Skólavarðan - 2020, Síða 27

HAUST 2020 SKÓLAVARÐAN 27
Könnunaraðferðin / LEIKSKÓLI
Þau sýndu samkennd með dýrunum
sem voru auðvitað skilin eftir,“ segir
Helga.
Næsta gesti var líka tekið afar vel.
Þar var á ferð Sólveig G. Hannesdóttir,
líffræðikennari í MR og móðir barns á
deildinni. „Sólveig kom með heilmikinn
farangur, steingervinga, ösku úr Eyja-
fjallajökli, hrafntinnu og baggalúta sem
börnin gerðu tilraunir með. Hún kom
líka með líkan af jörðinni sem börnin
gátu skoðað og tekið í sundur. Þetta var
alveg frábær heimsókn og kveikti enn
meiri áhuga á jarðfræðinni.“
Þessar heimsóknir eru gott dæmi
um samstarf leikskólans við foreldra og
fjölskyldur barnanna. Helga segir verk-
efnið hafa verið unnið í góðu samstarfi
við heimilin og ýmis tengsl nýtt til að
glæða verkefnið enn frekar.
Börnin setjast á háskólabekk
Vettvangsferðir eru hluti af könnunar-
aðferðinni og einn kaldan morgun
seint í febrúar lögðu börnin ásamt
kennurum í ferðalag sem endaði í
Háskóla Íslands, nánar til tekið í Öskju,
húsi jarðfræðinnar. Þar beið einn helsti
sérfræðingur þjóðarinnar í jarðfræði,
Magnús Tumi Guðmundsson prófessor,
eftir krökkunum. „Magnús Tumi tók
afar vel á móti okkur og hélt frábæran
fyrirlestur fyrir krakkana. Hann hafði á
orði að hann hefði ekki áður kennt svo
ungum nemendum. En honum fórst
það vel úr hendi og krakkarnir nutu
þess að hlusta og fræðast, ekki síður en
við fullorðna fólkið.“
Verklegi þáttur þessa mikla
verkefnis er ónefndur en börnin unnu
hörðum höndum að því að búa til
hnetti, hvert með sínu lagi auðvitað.
„Þetta tók margar vikur en stefnan
var að þetta yrði tilbúið í mars, í
Hönnunarmars. Við notuðum blöðrur
sem innvols í hnettina og síðan þurfti
að líma mikið magn af pappír utan á
sem síðan var málaður. Börnin létu ekki
þar við sitja og í sameiningu bjuggu þau
til stærðar eldfjall. Við nutum aðstoðar
starfsmanna og kennara á deildinni
og ekki síst Kristínar Vilborgar sem er
sérgreinastjóri í listaskála leikskólans.“
Eldfjallið er sérlega glæsilegt,
hátt og tignarlegt, og var það flutt með
sendibíl í Norræna húsið.
Helga Lotta Reynisdóttir leikskólakennari hélt utan um verkefnið og segir það hafa
veitt bæði börnum og starfsfólki einskæra gleði. Hún vill koma þökkum til starfsfólks
og kennara, Elínar Margrétar, Jórunnar, Sollu og Kristínar Vilborgar sérgreinastjóra.
Einnig vill hún þakka börnum og foreldrum fyrir frábært samstarf í verkefninu.
Mynd: Anton Brink
Samheldni og einskær gleði í
starfsmannahópnum
Þegar leið nær Hönnunarmars var
staðan hins vegar breytt. COVID-19
skók samfélagið og hátíðarhöldunum
var frestað.
Börnin höfðu þá og þegar valið
sýningunni nafn, Eldurinn í jörðinni
skyldi hún heita. Tíminn leið og um
mitt sumar var hægt að halda hátíðina
og opna sýninguna í Norræna húsinu.
Sýningaropnunin var hátíðleg, öll
börnin mættu prúðbúin og salinn fylltu
foreldrar, systkini, ömmur, afar og aðrir
ættingjar.
„Þetta var falleg stund og mikil
gleði í loftinu. Jarðirnar sómdu sér vel í
sýningarrýminu og þetta gat ekki tekist
betur til,“ segir Helga og bætir við að
verkefni á borð við þetta sé ekki bara
jákvætt fyrir börnin heldur hafi þetta
haft mjög góð áhrif á starfsandann í
leikskólanum. „Við fengum öll mikið út
úr þessu verkefni. Samheldnin er mikil
meðal kennara og starfsfólks og það eru
engar ýkjur að segja að við vorum öll
saman í þessu og gleðin var einskær,“
segir Helga Lotta Reynisdóttir.
Hönnunarmars í júní
Hönnunarmars 2020 átti eðli málsins samkvæmt að fara
fram í mars. Það gekk ekki upp, hátíðinni var frestað vegna
COVID-19 og fór fram dagana 24. til 28. júní. Sýning barn-
anna á Eiði var einn 80 viðburða á hátíðinni þetta árið.
Glæsilegar jarðir gleðja sýningargesti í Norræna húsinu.