Saga - 2008, Qupperneq 177

félagsins. Rétt er að halda því til haga að valt er að treysta á minnið
eingöngu þegar rifja skal upp sögu félags 40–50 ár aftur í tímann.
Getur hver reynt það á eigin skinni og skal ekki fjölyrt um það frekar.
Þremenningarnir í sögunefndinni fullyrtu í Ármannsskjalinu að
félagið hefði starfað óslitið frá 1888 til 1914. Þetta álit sögðust þeir
meðal annars byggja á eftirfarandi:
1. Umsögnum velmetinna borgara um stofnun félagsins og
starf fram til 1906 og vottorðum þeim sem fylgja hér með.
2. Umsögnum blaða frá þessum tíma sem ber alveg saman við
það sem hinir fyrstu félagar Ármanns bera. …
3. Í blöðum frá 1906 sem þó hafa árin á undan getið um kapp-
glímur, er ekkert getið um að félagið sé stofnað 1906, þrátt
fyrir það þótt getið sé um stofnun annarra félaga sem ráku
áður óþekkta starfsemi.51
Um fyrsta atriðið hefur þegar verið fjallað og sýnt fram á hið
gagnstæða. Hvað hin tvö varðar er augsýnilegt að nefndarmenn
hafa ekki skoðað blöð þess tíma að neinu gagni, eins og þeir full-
yrða þó óhikað. Að öðrum kosti hlytu þeir að hafa rekið augun í
hinar fjölmörgu samtímaheimildir sem segja frá stofnun Íslendings
árið 1888 og Ármanns árið 1898.
Ármannsskjalið sem þremenningarnir afhentu stjórninni 22.
nóvember 1938 byggist í einu og öllu á frásögnum sexmenninganna
af löngu liðnum atburðum. Hvergi er vitnað í skráðar heimildir til
stuðnings enda virðast þær ekki vera fyrir hendi. Innihald þess var
samþykkt athugasemdalaust af stjórnarmönnum Ármanns sem til-
kynntu að félagið væri nú orðið 50 ára gamalt. Þannig eltist
Ármann í einu vetfangi um 17 ár og 23 daga. Þótti mörgum undar-
lega við bregða og mæltist þetta misjafnlega fyrir. Sigurjón Péturs -
son frá Álafossi, einn af stofnendum Ármanns 7. janúar 1906, var til
dæmis ekki sáttur við þessa þróun mála. Sigurjón afhenti Jens
Guðbjörnssyni formanni Ármanns verðlaunapeninga sína frá félag-
inu með þeim ummælum að fyrst hann væri ekki lengur talinn
meðal stofnenda Ármanns væri réttast að félagið hirti þessa minja-
gripi.52 Ekki fer sögum af viðbrögðum stjórnarmanna en 15. des-
ember 1938 heimsóttu þeir Helga Hjálmarsson og gerðu hann að
heiðursfélaga.53 Misjafnt var hlutskipti þessara manna. Sigurjón
goðsögnin um glímufélagið ármann 177
51 Ármannsskjalið, fylgibréf 1.
52 Viðtal. Höfundur við Gísla Halldórsson, fyrrv. forseta ÍSÍ, 2. jan. 2005.
53 Tíminn 17. des. 1938, bls. 316.
Saga haust 2008 nota:Saga haust 2004 - NOTA 25.11.2008 15:38 Page 177