Morgunblaðið - 08.05.2019, Blaðsíða 36

36 MENNING
MORGUNBLAÐIÐ MIÐVIKUDAGUR 8. MAÍ 2019
Eyjólfur Eyjólfsson
tenórsöngvari kemur
fram á Menningu á
miðvikudögum á há-
degistónleikum í
Salnum í dag sem
hefjast kl. 12.15. Á
tónleikunum mun
hann ekki aðeins
syngja heldur einnig
leika á langspil. Á efn-
isskránni eru Breið-
firðingavísur, íslensk,
frönsk og ensk þjóð-
lög, lög eftir Jórunni
Viðar en einnig spuni
Eyjólfs. Að lokum leikur og syngur Eyjólfur Ferðalok eftir Atla Heimi
Sveinsson sem lést nýverið. Tónleikarnir eru ókeypis og allir velkomnir.
Eyjólfur leikur á langspil og syngur
Fjölhæfur Eyjólfur Eyjólfsson með langspilið við höndina.
Höfundakvöld með Pivinnguaq Mørch verður haldið
í Norræna húsinu í kvöld kl. 19.30. „Mørch er einn
hinna ungu grænlensku höfunda sem hafa skipað
sér sess í grænlenskum bókmenntum með vel skrif-
uðum, krefjandi og samfélagsgagnrýnum verkum.
Hann flytur lesendur sína inn í heim sem þeir hafa
fram að því aðeins rennt grun í,“ segir í tilkynn-
ingu. Þar kemur fram að fyrsta verk Mørch, smá-
sagna- og ljóðasafnið Arpaatit qaqortut (Hvítu
hlaupaskórnir) er tilnefnt til bókmenntaverðlauna
Norðurlandaráðs 2019. Verkið er sagt fjalla um
áskoranir daglegs lífs þar sem ljóðmælandi og
sögumaður ferðast milli ólíkra stemninga og atburða í lífi fullorðins
manns.
Julia Isaksen stýrir umræðu sem fer fram á ensku og grænlensku.
Streymt er frá viðburðinum á vef Norræna hússins. Allir eru velkomn-
ir meðan húsrúm leyfir og er aðgangur ókeypis.
Höfundakvöld með Pivinnguaq Mørch
Pivinnguaq Mørch Álnabær
Allt fyrir gluggann… úrval, gæði og þjónusta.
Síðumúla 32, Reykjavík. S. 588 5900 ■ Tjarnargötu 17, Keflavík. S. 421 2061 ■ Glerárgötu 32, Akureyri. S. 462 5900 ■ alnabaer.is
PLÍ-SÓL GARDÍNUR
alnabaer.is
Þrjár gerðir: þunnar, með sólarvörn og myrkvunar.
Henta mjög vel í skáglugga og þakglugga.
Við erum sérhæfð í gluggatjöldum
Helgi Snær Sigurðsson
helgisnaer@mbl.is
„Líkt og flestir kvikmyndaunnendur
hreifst ég mjög ungur af kvikmynd-
um,“ segir Giorgio Gosetti, dagskrár-
stjóri Vitrana á Alþjóðlegri kvik-
myndahátíð í Reykjavík, RIFF,
þegar hann er spurður að því hvenær
áhugi hans á kvikmyndum hafi vakn-
að. Hann segist hafa hrifist af fram-
úrstefnulegum myndum heimalands
síns á áttunda áratugnum og sem
ungur maður stofnað kvikmynda-
hátíð ásamt tveimur vinum sínum í
heimabæ þeirra í nágrenni Feneyja.
Árið 1979 bauðst honum svo einstakt
tækifæri, að stýra verkefnum fyrir
kvikmyndahátíðina í Feneyjum, eina
þá virtustu í heimi.
Gosetti hefur setið í dagskrárnefnd
RIFF til fjölda ára og segir ekki
hlaupið að því að sníða dagskrá fyrir
viðamikla hátíð á borð við RIFF.
Kemur sér þá vel að hafa mann svo
hokinn af reynslu en af mörgum
störfum Gosetti má nefna að hann
stýrir Feneyjadögum, dagskrá á
kvikmyndahátíðinni í Feneyjum.
Ferilskrá þessa glaðbeitta Ítala er
löng og tilkomumikil, hann hefur
starfað sem blaðamaður frá árinu
1989, starfar nú sem menningar-
blaðamaður fyrir ítölsku fréttaveit-
una ANSA og störf hans tengd kvik-
myndum eru orðin æði mörg.
Hann hefur bæði skrifað um kvik-
myndir og starfað við kvikmynda-
tvíæringinn í Feneyjum og gegnt
stöðu aðstoðarstjórnanda alþjóðlegu
kvikmyndahátíðarinnar þar í borg.
Um nokkurra ára skeið var Gosetti
yfirmaður kynningarmiðstöðvar
ítalskrar kvikmyndagerðar, Filmi-
talia, og hann hefur einnig stýrt kvik-
myndahátíðinni í Róm, Rome Film
Festival, svo nokkur störf séu nefnd.
Himinlifandi að vera boðið
Gosetti segist hafa verið himinlif-
andi þegar Hrönn Marinósdóttir,
stjórnandi RIFF, bauð honum að
gerast dagskrárstjóri Vitrana fyrir
átta árum. Vitranir er keppnisflokkur
RIFF og hlýtur ein kvikmynd úr
honum aðalverðlaun hátíðarinnar,
Gullna lundann. Gosetti segir vissu-
lega mikið samstarf felast í því að
sníða dagskrá Vitrana hverju sinni og
oft snúið að sníða draumadagskrána.
Stundum sé ekki mögulegt að sýna
ákveðnar kvikmyndir, t.d. þegar þær
á að sýna á svipuðum tíma á öðrum
hátíðum, t.d. þeirri í San Sebastian.
Gosetti segir einnig þurfa að líta til
einkenna RIFF, karakters hátíðar-
innar, hvort tilteknar kvikmyndir
henti henni og passi við hana.
En hver er karakter RIFF, að
hans mati? „Tja, hann er mjög sér-
stakur og kallast á við karakter Ís-
lendingsins, að mínu mati, sem er
mjög forvitinn og með opinn huga. Að
vissu leyti eruð þið bíóunnendur, dug-
leg að fara í bíó en þó ekki bíófíklar.
Hafa ber í huga að RIFF er rótgróin
hátíð sem vekur athygli út fyrir land-
steinana og sýnir vel hversu skrítið
land Ísland er. Allt sem er nýtt,
snjallt, vitrænt og vinsælt fær að
njóta sín á hátíðinni,“ segir Gosetti.
Hátíðin hafi vaxið að gæðum með ár-
unum og fest sig í sessi sem mikil-
væg, alþjóðleg kvikmyndahátíð.
Kvikmyndagerðarmenn vilji gjarnan
sýna verk sín á RIFF og taki sýning-
arboðum fagnandi.
Ekkert ákveðið fyrirfram
Gosetti er spurður að því hvort
ákveðið þema sé í mótun fyrir RIFF í
ár og segist hann oft hafa fengið þá
spurningu. Svarið sé alltaf á sömu
leið, að ekki sé gengið út frá neinu
þema en þegar dagskráin sé full-
kláruð megi oft greina rauðan þráð í
umfjöllunarefnum myndanna. „Eitt
helsta markmið kvikmyndahátíða er
að sýna hvernig kvikmyndagerð
breytist og þróast,“ segir Gosetti en
þegar leitin hefjist að kvikmyndum sé
aðeins eitt markmið, að finna þær
vönduðu. „Þetta er eins og málverk,
þegar það er fullklárað áttar maður
sig á því að ákveðnir litir tengjast,
eiga eitthvað sameiginlegt.“
– Hversu margar kvikmyndir held-
urðu að þú horfir á árlega?
„Ég held að ég horfi sjálfur á um
500-600 myndir,“ svarar Gosetti og
bætir við að þeir sem hann starfi með
þurfi líka að horfa á mörg hundruð
kvikmynda á ári. En verður hann
aldrei þreyttur á því að horfa á kvik-
myndir? „Nei, það er sönn ánægja en
auðvitað sér maður líka margar léleg-
ar,“ segir Gosetti og hlær.
Avengers ekki fyrir RIFF
Og svo eru það kvikmyndirnar sem
Gosetti hrífst af en henta alls ekki
RIFF. „Avengers er frábær mynd en
hæfir ekki RIFF, að mínu mati,“ seg-
ir hann sposkur og á þar væntanlega
við nýjustu myndina um ofurhetju-
hópinn þekkta, Avengers: Endgame.
„Ég er aðdáandi Avengers-mynd-
anna,“ segir Gosetti og bendir á að
líkt og aðrar kvikmyndir geti ofur-
hetjumyndir komið ánægjulega á
óvart og verið heillandi ævintýri.
– Það er enda hægt að njóta kvik-
mynda af ólíkum ástæðum …
„Já, auðvitað og ég er allt í senn
venjulegur áhorfandi, dagskrárstjóri
og samningamaður,“ segir Gosetti.
Kona fer í stríð meistaraverk
– Hvað gerir kvikmynd góða?
Gosetti hlær. „Þetta er erfið spurn-
ing. Það er blanda nokkurra gæða-
þátta: hins óvænta, tilfinningar fyrir
samtímanum, fagmennsku og sterks
umfjöllunarefnis,“ svarar hann og
bætir við þeirri skilgreiningu að kvik-
mynd sé draumur sem varpað er á
tjald eða skjá.
– Áttu þér uppáhaldskvikmynd?
Gosetti virðist vera nokkuð hissa á
þessari spurningu og spyr á móti: Í
allri kvikmyndasögunni? Já, svarar
blaðamaður. „Vá, mér detta þrjár
myndir í hug,“ segir Gosetti og telur
upp: „Kvikmynd Orson Wells, Touch
of Evil … kvikmynd Sergio Leone,
Once Upon a Time in America eða
The Good, the Bad and the Ugly og
svo er það … Kona fer í stríð sem ég
tel vera meistaraverk. Hún var ein
óvæntasta kvikmynd ársins í fyrra og
ég er ekki bara að segja þetta af því
þú ert íslenskur,“ segir Gosetti og
hlær við.
Mikilvæg hæfileikasmiðja
Gosetti segir RIFF mikilvæga há-
tíð fyrir kvikmyndageirann og nefnir
þar einkum Talent Lab, fjölþjóðlega
kvikmyndasmiðju fyrir hæfileikafólk
sem haldin verður 1.-5. október. „Þar
er virkilega hægt að uppgötva hæfi-
leikafólk og upplifa sanna ástríðu fyr-
ir kvikmyndalistinni. RIFF er í ein-
stakri aðstöðu til að þróast og verða
mikilvægur vettvangur fyrir fagfólk,
hátíðin er ekki bara til þess gerð að
sjá ólíkar kvikmyndir og kynnast
ólíkum kvikmyndagerðarmönnum.“
Gosetti segir að lokum mikilvægt
að vera ungur í anda til að fá notið
kvikmynda til fulls. „Maður má ekki
vera gamall í anda,“ segir hann, léttur
í lund.
Frekari upplýsingar um RIFF má
finna á vef hátíðarinnar, riff.is.
Morgunblaðið/Halldór Kolbeins
Í sólskinsskapi Giorgio Gosetti með Hrönn Marinósdóttur, stjórnanda RIFF, í sólinni í Cannes fyrir átta árum.
Draumastarf bíófíkilsins
 Giorgio Gosetti, dagskrárstjóri Vitrana á RIFF, segir gæði aðalatriðið þegar kemur að vali kvik-
mynda á hátíðina  Tilviljanir valda því að þemu verða til  Mikilvægur vettvangur fyrir fagfólk