Gerðir kirkjuþings - 2018, Page 104

104 105
Ábyrgð og skyldur kirkjulegra yfirvalda.
Kirkjuleg yfirvöld (hér er einkum átt við biskupa, prófasta, sóknarpresta, presta og
sóknarnefndir) bera ábyrgð á því að viðhalda góðu starfsumhverfi sem er laust við einelti,
áreitni eða ofbeldi.
Ábyrgð kirkjulegra yfirvalda er veigameiri sökum valdaójafnvægis og getur einelti,
kynferðisleg áreitni, kynbundin áreitni og ofbeldi af hálfu kirkjulegra yfirvalda reynst enn
þungbærara en af hálfu annarra.
Mikilvægt er þó að hafa í huga að þeir sem eru kirkjuleg yfirvöld, líkt og aðrir starfsmenn
geta orðið fyrir einelti, kynferðislegri áreitni, kynbundinni áreitni og ofbeldi í starfi.
Ef tilkynnt er um meint einelti, áreitni, eða ofbeldi af hálfu yfirvalda þjóðkirkjunnar
verður viðkomandi vanhæfur til að ákvarða um vinnuskilyrði tilkynnanda á meðan á
könnun máls stendur og skal næsti yfirmaður taka ákvarðanir er varða meintan þolanda
eða málinu vísað til starfsmannastjóra/mannauðsstjóra, sbr. 2. mgr. 22. gr. laga nr. 10/2008.
Skyldur kirkjulegra yfirvalda felast m.a. í því að:
• Sýna gott fordæmi með faglegu viðmóti sem einkennist af tillitsemi, kurteisi,
virðingu, og umburðarlyndi.
• Sýna í orði og athöfn að einelti, áreitni og annað ofbeldi er ekki liðið.
• Tryggja að allt starfsfólk og þeir sem þiggja þjónustu kirkjunnar hafi greiðan aðgang
að og sé upplýst um stefnu þessa og verkferla.
• Tryggja að upplýsingar um hvert þeir geti leitað, ef þeir upplifa einelti, kynferðislega
áreitni, kynbundna áreitni og ofbeldi, séu ávallt aðgengilegar.
• Bregðast skjótt við ef þeir verða varir við óviðeigandi hegðun í skilningi þessarar
stefnu, eða fá vitneskju um slíkt.
• Virða rétt allra til réttlátrar málsmeðferðar.
• Hvetja þá aðila sem tengjast máli til þátttöku í úrvinnsluferli.
• Styðja við aðila sem vinna að athugun eða úrlausn mála.
• Hlutast til um og grípa til aðgerða, eftir atvikum á meðan og eftir að málsmeðferð lýkur.
Réttindi, hlutverk og ábyrgð starfsfólks.
Ætlast er til að starfsmenn þjóðkirkunnar framfylgi og styðji framgang þessarar stefnu
með því að:
• Taka ábyrgð á eigin hegðun og framkomu.
• Hegða sér í hvívetna á faglegan hátt og bera virðingu fyrir öðrum.
• Vera vakandi og meðvitaðir um líðan annarra í nærumhverfinu og veita stuðning
eftir atvikum.
• Starfsfólk taki þátt í því könnunar- og/eða úrlausnarferli sem heyrir undir stefnuna,
sé þess óskað.
• Upplýsa þar til bæra aðila um einelti, kynferðislega áreitni, kynbundna áreitni eða
ofbeldi sem hann hefur vitneskju um samkvæmt tilkynningarskyldu. Þeir aðilar eru
mannauðsráðgjafi og sérfræðingar teymis þjóðkirkjunnar.
• Stuðla að því að stefnunni sé framfylgt í hvívetna.
• Virða rétt allra til sæmdar og virðingar og gæta trúnaðar um persónuleg mál.