Morgunblaðið - 28.08.1979, Blaðsíða 41
MORGUNBLAÐIÐ, ÞRIÐJUDAGUR 28. ÁGÚST 1979
21
jDregið í EM í handbolta:
Valur og Víkingur
beint í 2. umferð
Fram mætir Neistanum
í GÆR var dregið í 1. umferð
Evrópumótanna í handknattleik
og fór athöfnin fram í höfuðstöðv-
um Alþjóða handknattleikssam-
bandsins í Sviss.
í karlaflokki tekur Valur þátt í
Evrópukeppni meistaraliða en
Víkingur tekur þátt í Evrópu-
keppni bikarmeistara. í kvenna-
flokki tekur Fram þátt í Evrópu-
keppni meistaraliða.
Niðurstaðan varð sú að bæði
Valur og Víkingur sitja yfir í 1.
umferðinni og komast því í 2.
umferð án keppni en kvennalið
Fram á að leika við Neistann frá
Þórshöfn í Færeyjum í 1. umferð.
Á fyrri leikur liðanna að fara
fram í Færeyjum.
Valur og Víkingur sitja yfir í 1.
umferðinni vegna góðrar frammi-
stöðu í fyrra en þá komst Valur í
16-liða úrslit og Víkingur í 8-liða
úrslit, en var þá vikið úr keppni
eins og frægt varð á sínum tíma.
Þátttökulið eru með fæsta móti
í Evrópumótunum að þessu sinni
t.d. verða Austur-Evrópuþjóðirnar
ekki með vegna Olympíuleikanna
snemma næsta sumar. Ættu því
að vera talsverðir möguleikar á
því fyrvr íslenzku liin að komast
langt í keppninni.
- SS
Handboltamenn
flykkjast í HK
1. DEILDAR lið HK í handknatt-
leik hefur fengið mikinn flokk
leikmanna til liðs við sig fyrir
komandi keppnistímabil. Liðið
missti aðalmarkaskorarann Stef-
án Halldórsson yfir í Val, en
ætlar ekki að leggjast í kör fyrir
þær sakir einar.
Ármann Sverrisson, fyrrum
leikmaður með KA og Stjörnunni
hefur tilkynnt félagaskipti sín og
einnig Örn Jónsson úr Fram, Nói
Björnsson markvörður úr Þór frá
Akureyri. Kristján Kristjánsson,
markaskorari úr Breiðabliki og
Jón Ágústsson úr Fylki. Það var
helsti höfuðverkur HK á síðasta
ári, hversu breiddin í liðinu var
lítil, en nú mætti ætla, að HK
mæti mun sterkara til leiks heldur
en í fyrra. Það hefur einnig
heyrst, að Víkingurinn Magnús
Guðfinnsson hyggi á félagaskipti í
HK, en að svo komnu hefur ekki
verið gengið frá því.
— gg-
Þýzkt félag á
höttunum eftir Pétri
ÞÝZKT félag, sem sagt er meðal
þeirra sterkustu í 1. deildinni í
V-Þýzkalandi, hefur mikinn áhuga
á að fá Framarann Pétur Ormslev
til liðs við sig. Milligöngumenn frá
félaginu komu til landsins á föstu-
dag og ræddu við stjórnarmenn úr
Fram þá um kvöldið. Pétur frétti
af þessum þýzku njósnurum dag-
inn fyrir úrslitaleikinn og var sú
frétt trúlega óþægileg í sambandi
við undirbúninginn og einbeit-
inguna fyrir leikinn. Ekki hefur
fengist uppgefið hvaða lið hér um
ræðir, en það vantar nauðsynlega
framherja og hafa menn látið sér
detta í hug að Schalke 04 kunni að
vera hér á ferðinni.
• Á myndum þessum má sjá hina óumflýjanlegu
gleði og sorg sem fylgir leikjum sem úrslitaleikir eru.
Á efri myndinni eru Framarar sigurreifir og
Guðmundur Steinsson stjórnar sérstökum klappkór
meðan beðið er þess að fyrirliðinn og besti leikmaður
vallarins, Ásgeir Elíasson, veiti bikarnum móttöku
úr hendi Björgvins Schram.
Á neðri myndinni eru Valsmenn allt annað en
sáttir við úrslitin enda ætla allir að vinna. En einhver
verður að tapa.
Sjá nánar um leikinn á bls. 24 og 25.
Ljósm.: Emilfa.
Pétur og Henning Jensen
eru markhæstir í Hollandi
PÉTIJR PÉTURSSON var enn á ný á skotskónum um helgina þegar Feyenoord lék á
útivelli gegn PSV Eindhoven og gerði jafntefli 2:2. Pétur skoraði fyrra mark liðsins
og hefur nú skorað fjögur mörk í þremur leikjum og er markhæsti leikmaður
hollensku knattspyrnunnar ásamt Dananum Henning Jensen, sem leikur með Ajax.
„Þetta var hörkuleikur gegn
Eindhoven," sagði Pétur er við
slógum á þráðinn til hans. „Það
var uppselt á leikinn, 30 þúsund
manns og enn einu sinni fékk
Feyenoord flesta áhorfendur. Til
gamans má geta þess að aðeins 6
þúsund manns sáu Ajax vinna Go
Ahead Eagles 2:1 á heimavelli
Ajax. Við tókum forystuna í fyrri
hálfleik þegar boltinn kom utan af
kantinum, landsliðsmanninum
Ernie Brandts tókst ekki að
hreinsa og ég fékk boltann einn og
óvaldaður og skoraði auðveldlega.
Staðan í hálfleik var 1:0 en í seinni
hálfleik skoraði Eindhoven tvisv-
ar, fyrst van der Kulen úr víta-
spyrnu og svo landsliðsmaðurinn
Pootlvliet en mark hans var al-
gjört rangstöðumark. Iwan Niels-
en jafnaði fyrir okkur undir lokin
en við áttum að vinna þennan leik
miðað við tækifærin, t.d. sleppti
dómarinn augljósri vítaspurnu."
Pétur lætur sem fyrr mjög vel
af dvölinni hjá Feyenoord. Hann
hefur náð sér fullkomlega af þeim
meiðslum sem höfðu hrjáð hann.
Þjálfarinn hefur tekið Pétur af
kantinum og sett hann á miðjuna
og árangurinn lætur ekki á sér
standa, mark í hverjum leik.
Hollenskur ferðamálafrömuður,
sem var hér á ferð í síðustu viku,
lét þau orð falla að Pétur væri nú
einn af 2—3 umtöluðustu og
þekktustu knattspyrnumönnum
Hollands.
Á miðvikudagskvöldið leikur
Feyenoord við MVV Maastricht á
heimavelli en síðan verður gert
hlé vegna landsleiks íslands og
Hollands á Laugardalsvelli 5.
september. „Ég kem heim á
sunnudaginn og spila landsleik-
inn,“ sagði Pétur. „Hollendingar
eiga í basli með að koma saman
liði og við eigum að geta staðið
okkur vel.“
Samkvæmt upplýsingum Péturs
verður skipan hollenska liðsins
tilkynnt í þessari viku. Ljóst er að
margir af beztu leikmönnum liðs-
ins geta ekki spilað með, Jan
Peters hjá AZ ’67 er fótbrotinn,
Wim Jansen meiddur, Neskeens
fær ekki leyfi New York Cosmos
til að leika og Johhny Rep getur
heldur ekki verið með. Pensen-
brink, Ari Haan og Dushbaba,
leikmenn Anderlecht, gefa ekki
kost á sér og svo má áfram telja.
Hitt er þó víst að fyrirliðinn Rudi
Krol kemur til íslands og væntan-
lega verða Hollendingarnir ekki á
flæðiskeri staddir þótt nokkra
þekkta kappa vanti í liðið. — SS.
Mikil forföll í hollenska liöinu sem mætir íslandi