Skinfaxi - 01.04.2023, Blaðsíða 21

S K I N FA X I 21
„Mér hefur alltaf þótt vænt um Ungmennafélag Íslands, keppti á mótum
í spjótkasti og síðan er það Ísland er land þitt,“ segir tónlistarmaðurinn
Magnús Þór Sigmundsson. Hefð er fyrir því við setningu móta UMFÍ og
sambandsþings að flytja lagið, sem er eitt af hinum þekktari úr stóru
lagasafni hans. Á sambandsþingi UMFÍ þetta árið mætti Magnús Þór
á svæðið og lék lagið á undan ávarpi Jóhanns Steinars Ingimundar-
sonar, formanns UMFÍ.
Áður en hann lék lagið sagði hann áhorfendum sögu þess og teng-
ingu lagsins við UMFÍ.
Meikdraumar
Sagan hófst á því að Magnús stóð í vegkanti með upptöku af laginu
Ísland er land þitt á kassettu annaðhvort á leið til Keflavíkur eða heim
til sín til að hlusta á hana.
„Ég man ekki hvort það var. En þetta var annaðhvort árið 1981 eða
1982 og ég var sumsé að húkka mér far. Sigurður Geirdal tók mig upp
í,“ segir Magnús, en Sigurður var framkvæmdastjóri UMFÍ frá 1970 til
1986. Þeir tóku auðvitað tal saman í bílnum og Sigurður spurði Magnús
Þór frétta.
Magnús var um þetta leyti orðinn nokkuð þekktur í íslensku tónlistar-
lífi. Hann byrjaði að gutla á gítar um sextán ára aldurinn og hafði kynnst
Keflvíkingnum Jóhanni Helgasyni í verkamannavinnu árið 1966. Saman
höfðu þeir verið í hljómsveitunum Rofum og Nesmönnum, auk þess
sem þeir gáfu saman út plötu undir eigin nöfnum og á eigin kostnað
árið 1972. Þeir höfðu líka þegar dýft tánum í tónlistarflóðið á erlendri
grund í hljómsveitinni Change, þótt fáir meikdraumar hafi þar orðið
að veruleika. Engu að síður var kominn svolítill haugur af smellum frá
Magnúsi og hann orðinn þekktur á skerinu.
Með spólu í vasanum
En aftur að Magnúsi, þar sem hann stóð í vegkantinum snemma á
níunda áratugnum, annaðhvort á leið til eða frá Keflavík. Magnús var
þá að vinna á geðdeild og tók gítarinn með sér á næturvaktir. Þar samdi
hann nokkur lög, þar á meðal Ísland er land þitt, Draumur aldamóta-
barnsins og Reynitréð. Lögin tók Magnús upp hjá Rúnari Júlíussyni í
stúdíó Geimsteini í Keflavík.
„Ég sagði honum að ég hefði verið að taka upp lag og væri að fara
yfir upptökurnar. Svo skelltum við kassettunni í tækið og hlustuðum á
lagið, sem Pálmi Gunnarsson söng. Sigurður varð svo hrifinn af laginu
að hann vildi fá að nota það á vegum Ungmennafélags Íslands á ein-
hvern hátt. Áður en bílferðinni lauk vorum við líka búnir að semja um að
UMFÍ myndi selja plötuna fyrir mig og félagið líka,“ segir Magnús Þór.
Ísland er land þitt er eitt tíu laga á hljómplötunni Draumur aldamóta-
barnsins, sem kom út árið 1982. UMFÍ tók að sér sölu og dreifingu og
segir Magnús það hafa verið gott.
„Þau seldu að mig minnir 1.500 eintök og það bjargaði mér alveg á
þessum tíma,“ segir hann.
Lagið er meðal þeirra þekktustu úr smiðju Magnúsar Þórs og hefur
komið til álita sem nýr þjóðsöngur landsmanna. Lagið skilaði líka miklu
fyrir Magnús og hafa mörg fyrirtæki notað það við ýmis tækifæri. Mynd-
band var gert við útgáfu af laginu með söng Egils Ólafssonar og seldi
Magnús 5.000 eintök af henni. Framsóknarflokkurinn notaði lagið líka
í auglýsingu og fleiri vildu nýta það með svipuðum hætti.
„Starfsmaður á auglýsingastofu sem vissi ekki betur hringdi einu
sinni í mig og vildi fá að nota lagið fyrir Sjálfstæðisflokkinn. Þegar ég
benti þeim á að Halldór [Ásgrímsson] hefði verið búinn að nota lagið
snarhættu þau við,“ segir Magnús að lokum, en hann telur að Ísland
er land þitt hafi skilað sér mestu allra laga.
Sá Magnús Þór
á puttanum og
stoppaði bílinn
Magnús Þór Sigmundsson var að húkka
sér far með upptökur af laginu Ísland er land
þitt á kassettu í vasanum þegar Sigurður
Geirdal framkvæmdastjóri UMFÍ tók hann upp í.
Lagið hefur lengi verið einkennislag UMFÍ.
Magnús Þór Sigmundsson flytur lagið Ísland er land þitt á sam-
bandsþingi UMFÍ.
Spjótkastarinn Magnús
Það er ekki á allra vitorði en í kringum tvítugt var Magnús Þór
vonarstjarna Íslands í spjótkasti og keppti undir merkjum Ung-
mennafélags Njarðvíkur (UMFN).
„Ég ætlaði alltaf að verða heimsmeistari í spjótkasti en var í
raun bara grjótkastari og gat kastað nánast jafn langt í kyrrstöðu
og með tilhlaupi. Ég mældi einu sinni kyrrstöðukastið. Það var
58 metrar. Með atrennu bættust einn til tveir metrar við. Ég fór
á mörg mót, var Íslandsmeistari, drengjameistari og fremstur í
flokki ungra manna, var sendur á landsmót í Danmörku og fór
með Sigmundi Hermundssyni, sem hafði kastað lengst allra,
eða 67 metra,“ segir Magnús. Leikar enduðu með því að ytra
átti Magnús lengra kast og var Sigmundur ekki hress með það.
Magnús náði langt og fékk tilboð frá ÍR, sem ætlaði að setja
hann í almennilega þjálfun. „Þau sögðust geta lengt kastið hjá
mér um 10 metra. En það varð ekkert úr þessu. Ég hefði aldrei
hætt músíkbröltinu og hefði kannski getað æft samhliða. En
svo fór ég út til Englands og þá pössuðu æfingarnar ekkert inn í
planið,“ segir Magnús, en á síðasta móti sem hann keppti á, í
júlí árið 1971 kastaði hann 57,04 samkvæmt Afrekaskrá Unn-
steins Ólafssonar. Þá var Magnús 23 ára. Ári síðar kom út fyrsta
plata þeirra Magnúsar og Jóhanns Helgasonar, sem hét eftir
þeim báðum, og var þá spjótið komið endanlega á hilluna.