Dagblaðið Vísir - DV - 09.02.2018, Síða 6

6 9. febrúar 2018fréttir
Óvinir
Íslands
n Þeir Þola
okkur ekki
Móðganir, lítilsvirðing og léleg framkoma.
Íslendingar hafa eignast sinn skerf af óvinum
í gegnum árin af ýmsum ástæðum. Við erum
staðföst þjóð, látum ekki vaða yfir okkur
á skítugum skónum og eigum það til að
móðgast þegar okkur finnst að okkur vegið.
Hér eru taldir upp þeir sem teljast eða hafa
talist til óvina Íslands á undanförnum árum
og áratugum. Þetta eru allt einstaklingar sem
hafa á einhverjum tímapunkti komið illa fram við
eitthvert okkar; móðgað eða lítillækkað okkur eða
vegið með einhverjum hætti að íslensku þjóðinni.
einar@dv.is
Steven L. Anderson
Af hverju? Segir Íslendinga bastarða og
konurnar hórur
Staða: Prestur í Faithful Word baptista­
kirkjunni í Arizona
Steven Anderson virðist mjög í nöp við Ís­
lendinga og hefur ítrekað talað illa um land
og þjóð. Hann á því nákvæmlega ekkert inni
hjá okkur. Anderson hefur meðal annars
kallað Íslendinga þjóð bastarða og gaf hann
út heimildamynd máli sínu til stuðnings ekki
alls fyrir löngu. Vísaði hann í að mörg börn fæðist
utan hjónabands og að hér á landi væri mjög hátt
hlutfall ógiftra mæðra. Bætti Steven um betur og
sagði meirihluta íslenskra kvenna vera hórur. Takk fyrir
það, Steven, en okkur bara líður ágætlega á Íslandi.
Símon Ott
Af hverju? Sagði að Íslendingar
myndu fara til helvítis
Staða: Predikari
Svisslendingurinn Símon Ott fór mikinn hér á
landi á haustmánuðum 2016 þegar hann kom til
Íslands. Fyrst lét hann til sín taka á Klambratúni
þar sem nemendur MH og Kvennaskólans voru
fyrir. Varð honum tíðrætt um samkynhneigð og
kynlíf fyrir hjónaband sem hann sagði að væri
synd. Síðar spurðist til hans í Hnífsdal þar sem
hann gekk um með skilti og hrópaði að fólki
að það ætti á hættu að fara til helvítis ef það
sneri sér ekki til frelsarans. Svo fór að Símon var
ákærður fyrir hatursorðræðu.
Santiago Ponzinibbio
Af hverju? Potaði í augun á Gunnari Nelson
Staða: UFC­bardagakappi
UFC­bardagakappinn Santiago Ponzinibbio er
ekki hátt skrifaður hjá íslensku þjóðinni eftir að
hafa beitt bellibrögðum til að leggja Gunnar
Nelson. Kapparnir mættust í fyrrasumar
og mátti Gunnar sætta sig við tap eftir
rothögg í 1. lotu. Síðar kom á daginn
að Ponzinibbio potaði ítrekað í augu
Gunnars meðan á bardaganum stóð.
Okkur þótti illa farið með okkar mann
– eðlilega kannski. „Það varð enginn
varanlegur skaði á augunum sem er mjög
gott. Ég var kannski heppinn með það
því þetta var frekar brútal að
sjá,“ sagði Gunnar í viðtali
nokkrum mánuðum
eftir bardagann.
Abraham Cooper
Af hverju? Hvatti gyðinga til
að sniðganga Reykjavík
Staða: Rabbíni Simon Wisenthal­
stofnunarinnar í Bandaríkjunum
Rabbíninn Abraham Cooper
virðist hafa horn í síðu Íslendinga
af ýmsum ástæðum. Fyrir það
fyrsta fór hann þess á leit árið 2012
að Ríkisútvarpið hætti að flytja
Passíusálma Hallgríms Péturssonar
á páskum. Skrifaði hann Páli Magn­
ússyni útvarpsstjóra bréf þess efn­
is. Taldi hann að í sálmunum væri
hallað mjög á gyðinga, í þeim væri
að finna margar neikvæðar tilvísan­
ir. Tveimur árum síðar, árið 2015,
hvatti hann gyðinga til að ferðast
ekki til Reykjavíkur. Ástæðan var sú
að meirihluti borgarstjórnar Reykja­
víkur vildi undirbúa og útfæra að
Reykjavíkurborg myndi sniðganga
ísraelskar vörur.
Paul Watson
Af hverju? Sökkti tveimur hvalveiðiskipum í Reykjavíkurhöfn
Staða: Stofnandi Sea Shepherd
Kanadamaðurinn Paul Watson hefur á undanförnum
áratugum gert Íslendingum lífið leitt. Watson, sem er
stofnandi Sea Shepherd, bar ábyrgð á því að sökkva tveimur
hvalveiðiskipum, Hval 6 og Hval 7, við Ægisgarð í Reykjavík
árið 1986. Þá voru skemmdir unnar á hvalkjötsvinnslunni í
Hvalfirði. Þessar gjörðir Pauls vöktu reiði meðal Íslendinga sem
eru ekki búnir að gleyma spellvirkjum aðgerðasinnans. Paul,
sem verður sjötugur innan fárra ára, hefur ítrekað gagnrýnt
Íslendinga fyrir hvalveiðar á undanförnum árum.