Skinfaxi - 01.02.2019, Side 31

SKINFAXI 31
Söfnuðu í minningarsjóð á Unglingalandsmóti
Hópur ungra Þórsara, sem tóku þátt á Unglingalandsmóti
UMFÍ og kepptu undir nafninu Þorpararnir, safnaði 160
þúsund krónum á mótinu. Hópurinn gaf söfnunarféð í
Minningarsjóð um Baldvin Rúnarsson. Baldvin var mikill
knattspyrnuunnandi, lék með Þór í yngri flokkum en með
Magna í meistaraflokki. Hann lést 31. maí á þessu ári
eftir erfiða glímu við krabbamein aðeins 25 ára gamall.
Fjölskylda Baldvins stofnaði minningarsjóð um hann og
er tilgangur hans að styrkja einstaklinga, hópa eða félög
á sviði íþrótta- og mannúðarmála.
Krakkarnir, sem mynduðu hópinn, eru strákar úr 5. flokki
Þórs og stelpur úr 4. flokki félagsins. Þau seldu auglýsing-
ar á búningana og merktu þá með nafni Baldvins Rúnars-
sonar, Bassa eins og hann var kallaður, og tölustöfunum
603. Eftir Unglingalandsmótið færði svo hópurinn Ragn-
heiði Jakobsdóttur, móður Baldvins, peningana og treyju
að gjöf.