Skólavarðan - 2020, Blaðsíða 13
HAUST 2020 SKÓLAVARÐAN 13
Uppskeruhátíð / TÓNLISTARNÁM
N ótan – uppskeru-hátíð tónlistar-skóla var fyrst haldin skólaárið 2009-2010 og fagnar því 10
ára afmæli á þessu ári. Nótan er árlegur
viðburður í kerfi tónlistarskóla á Íslandi
og skipar stóran sess í hugum nemenda,
kennara og áhugafólks um tónlist. Há-
tíðin hefur ávallt verið faglega hvetjandi
og skemmtilegt innlegg í skólastarfið
fyrir alla aðstandendur skólanna jafnt
innan veggja þeirra sem utan.
Til stóð að halda afmælishátíð í
vor þar sem kastljósinu væri beint að
samfélagi tónlistarskóla og tónlist-
arnemendum veittar viðurkenningar
fyrir afrakstur vinnu sinnar. Hátíðin átti
að vera í Hörpu en af henni varð ekki
vegna COVID-19.
Skipulagning Nótunnar 2021
stendur yfir og er undirbúningshópur
á fullu að finna leiðir til að skólarnir
geti sent inn efni og verður útfærslan
á rafrænu formi. Stefnumiðið er eftir
sem áður það sama, þ.e. að styrkja ungt
fólk til listsköpunar og að efla listir,
menntun og menningu í samfélaginu.
Tónlistarkennarar stóðu frammi
fyrir heilmikilli áskorun síðastliðið vor
þegar þeir þurftu að færa tónlistar-
kennsluna yfir í fjarkennslu og því er
bæði táknrænt og framsækið að bregða
spegli á starfsemi tónlistarskóla með því
að hafa Nótuna í netheimum árið 2021.
Undirbúningshópur er að skoða
nánari útfærslur en útgangspunkturinn
er að tryggja að öllum skólum verði gert
kleift að taka þátt óháð tækniinnviðum.
Horft verður til þess að Nótan 2021
geti allt í senn þjónað sem skemmtileg
og gagnleg reynsla fyrir nemendur,
kynningarátak á starfsemi tónlistar-
skóla, þekkingarsköpun og fjárfesting í
tækniinnviðum og áhugaverð heim-
ildaröflun um tónlistarskólakerfið á
Íslandi. Allar nánari upplýsingar verða
sendar tónlistarskólum.
Skipulagning
Nótunnar 2021
stendur yfir og er
undirbúningshópur á
fullu að finna leiðir til
að skólarnir geti sent
inn efni og verður
útfærslan á rafrænu
formi.