Skírnir - 01.04.2015, Qupperneq 36

endum (83%) styðja hana og hafði „stuðningur við ríkisstjórn aldrei
mælst hærri hjá Gallup frá upphafi mælinga haustið 1992“.36
Með orðum Guðjóns Friðrikssonar (2008: 35) á Ólafur Ragnar
„nú ágætt samstarf við ríkisstjórn Íslands undir forystu Geirs H.
Haarde, enda mun aðkoma forsetans að stjórnarmynduninni hafa
fallið núverandi forystu Sjálfstæðisflokksins vel í geð“. Í ítarlegri ára-
mótagrein forsætisráðherrans er m.a. lögð áhersla á einka væð ingu
orkufyrirtækja og útrás þeirra (Geir H. Haarde 2007). Hvorki í
stjórn arsáttmálanum né áramótagreininni er minnst á ályktanir lands-
funda Sjálfstæðisflokksins um að afnema „synjunarvald“ forsetans.
Forseti með sterkt umboð og vinsæl ríkisstjórn gengu því hönd
í hönd á vit útrásarinnar og annarra stórbrotinna verkefna, ekki síst
að tryggja kjör Íslands til sætis í öryggisráði Sameinuðu þjóðanna.37
Því kom engum á óvart að í nýársávarpi sínu 2008 lýsti forsetinn
yfir framboði til endurkjörs. Um hlutverk forsetans sagði Ólafur
Ragnar:
Embætti forseta Íslands var í öndverðu tákn um sigur fátækrar þjóðar og
kannski er eitt mikilvægasta hlutverk þess á okkar tímum fólgið í liðveislu
á vettvangi sjálfstæðisbaráttu nýrrar aldar, að gagnast ungu fólki í glímunni
um framtíðina og taka þannig þátt í að sannfæra sérhvern Íslending um að
besti kostur hans eða hennar sé að hafa ættjörðina að heimavelli, að helga
Íslandi heimili sitt og fjölskyldulíf. (Ólafur Ragnar Grímsson 2008a)
Forsetinn ítrekaði einnig enn og aftur að í sérhverju ríki verði
„ráðamenn nú að öðlast tiltrú ungra landa sinna, sannfæra nýja
kynslóð um að vænsta leiðin til velfarnaðar sé að halda tryggð við
ættjörðina. Íslendingar hafa verið lánsamir í þessum efnum. Unga
fólkið sækir nám og reynslu til annarra landa en leitar samt aftur
heim. Ýmsar aðrar þjóðir hafa aðra sögu að segja.“ Ólafur Ragnar
var ekki í neinum vafa um orsakir velgengni Íslands:
36 svanur kristjánsson skírnir
36 Sjálfstæðisflokkur fékk 36,6% atkvæða og 25 þingmenn en Samfylkingin 26,8%
atkvæða, 18 þingmenn. Skoðanakönnunin birtist á http://www.capacent.is/
frettir/nr/684.
37 Sbr. Kristín A. Árnadóttir 2009: 23.: „Forseti Íslands, Ólafur Ragnar Grímsson,
lagði framboðinu ötult lið frá miðju ári 2007 sem og ríkisstjórn Íslands sem lét
sig málið varða og fylgdist grannt með framgangi þess.“
Skírnir vor 2015.qxp_Layout 1 16.4.2015 15:46 Page 36