Lögmannablaðið - 2019, Blaðsíða 25
LÖGMANNABLAÐIÐ TBL 02/19 25
Lilja útskrifaðist sem lögfræðingur frá Háskólanum í
Reykjavík árið 2011 og öðlaðist héraðsdómsréttindi árið
2012. Hún starfaði sem lögmaður til ársins 2014 þegar hún
ákvað að fara í frekara nám. Hún fór í LL.M. nám í Dispute
Resulution við University of Missouri í Bandaríkjunum
en námið samanstendur af samningatækni, sáttamiðlun
og gerðardómsrétti. Í upphafi lagði hún áherslu á að
læra samningatækni en svo kynntist hún hugmyndafræði
sáttamiðlunar og þá var ekki aftur snúið.
Þegar Lilja kom til baka frá Bandaríkjunum árið 2015
fór hún að kanna vettvang sáttamiðlara hér heima. Hún
sá fljótlega að ekki var mikil gróska á þeim vettvangi og
komst í raun að því að sáttamiðlun væri mjög lítið notuð
hér á landi.
„Ég byrjaði á að fletta upp Sátt en ég hafði rekist á félagið
þegar ég var að kynna mér hvar sáttamiðlun stæði á Íslandi
og setti mig í samband við félagið þegar ég kom heim. Ég fór
fljótlega að vinna með stjórninni að skipuleggja ráðstefnu
um sáttamiðlun í atvinnulífinu sem við héldum árið 2015.
Á aðalfundi félagsins árið 2016 stóð til hjá mér að bjóða
mig fram í stjórn félagsins og fór það svo á fundinum að
ég var kosinn formaður Sáttar. Síðan þá hef ég verið virk
á sviði sáttamiðlunar og finn að áhuginn á sáttamiðlun er
að aukast, þó við séum enn tiltölulega fá sem störfum á
þessu sviði.“.
Hvað er átt við þegar talað er um sáttamiðlun eða „alternative
dispute resulusion“?
„Sáttamiðlun er aðferð til lausnar ágreiningi, sem aðilar
taka sjálfviljugir þátt í, með aðstoð óháðs og hlutlauss
sáttamiðlara. Þannig komast aðilar sjálfir að niðurstöðu
sem þeir telja viðunandi. Sáttamiðlari kemst ekki að
niðurstöðu í máli, hann kemur ekki með lausnina, heldur
leiðir hann einstaklinga saman til að finna sínar eigin
lausnir. Sáttamiðlari er þannig alltaf hlutlaus aðili. Þegar
aðilar tala um ADR eða „alternative dispute resolution“ er
verið að meina aðrar leiðir við úrlausn deilumála heldur
en dómstóla, en kennararnir mínir vildu meina að það ætti
frekar að kalla þær leiðir „appropriate dispute resolution“.
SÁTTAMIÐLUN
– RAUNHÆFUR VALKOSTUR
VIÐ LAUSN ÁGREININGS?
VIÐTAL VIÐ LILJU BJARNADÓTTUR: