningu frá skipuleggjendum.
Hátíðin er sú 26. í röðinni og í ár er
lögð áhersla á nýsköpun, íslenska út-
gáfu og samstarfsverkefni innlendra
og erlendra djasstónlistarmanna.
Sérstök áhersla er auk þess lögð á
konur í djasstónlist í tilefni af því að
100 ár eru liðin frá því að konur hlutu
kosningarétt hér á landi. Af þeim tón-
listarkonum sem fram koma á hátíð-
inni í ár má nefna, úr hópi innlendra,
píanóleikarana Sunnu Gunnlaugs-
dóttur og Önnu Grétu Sigurðar-
dóttur, sellóleikarann Þórdísi Gerði
Jónsdóttur, fiðluleikarann Kristínu
Þóru Haraldsdóttur, söngkonurnar
Ingridi Örk Kjartansdóttur, Stínu
Ágústsdóttur, Heiðu Árnadóttur,
Stefaníu Svavarsdóttur og Ragnheiði
Gröndal og á meðal erlendra tónlist-
arkvenna eru þýski saxófónleikarinn
Angelika Niescier, bandaríski
trommuleikarinn Allison Miller, pía-
nóleikarinn Carmen Staaf og fiðlu-
leikarinn Jenny Scheinman.
Lokatónleikar hátíðarinnar, haldn-
ir á sunnudaginn kl. 16, eru tileink-
aðir Louis Armstrong, í tilefni af því
að í ár eru 50 ár liðin frá því að Arms-
trong hélt tónleika í Háskólabíói. Á
lokatónleikunum verða leikin mörg af
þekktustu lögum Armstrongs og efni
frá upphafi ferils hans og mun djass-
spekingurinn og -rýnirinn Vern-
harður Linnet fræða tónleikagesti
um djassgoðsögnina miklu.
Hátt í 100 listamenn
20 tónleikar eru á dagskrá hátíðar-
innar og fara þeir fram í Norður-
ljósum og í Silfurbergi. Hátt í 100
listamenn koma fram á þeim, þar af
um þriðjungur erlendur, og einnig
verða haldnir opnir fjölskyldutón-
leikar og daglegar gleðistundir kl. 17
á Budvarsviðinu á efstu hæðum
Hörpu. Gleðistundirnar felast í kynn-
ingum á dagskrárliðum og spuna-
stundir verða einnig haldnar daglega
í dagskrárlok, kl. 23. Á þeim munu
flytjendur leika af fingrum fram og er
aðgangur ókeypis eins og á gleði-
stundirnar og fjölskyldutónleikana. Í
heildina eru viðburðir hátíðarinnar
því 29 talsins og ljóst að mikil djass-
veisla er framundan í Hörpu.
Átta útgáfutónleikar verða haldnir
á hátíðinni, á þeim frumflutt nýtt efni
sem innlendir og erlendir tónlistar-
menn hafa unnið í sameiningu. Tríó
Sunnu Gunnlaugsdóttur, Mógil, Scott
McLemore ásamt Hilmari Jenssyni
og Angeliku Niescier, Jónsson&-
More, Sigurður Flosason, Leifur
Gunnarsson, Ásgeir Ásgeirsson og
Tómas R. Einarsson ásamt Ómari
Guðjónssyni munu öll kynna nýjar út-
gáfur sem bera mikilli grósku í ís-
lenskum djassi vitni.
Ari Daníelsson situr í stjórn hátíð-
arinnar og segist aðspurður ekki vita
til þess að jafnmargir útgáfutónleikar
hafi verið haldnir áður á djasshátíð-
inni. „Ég get ekki fullyrt það en ég
held að þetta sé óvenjumikið,“ segir
hann. Spurður að því hvort djass-
tónlistarmenn reyni að halda útgáfu-
tónleika sína á hátíðinni segist Ari
telja svo vera. Hátíðin sé kjörinn vett-
vangur til að kynna nýja tónlist.
Forvitnileg samstarfsverkefni
-Samstarfsverkefni innlendra og
erlendra tónlistarmanna eru mikil-
vægur hluti af hátíðinni. Getur þú
nefnt mér nokkur slík forvitnileg á
þessari hátíð?
„Já, ég get t.d. nefnt samstarf Sig-
urðar Flosasonar og Hans Olding,
sem er sænskur gítarleikari. Þeir
deila ástríðu fyrir brasilískri tónlist,
verkefni þeirra er tileinkað rytmískri
brasilískri tónlist. Þýski saxófónleik-
arinn Angelika Niescier kannar
landamæri djassins með rytmíska
gítarleikaranum Hilmari Jenssyni og
bandaríska trommuleikaranum Scott
McLemore sem er búsettur hér á
landi. Svo er Árni Heiðar Karlsson
píanóleikari í mjög áhugaverðu sam-
starfi með tveimur Finnum; Joakim
Berghall sem er geysiþekktur, ungur
saxófónleikari og píanóleikaranum
Joona Toivanen. Þeir spila tríó með
tveimur píanóum sem er óvenjuleg
hljóðfærasamsetning,“ segir Ari og
nefnir einnig bassaleikarann Frey-
stein Gíslason sem leiðir kvartettinn
Sons of Gíslason.
-Þetta verður fjölbreytt hátíð?
„Já, mjög fjölbreytileg. Við erum í
rauninni að skoða allt frá gömlum
djassi, frá fyrstu árum Louis Arm-
strong á þriðja áratugnum, svona
gamaldags gítar „swing“ í anda
Django Reinhardt, hefðbundinn meg-
instraumsdjass og norrænan djass til
framúrstefnulegs nútímadjass. Þetta
er því tónlistarlega breið hátíð.“
Duglegir Íslendingar
Jazzhátíð Reykjavíkur stendur fyr-
ir komu erlendra hljómsveita og í ár
leika á hátíðinni djasstónlistarmenn
frá Noregi, Ítalíu og Bandaríkjunum.
Bandaríski trommuleikarinn Allison
Miller kemur fram ásamt hljómsveit
sinni Boom Tic Boom, ítalski píanó-
leikarinn Kekko Fornarelli kemur
fram með tríói sínu og trompetleikar-
inn Mathias Eick, ein skærasta djass-
stjarna Noregs, heldur tónleika með
kvintetti sínum.
„Miller er mjög þekktur trommu-
leikari og með henni eru þrír tón-
listarmenn, þar af tvær konur. Mathi-
as Eick er ein af stóru stjörnunum í
evrópskum djassi. Hann er mjög
þekktur og gefur út hjá ECM sem er
afar þekkt þýskt djassútgáfufyrir-
tæki. Fornarelli er ungur píanóleikari
sem kemur með tríóið sitt,“ segir Ari,
beðinn um frekari upplýsingar um
tónlistarmennina þrjá. Hann segir
aðra erlenda tónlistarmenn hátíðar-
innar koma á vegum íslenskra tónlist-
armanna sem þeir eigi í samstarfi við.
„Það má segja að innlendu djass-
tónlistarmennirnir geri framkvæmd
og skipulag svona hátíðar mun auð-
veldara en ella með því að vera jafn-
duglegir og þeir eru,“ segir Ari að
lokum.
Allt frá Louis Armstrong yfir í
framúrstefnulegan nútímadjass
 Jazzhátíð Reykjavíkur, sú 26. í röðinni, hefst í dag  Sérstök áhersla lögð á konur í djasstónlist
 Djasstónlistarmennirnir Allison Miller, Kekko Fornarelli og Mathias Eick meðal erlendra gesta
Trommuleikari Allison Miller er þekktur bandarískur trommuleikari. Hún leikur í Norðurljósum, föstudagskvöldið
14. ágúst kl. 21, með hljómsveit sinni Boom Tick Boom. Hljómsveitina skipa þrjár konur og einn karl.
Stjarna Trompetleikarinn Mathias Eick er ein af stóru stjörnunum í evr-
ópskum djassi og er á samningi hjá hinu virta djassútgáfufyrirtæki ECM.
Projeto Brazil Sigurður Flosason, Hans Olding, Þorgrímur Jónsson, Þórdís
Gerður Jónsdóttir og Ola Bothzén leika rytmíska, brasilíska tónlist.
Frekari upplýsingar um hátíðina
má finna á vefsíðu hennar,
reykjavikjazz.is.