Upp í vindinn - 01.05.2014, Qupperneq 66

PÓLITÍK ER
SKEMMTILEG
Ég er nemandi í umhverfis- og byggingarverkfræði við Háskóla íslands, en er þó á mikilli hægferð núna.
1 þessum pistli langar mig að segja frá því sem ég hef fengið að takast á við undanfarna mánuði. Það
„gerðist" fyrir tæpu ári að ég komst á þing, hið háa Alþingi íslendinga. Ég skal viðurkenna það að í fyrstu
var ég hræddur en samt spenntur og var ekki viss hvernig ég ætti að undirbúa mig. Það hefði svosem
ekki skipt miklu máli hvernig ég byggi mig undir starfið. Starfið kom verulega á óvart og ætla ég að segja
frá minni upplifun og lýsa vinnustaðnum Alþingi.
Skökk mynd
Því miður er myndin sem dregin er
upp í fjölmiðlum af Alþingi ekki góð.
Mest lesnu fréttirnar eru fréttir af
ágreiningi og hitamálum. Reyndin
er hins vegar sú að sjaldan er mikill
ágreiningur á milli þingmanna ólikra
flokka. Um90%aföllummálumsem
fara í gegnum þingið eru mál sem
allflestir eru sammála um. Þvert
á flokka er unnið að breytingum
á löggjöf. Samvinna í nefndum er
almennt mjög góð en þeir fundir eru oftast lokaðir fjölmiðlum.
Þar vinna allir saman að farsælli niðurstöðu. Vandamálið tel ég
að liggi í gamalli umræðuhefð og skotgrafarhernaði í nokkrum
dagskrárliðum þingsins, sem ég neita að taka þátt í. í annan
stað er það fréttnæmara að fólk sé ósammála. Þar hjálpast að
fjölmiðlar og lesendur þjóðfélagsins að halda uppi fréttum af
ágreiningi, með meiri eftirspurn eftir þannig fréttum frekar en
jákvæðum.
Skriffinnskuflóð
Allir þingmenn hafa ákveðið hlutverk inni á þingi, fyrir utan hin
hefðbundnu eftirlits- og þingstörf. Þingmennska er mikil vinna og
mikið sem þarf að lesa, kynna sér og skilja. Sætta þarf sjónarmið
og finna leiðir til að efla samfélagið og aðlaga löggjöf að
nútímanum. Það kemst enginn yfir allt það skriffinnskuflóð sem
fer um á hverjum degi. Sérstaklega ekki ef maður tekur virkan þátt
í umræðum og andsvörum inni i þingsal. Það hlutverk sem mér
var falið inni á Alþingi er seta í umhverfis- og samgögnunefnd og
í Þingvallanefnd. Áhugamál og þekking skipta máli þegar raðað
er í nefndir en þó fá ekki allir sína óskanefnd. Þingmenn verða
að setja sig vel í þau málefni sem tengjast þeirra nefndum og
tala fyrir þeim málum í þingsal. Aðrir þingmenn treysta því að
nefndarmenn þeirra setji sig vel inn í málefni nefndarinnar og
komi þeim upplýsingum á framfæri við sinn þingflokk.
Mér er alveg sama
Þó ég hafi verið kosinn þingmaður suðurkjördæmis fyrir
Framsókn þá finnst mér ég vera talsmaður unga fólksins. Þetta er
ekki bara mitt tækifæri, þetta er tækifæri unga fólksins til að gera
breytingar og vera breytingin. Einnig að brúa bilið milli skoðana
og sjónarmiða ungs fólks og þeirra sem taka ákvarðanirnar.
Einnig tel ég að það skipti máli fyrir ungt fólk að hafa fyrirmynd
og vona ég að seta mín á Alþingi sé öðru ungu fólki hvatning
til að taka þátt í stjórnmálum. Ég vil að ungt fólk trúi því að það
þurfi ekki að vita allt um allt til að geta haft áhrif og breytt því sem
það telur vert að breyta. Pólitík er skemmtileg. Umræðuefnin
eru reyndar misskemmtileg, en þeim mun áhugaverðari því
betur sem maður kemst inn í efnið. Þess vegna hvet ég þá sem
hafa áhuga á samfélaginu að láta til sín taka. Aðra sem hafa
lítinn áhuga hvet ég til að kynna sér eitt eða tvö málefni og hafa
skoðun á þeim og fylgja þeim eftir. Það þarf samt ekki að komast
á Alþingi til að hafa áhrif. Dæmi um óbein og bein áhrif er að
vera þátttakandi í stjórnmálahreyfingu og móta stefnu flokka,
skrifa í blöðin, spjalla á vinnustöðum, vera hluti af einhvers
konar samtökum. í lýðræðislegu þjóðfélagi ber okkur skylda til
að fylgjast með þeim sem taka ákvarðanir í okkar umboði. Bara
„ekki gera ekki neitt!" og ekki segja, „mér er bara alveg sama!“
Mín mál - Nokkur málefni sem ég hef mikinn
áhuga á og er að vinna að:
• Að leyfa hægri beygju á umferðarljósum, mót
rauðu Ijósi.
• Breyting á meginreglu um forræði barna, að
foreldrar fái jafnt forræði yfir börnum ef þau eru
ekki í skráðri sambúð eða hjónabandi.
• Bættar samgöngur á gömlu fornleiðunum um
hálendið, eins og um Kjöl og Sprengi-sand.
• Hvetja ungt fólk til að taka þátt í pólitík og
umræðu og mynda sér sjálfstæðar skoðanir.
• Annað sem tengist börnum, unglingum og ungu
fólki, eins og hækkun frítekju-marks námsmanna,
iðnnám verði láns-hæft og ýmsar tímaskekkjur
sem þarf að leiðrétta í menntakerfinu, efling
íþrótta og heilsuvitundar, svo dæmi séu tekin.
Haraldur Einarsson
Höfundur er 26
ára þingmaður
Framsóknarflokksins og
nemi í Umhverfis- og
byggingarverkfræði.
66 I . upp í vindinn