Skessuhorn - 29.01.2020, Page 15

MIÐVIKUDAGUR 29. JANúAR 2020 15
Akraneskaupstaður auglýsir nýjar lóðir til úthlutunar
Akraneskaupsstaður auglýsir nýjar
lóðir lausar til umsóknar undir
par- og raðhús í Akralundi. Um
er að ræða tvær raðhúsalóðir við
Akralund 8-10-12-14 og 20-22-24-26
og eina parhúsalóð við Akralund
16-18. Lóðirnar eru byggingarhæfar.
Um auglýsingu og úthlutun lóða gilda
reglur Akraneskaupsstaðar frá árinu
2018, en auglýsa skal lóðir sérstaklega
með 2ja vikna umsóknarfresti að
lágmarki og fer úthlutun fram sam-
kvæmt vinnureglum ef fleiri en einn
sækir um hverja lóð. Séu umsækj-
endur fleiri en einn um ákveðna lóð
verður dregið um úthlutun hennar.
Sá aðili sem fær úthlutað lóð hefur
sex mánuði til að hefja uppbyggingu
en að þeim tíma liðnum fer við-
komandi lóð á almenna listann yfir
lausar lóðir sé uppbygging ekki hafin.
Akraneskaupstaður áskilur sér þann
rétt að vera ekki bundinn röð úthlut-
unar lengur en umrætt tímabil. Jafn-
framt er gert ráð fyrir að úthlutun fari
ekki fram að nýju fyrr en að liðnum
tveimur vikum eftir að lóðin kemur
fram á listann yfir lausar lóðir.
Umsóknareyðublöð, lóðarblöð, gjald-
skrár, skipulags- og byggingaskilmálar
og aðrar upplýsingar um lóðirnar eru
að finna á heimsíðu Akraneskaup-
staðar, www.akranes.is/nyjarlodir
Sótt er um lóð í gegnum þjónustugátt Akraneskaupstaðar.
Umsóknafrestur er til og með föstudeginum 14. febrúar 2020.
Breiðafjarðarnefnd, í samstarfi við
Náttúrustofu Vesturlands, stendur
þessa dagana fyrir fræðslufundaröð
um framtíð Breiðafjarðar í sveitar-
félögum við fjörðinn. Fundir hafa
þegar verið haldnir í Snæfellsbæ,
Stykkishólmi og Grundarfirði og á
næstunni verður sömuleiðis boðað
til funda í Dalabyggð, á Reykhól-
um og í Vesturbyggð. Á fundunum
kemur fram að Breiðafjarðarnefnd
hefur ekki myndað sér skoðun á
hvort og þá hvaða skref sé heppileg-
ast að stíga varðandi framtíð fjarð-
arins enda leggur hún áherslu á að
heyra í sem allra flestum áður en
nokkuð verður aðhafst.
Fundirnir eru haldnir í framhaldi
af málþingi sem Breiðafjarðarnefnd
stóð fyrir í Tjarnarlundi í Döl-
um í október á síðasta ári. „Á síð-
ustu misserum hefur nefndin sann-
færst um að endurskoða þurfi lög
um vernd Breiðafjarðar með það að
markmiði að skýra þau og styrkja.
Samhliða þeirri vinnu sem og vinnu
umhverfis- og auðlindaráðuneytis-
ins við undirbúning stofnunar Þjóð-
garðastofnunar, hefur nefndin rætt
ýmsa möguleika og tækifæri fyrir
framtíð Breiðafjarðar. Málþingið
í október og fræðslufundirnir nú
í byrjun árs eru liður í því að kalla
eftir viðbrögðum íbúa, atvinnu-
lífs, sveitarstjórna og annarra hags-
munaaðila við vangaveltum Breiða-
fjarðarnefndar,“ segir í kynningu á
heimasíðu Breiðafjarðarnefndar.
Menn óttast þjóðgarð
í firðinum
Þónokkur fjöldi fólks mætti á fund-
inn í Grundarfirði síðastliðið mánu-
dagskvöld og ljóst að margir sem
láta sig málefnið varða. Róbert Arn-
ar Stefánsson sem situr í nefndinni
fyrir hönd Náttúrustofu Vesturlands
hélt erindi um lífríki Breiðafjarð-
ar og á eftir honum steig Kristinn
Jónasson bæjarstjóri Snæfellsbæjar
í pontu og sagði frá Þjóðgarðinum
Snæfellsjökli og þeim áhrifum sem
hann hefur haft á byggðina. Eftir
þessi tvö erindi stýrði Björg Ágústs-
dóttir bæjarstjóri Grundarfjarðar-
bæjar umræðum um efni fundar-
ins. Það voru skiptar skoðanir um
framtíð Breiðafjarðar og ljóst að all-
ar umræður um þjóðgarð í Breiða-
firði vöktu ugg hjá fundargestum.
Mönnum var heitt í hamsi er viðr-
aðar voru hugmyndir um að gera
fjörðinn að þjóðgarði og þar höfðu
menn aðallega áhyggjur af stýringu
hverskonar með tilheyrandi boðum
og bönnum. Erla Friðriksdóttir for-
maður nefndarinnar, Kristinn Jón-
asson og Róbert Arnar Stefánsson
sátu fyrir svörum frá fundargestum
og spunnust málefnalegar umræð-
ur um framtíð svæðisins. Allir við-
staddir voru þá á eitt sammála um
áframhaldandi sjálfbæra nýtingu og
uppbyggingu á svæðinu á komandi
árum og áratugum. mm/tfk/sá
Ljóst er að allar hugmyndir um þjóðgarð í Breiðafirði vekja upp blendnar tilfinn-
ingar hjá íbúum. Hér ræðir Unnsteinn Guðmundsson skotveiðimaður við frum-
mælendur á fundinum í Grundarfirði. Ljósm. tfk.
Breiðafjarðarnefnd vill endurskoða
lög um vernd fjarðarins
Hérna eru þau Erla Friðriksdóttir, Kristinn Jónasson og Róbert Arnar Stefánsson að taka við spurningum úr sal á fundinum í
Grundarfirði. Ljósm. tfk.
Svipmynd frá fundinum sem fram fór í Stykkishólmi. Róbert A Stefánsson útskýrir
það sem umfram allt einkennir Breiðafjörð, þ.e. 3009 eyjar og 1275 sker. Ljósm. sá.