Fréttablaðið - 16.12.2002, Blaðsíða 18

18 16. desember 2002 MÁNUDAGUR
ÓLAFUR F. MAGNÚSSON
Pólitískt fjár-
hættuævintýri
Ólafur F. Magnússon, oddviti F-listans íborgarstjórn, segir að Reykjavíkur-
borg myndi taka allt of mikla áhættu með
því að taka þátt í
byggingu Kárahnjúka-
virkjunar. Um sé að
ræða tugmilljarða
skuldbindingu.
„Ég hef haldið uppi
andófi gegn Kára-
hnjúkavirkjun innan
borgarstjórnar alveg
stöðugt og flutt marg-
ar tillögur og lagt
fram margar bókanir
um málið,“ segir Ólafur. „Ég tel að með
því að hamra járnið stöðugt sé það farið
að skila þeim árangri að borgaryfirvöld
séu farin að horfast í augu við staðreynd-
ir á borð við þá að fjárhagslega áhættan
er allt of mikil miðað við hugsanlegan
ávinning, sem að mínu mati yrði líklega
minni en enginn.“
Ólafur segir að með því að taka þátt í
byggingu virkjunarinnar sé borgin að
steypa sér í meiri skuldbindingar en svo
að heildareignir hennar dugi fyrir þeim.
„Við stöndum frammi fyrir þeirri stað-
reynd að við erum 45% eignaraðili að
Landsvirkjun, sem er að ráðast í pólitískt
verkefni sem heitir Kárahnjúkavirkjun.
Verkefni sem er fyrst og fremst knúið
áfram af pólitískum hagsmunum en ekki
arðsemissjónarmiðum. Þar að auki er
þetta ámælisverð framkvæmd bæði frá
umhverfislegu og siðferðilegu sjónarmiði
og við eigum einfaldlega að neita að taka
þátt í þessu pólitíska fjárhættuævintýri. Í
framhaldi af því finnst mér eðlilegt að
við komum okkur út úr Landsvirkjun.“ ■
INGIBJÖRG SÓLRÚN GÍSLADÓTTIR
Orkar
tvímælis
Ingibjörg Sólrún Gísladóttir, borgar-stjóri í Reykjavík, segir að stærð
ábyrgðarinnar í sjálfu sér hljóti að orka
tvímælis.
„Eins og kemur
fram í áliti borgarlög-
manns þá er það hin
almenna regla í sveit-
arstjórnarlögum að
sveitarfélögum er
bannað að ganga í
ábyrgðir fyrir fyrir-
tækjarekstur,“ segir
Ingibjörg Sólrún.
„Hins vegar er gerð
undantekning í lögum um Landsvirkjun.
Ef þetta er heimfært upp á ríkið þá vær-
um við að tala um 350 milljarða, þannig
að það sést hvaða stærðargráðu er um að
ræða.“
Ingibjörg Sólrún segir að erfitt sé að
meta áhættuna áður en arðsemismat liggi
fyrir. Sérstök nefnd eigi að skila arðsem-
isútreikningum í byrjun janúar og þá
muni málið verða tekið fyrir í borgar-
stjórn.
„Ef menn telja að áhættan sé mikil og
arðsemin lítil þá er málið erfiðara við-
fangs en ella.“
Ingibjörg Sólrún segist lengi hafa ver-
ið þeirrar skoðunar að Reykjavíkurborg
eigi að selja hlut sinn í Landsvirkjun.
Hann sé metin á 15 til 16 milljarða króna.
Enginn nema ríkið eða sveitarfélög megi
kaupa þann hluta eins og er.
„Ég held að við ættum að stefna að því
að fara alveg út. Ég held það sé ekki
spurning um hvort við seljum heldur
hvenær. Við erum með mikla fjármuni
bundna í Landsvirkjun án þess að það
hafi komið mikill arður af þeim. Við
stöndum andspænis miklum fjárfesting-
arverkefnum í borginni í nýjum atvinnu-
tækifærum og nýrri grunngerð í borgar-
samfélaginu. Það er erfitt að sjá hvernig
hægt er að fjármagna það nema með því
að losa um fjármuni annars staðar.“ ■
BJÖRN BJARNASON
Ekki of
mikil áhætta
Björn Bjarnason, oddviti sjálfstæðis-manna í borgarstjórn, telur að
Reykjavíkurborg sé ekki að taka of mikla
áhættu með veitingu
ábyrgðar vegna Kára-
hnjúkavirkjunar.
„Ég held að borgin
sé ekki að taka of
mikla áhættu með
því,“ segir Björn.
„Það kemur í ljós í
áliti borgarlögmanns
að eignarhlutur
Reykjavíkurborgar í
Landsvirkjun styrkir
lánshæfi borgarinnar og borgin er nú að
auka sínar skuldir um tvo milljarða á
þessu ári og þarf því að hafa mikið og
gott lánstraust.“
Björn segir að það hafi ekki nema síð-
ur sé veikt Reykjavíkurborg að vera eig-
andi að Landsvirkjun til þessa.
„Ég sé ekki að menn fari út í þau
áform að virkja Kárahnjúka á þeim for-
sendum að veikja Landsvirkjun eða eig-
endur fyrirtækisins. Ásamt Seðlabankan-
um og ríkissjóði er Landsvirkjun það fyr-
irtæki hér á landi sem hefur hvað mest
lánstraust. Það hefur nýlega hækkað
lánsmatið á Landsvirkjun eftir að alþjóð-
legt lánsfyrirtæki kynnti sér allt sem
sagt hefur verið og gert í sambandi við
Kárahnjúka.“
Björn segir að auðvitað sé mikilvægt
að arðsemismat liggi fyrir, hvort sem lit-
ið sé á það út frá sjónarhóli Reykjavíkur-
borgar eða annarra. Hann segist ekki
vera þeirrar skoðunar að borgin eigi að
selja hlut sinn í Landsvirkjun.
„Ég tel að ef menn vilja gera eitthvað
varðandi Reykjavíkurborg og Landsvirkj-
un þá ætti að huga að því að breyta
Landsvirkjun í hlutafélag í eigu ríkisins
og sveitarfélaganna. Það væri skynsam-
legt fyrsta skref ef menn vildu breyta
einhverju varðandi eigendurna.“ ■
Borgarlögmaður telur að borgin taki ákveðna áhættu með veitingu ábyrgða vegna Kárahnjúkavirkjunar.
Borgin á 45% eignarhlut í Landsvirkjun, sem þegar skuldar 75 milljarða króna. Ef Kárahnjúkavirkjun verður
að veruleika munu skuldir fyrirtækisins aukast verulega, enda framkvæmdin metin á rúma 90 milljarða króna.
Fjárhagslega áhætta borgarinnar er tvíþætt. Annars vegar ef arðsemi virkjunarinnar er ekki sú sem reiknað er
um og hins vegar ef Landsvirkjun lendir í fjárhagslegum erfiðleikum og ábyrgðir falla af þeim sökum á eigendur.
Borgarstjóri vill
selja í Landsvirkjun