Morgunblaðið - 25.11.2015, Qupperneq 30

30 MENNING
MORGUNBLAÐIÐ MIÐVIKUDAGUR 25. NÓVEMBER 2015
Eftir að Listahátíð í Reykjavík lýk-
ur næsta vor munu listunnendur
bíða í tvö ár eftir næstu hátíð, þar
sem ákveðið hefur verið að Listahá-
tíð verði tvíæringur á ný, eins og
hún var fyrstu áratugina.
Listahátíð í Reykjavík var hleypt
af stokkunum árið 1970 og var
haldin á tveggja ára fresti til ársins
2005 en síðan hefur hún verið hald-
in á hverju vori. Á fjölmennum árs-
fundi hátíðarinnar á dögunum var
afráðið að hefja undirbúning að því
að breyta henni í tvíæring að nýju. Í
tilkynningu frá skrifstofu Listahá-
tíðar segir að markmiðið með
breytingunni sé að „efla hátíðina
frá listrænu og rekstrarlegu sjón-
arhorni og undirstrika vægi hennar
og hlutverk í íslensku listalífi.Um
málið hefur m.a. verið fjallað í sam-
ráðshópi stjórnar Listahátíðar og
Fulltrúaráðs undanfarið ár en hann
skipa fulltrúar þeirra liststofnana
og samtaka listamanna sem eiga
aðild að ráðinu“.
Sérstök rödd hátíðarinnar
Kjartan Örn Ólafsson sem verið
hefur formaður stjórnar Listahátíð-
ar, fyrst árin 2010-2012 og aftur
2014-2015, hefur nú látið af stjórn-
arsetu. Þórunn Sigurðardóttir tek-
ur við af honum sem stjórnar-
formaður Listahátíðar, skipuð af
ráðherra, en hún var listrænn
stjórnandi hátíðarinnar frá árinu
2000 til 2008 og stjórnarformaður
hennar árin 1996-1998.
Á fundinum kom fram í máli
Hönnu Styrmisdóttur, listræns
stjórnanda Listahátíðar, að á síð-
ustu hátíð í vor sem leið hafi 35 þús-
und mann sótt viðburðina á 26 dög-
um en um 400 listamenn tóku þátt í
yfir 60 viðburðum og sýningum.
Illugi Gunnarsson mennta- og
menningarmálaráðherra nefndi að
þrátt fyrir mikla aukningu á menn-
ingarviðburðum hér á landi hefði
tekist vel á síðustu árum að finna
Listahátíð réttan farveg þannig að
hún hefði sína sérstöku rödd og sér-
staka tilgang.
Listahátíð verður
tvíæringur á ný
Formaðurinn Þórunn Sigurðar-
dóttir verður stjórnarformaður
Listahátíðar í Reykjavík að nýju.
Silja Björk Huldudóttir
silja@mbl.is
„Þetta tímabil í Íslandssögunni hef-
ur alltaf heillað mig og ég spurði oft
ömmu hvernig hefði verið að búa í
Reykjavík á þessum árum,“ segir
Agnes Þorkelsdóttir Wild höfundur
og leikstjóri sýningarinnar Kate
sem frumsýnd verður í Tjarnarbíói
annað kvöld,
fimmtudag, kl.
20.
„Kate fjallar
um forboðin sam-
skipti breskra
hermanna og ís-
lenskra ung-
meyja í seinni
heimsstyröldinni
í Reykjavík.
Þetta er sögulegt
gamanleikrit.
Ytri ramminn byggist á sögulegum
viðburðum en persónur verksins og
framvindan öll er uppspuni,“ segir
Agnes, en í leikritinu er fylgst með
íslenskri fjölskyldu sem rekur
sjoppuna Florida á Hverfisgötu í
seinni heimsstyrjöldinni.
Jákvætt tíst frá Lyn Gardner
„Fjölskyldan fær unga munaðar-
lausa frænku sína frá Ólafsvík til
sín, en það er Kata. Dóttirin á heim-
ilinu, Selma, er uppreisnargjörn.
Báðar lenda í ástandinu svokallaða,
Kata verður ástfangin af ungum
hermanni meðan Selma sér herinn
sem leið til að komast frá Íslandi,“
segir Agnes, en með hlutverk Kötu
og Selmu fara Rianna Dearden og
Olivia Hirst, en aðrir leikarar sýn-
ingarinnar eru Chris Woodley og
Alex Dowding auk þess sem Agnes
stekkur inn í sýninguna. „Ein leik-
konan komst ekki með til Íslands og
þá var einfaldast fyrir mig að
stökkva inn í hlutverkið. Þetta er
sem betur fer minnsta kvenhlutverk
sýningarinnar,“ segir Agnes og við-
urkennir að hún sé með fiðrildi í
maganum. „Enda hef ég ekki leikið
stórt hlutverk á sviði í hálft annað
ár, þannig að þetta verða viðbrigði,“
segir Agnes.
Aðspurð nánar um tilurð verksins
segist Agnes hafa skrifað það á
námsárum sínum í Englandi, en
Agnes lauk þriggja ára leiklistar-
námi frá East 15 Acting School í
London árið 2013. „Mig langaði að
skrifa eitthvað íslenskt á ensku og
kynna Ísland fyrir Bretum. Ísland
er svo mikið í tísku, en þessi saga
týndist. Margir Bretar sem séð hafa
sýninguna vissu ekki að Bretland
hefði hernumið Ísland, meðan aðrir
áhorfendur áttu feður og afa sem
dvalið höfðu á Íslandi sem hermenn
í stríðinu,“ segir Agnes, en verkið
var fyrst sett upp á lokaári hennar í
skólanum þar sem samnemandi
hennar leikstýrði því.
„Þá var þetta sett upp sem stofu-
drama, en í framhaldinu breytti ég
textanum þannig að í dag er þetta
gamanleikrit með mikilli tónlist. Við
notum bæði íslensk þjóðlög og
bresk dægurlög sem fylgdu hernum
á sínum tíma, en leikararnir syngja
bæði á íslensku og ensku þó allur
leiktextinn sé leikinn á ensku,“ segir
Agnes og tekur fram að hún hafi
íhugað að þýða verkið yfir á ís-
lensku og æfa það upp með nýjum
leikhóp. „En síðan fannst mér bara
svo skemmtilegt að ljúka sýningar-
ferlinu með upprunalega leikhópn-
um hér á Íslandi. Það hefðu örugg-
lega margir ferðamenn gaman af
því að sjá sýninguna. Auk þess sem
flestir Íslendingar skilja ensku og
sýningin tekur ekki nema sextíu
mínútur í flutningi,“ segir Agnes og
bendir á að mjög mikið gerist á
þessari klukkustund. „Einhver hafði
á orði að ég ætti hreinlega að skrifa
sjónvarpsseríu upp úr verkinu, því
þetta væri svo efnismikið,“ segir
Agnes sem leikstýrði uppfærslu
verksins sem sett var upp á Fringe-
leiklistarhátíðinni í Edinborg í ágúst
2014 af leikhópnum Lost Watch sem
auk Agnesar er skipuð fyrrnefndum
Oliviu Hirst og Riönnu Dearden
sem voru með henni í leiklistarnám-
inu. „Sýningin var sýnd tæplega 30
sinnum í Edinborg og alltaf uppselt.
Í framhaldinu bauðst okkur að sýna
uppfærsluna á þremur stöðum í
London, þ.e. Greenwitch theatre,
New Diorama og Pleasance theatre
Islongton,“ segir Agnes og tekur
fram að viðtökur bæði áhorfenda og
gagnrýnenda hafi verið mjög já-
kvæðar. „Við fengum fjórar stjörn-
ur fyrir sýninguna í Edinborg hjá
bæði Entertainment Wise og A Yo-
unger Theatre auk þess sem Lyn
Gardner, leiklistargagnrýnandi
breska dagblaðsins The Guardian
tísti mjög jákvætt um sýninguna, en
hún er alveg óhrædd við að láta vita
ef henni mislíkar það sem hún sér.“
Brjálað að gera eftir
heimkomu
Kate er þriðja sýningin sem Lost
Watch setur upp, en hinar tvær eru
Play for September og Goodstock
eftir Oliviu Hirst sem Agnes leik-
stýrði einnig. Allar þrjár sýningar
hafa verið sýndar á leiklistarhátíð-
inni í Edinborg. Uppfærsla Kate á
Íslandi er unnin í samstarfi við leik-
hópinn Miðnætti sem auk Agnesar
er skipuð Sigrúnu Harðardóttur
tónlistarkonu og Evu Björgu Harð-
ardóttur leikmynda- og búninga-
hönnuði.
„Við unnum saman að uppsetn-
ingu söngleiksins Ronju hjá Leik-
félagi Mosfellssveitar,“ segir Agnes,
en sýningin var í vor sem leið valin
athyglisverðasta áhugaleiksýning
ársin og sýnd á Stóra sviði Þjóðleik-
hússins í júní sl. en með titilhlut-
verkið fór María Ólafsdóttir Euro-
visionfari.
„Við þrjár unnum líka sýninguna
Mæður Íslands hjá Leikfélagi Mos-
fellssveitar fyrr í haust,“ segir
Agnes, sem skrifaði það verk í sam-
vinnu við hópinn. „Ég er fædd og
uppalin í Mosfellsbæ og hafði starf-
að mjög mikið með leikfélaginu þar
áður en ég fór út í nám. Að námi
loknu ætlaði ég að búa áfram í
London og starfa með Lost Watch,
en eftir rúmt ár ákváðum við hjónin
að flytja aftur heim. Ég sé svo sann-
arlega ekki eftir þeirri ákvörðun,
því það er búið að vera brjálað að
gera hjá mér í leiklistinni,“ segir
Agnes, sem auk ofangreindra verk-
efna var aðstoðarleikstjóri í upp-
færslu Þjóðleikhússins á Í hjarta
Hróa hattar og hefur verið að kenna
leiklist.
Spurð hvað framundan sé hjá
henni segist Agnes m.a. vera að fara
að leikstýra sýningunni Aldanna
rokk hjá Thalíu, leikfélag Mennta-
skólans við Sund, og byggist á kvik-
myndinni Rock of Ages.
„Í febrúar munum við Sigrún og
Eva Björg síðan vinna barnasýn-
inguna Á eigin fótum þar sem við
vinnum með brúðu sem Eva Björg
hannar og tónlist sem Sigrún sem-
ur, en sýningin verður sennilega án
orða,“ segir Agnes og tekur fram að
breski brúðuleikarinn Sean Garratt
muni koma til landsins og veita
þeim leiðsögn í því að stjórna
brúðum sem stjórnað er af þremur
einstaklingum auk þess sem hann
verði með opið námskeið meðan
hann dvelur hérlendis.
Þess má að lokum geta að aðeins
verða sex sýningar á Kate í
Tjarnarbíói, þ.e. 26. og 27. nóv-
ember og síðan 3., 4., 5. og 6. desem-
ber kl. 20 öll kvöld.
„Fjallar um forboðin samskipti“
 Kate eftir Agnesi Wild í Tjarnarbíói
 Stekkur inn í sýninguna hérlendis
Agnes Þorkels-
dóttir Wild
Ljósmynd/Thomas Alexander
Viðbrigði Rianna Dearden leikur sveitastúlkuna Kötu sem verður ástfangin af breskum hermanni.
56 10 000
TAXI
BSR
Góð þjónusta
yfir 90 ár