Tíðindi Prestafélags hins forna Hólastiftis - 01.01.1984, Page 121

PRESTAFÉLAGS HINS FORNA HÖLASTIFTIS
125
má nefna merkilegan kaleik (frá 1672) og altaristöfluna en
hún sýnir atburðinn er Jesús bauð börnunum að koma til sín
og er eftir Arngrím málara Gíslason, máluð um 1870.
Sr. Þórhallur Höskuldsson.
Frá kirkjum
í Laugalandsprestakalli
Munkaþverárklausturskirkja:
Kirkjan á merkisafmæli á þessu ári, var reist 1844. Yfir-
smiður var Þorsteinn Daníelsson á Skipalóni, en Ólafur
timburmeistari Briem á Grund teiknaði kirkjuna.
Svo sem ekki er að undra, er allmikill fúi kominn í undirlög
og ytrabyrði kirkjunnar og hún skökk orðin á grunni. Er nú
ákveðið að hefja sem fyrst viðgerð á þessu forna og virðulega
guðshúsi og gera jafnframt á því aðrar endurbætur, svo að
betur hæfi það kröfum tímans. Kirkjan kostaði upphaflega
1770 ríkisdali og 62 skildinga, eða rúmlega 88 kýrverð.
Þá stendur líka fyrir dyrum stækkun á kirkjugarði og lag-
færing. Þó að hann láti lítið yfir sér á efra borðinu, þá hvíla
þar undir grassverðinum, ásamt gengnum kynslóðum safn-
aðarfólks í þúsund ár, ginnhelgir ábótar til annarrar handar,
en hins vegar mestu kappar Sturlungaaldar.
Saurbæjarkirkja:
Mikil viðgerð fór fram á Saurbæjarkirkju á síðastliðnu
sumri. Veggirnir, sem illa voru farnir, voru hlaðnir algerlega
upp að nýju og þakið styrkt. Vann Jóhannes Arason frá Múla
í Kollafirði þetta verk með góðum tilstyrk heimamanna. Þá
voru stafnar kirkjunnar málaðir. Gjörði það Óttar Ketilsson.
Saurbæjarkirkja er í umsjá þjóðminjavarðar.