Morgunblaðið - 30.12.1986, Page 60

60
MORGUNBLAÐIÐ, ÞRIÐJUDAGUR 30. DESEMBER 1986
Sigurður Jónsson er
farinn að f inna sig
í ensku knattspyrnunni
SIGURÐUR Jónsson hefur vakið mikla og verðskuldaða
athygli að undanförnu í leikjum sínum með Sheffield Wed-
nesday í 1. deild ensku knattspyrnunnar. Leikaðferð liðsins
er allt önnur og skemmtilegri á að horfa þegar Sigurður
leikur með og svo virðist, sem hann sé að tryggja sér fast
sæti í liðinu. Árangur þrotlausra æfinga er að koma í Ijós
og Sigurður er farinn að finna sig. Enska vikublaðið Sports-
week birti forsíðumynd af Sigurði fyrir skömmu og í blaðinu
er iöng grein um hann, þar sem sagt er frá hvað Sigurður
þurfti að gera til að vera fær um að keppa á meðal þeirra
bestu i íþróttinni.
I greininni er sagt að það hafi
aðeins tekið Howard Wilkinson,
framkvæmdastjóra Sheffield
Wednesday, 5 mínútur að sjá að
Sigurður var líkamlega algjört rek-
4ld, þegar hann kom til félagsins.
Wilkinson fór út með hann að
hlaupa og „eftir fimm mínútur var
greinilegt að hann átti í erfiðleik-
um. Ég varð að ýta honum áfram,
hrinda honum og bera hann heim,"
sagði Wilkinson. Síöan hefur orðið
mikil breyting á Sigurði og þó hann
hafi ekki mikla leikreynslu, er hann
í hópnum og hefur staðið sig vel
að undanförnu. Alan Smith, sjúkra-
þjálfari, segir að líkamlegt þrek
Sigurðar sé 50 til 60% meira en
það var.
Framfarirnar hafa tekið langan
tíma og að sögn Sigurðar hefur
þetta verið erfiður skóli. En hann
hefur haft góða kennara og Wilkin-
son fann hvar skóinn kreppti.
„Fyrst og fremst verður að muna
að Sigurður var mjög ungur, þegar
hann kom til Sheffield. Á íslandi
var hann stór fiskur í lítilli tjörn,
en hérna komst hann að því að
það voru margir stórir fiskar í sjón-
um. Hann varð að venjast þeirri
staðreynd að hann var ekki lengur
stjarna liðsins. Honum yrði ekki
sýnd sú viröing, sem hann var
vanur og það hlyti að hafa áhrif.
Sjálfsvirðingin minnkaði þar til
hann aðlagaðist breyttum aðstæð-
um og hann yrði að leggja mikið á
sig.
í öðru lagi varð hann að aðlag-
ast breyttum lífsstíl án fjölskyldu
og vina og í þriðja lagi að setja sig
inn í enska boltann. Alvarlegast
var með þrekið. Hann hafði vanist
því að leika inni á veturna og á
sumrin í deild, þar sem kröfurnar
voru ekki miklar. Hann var einfald-
lega þreklaus."
Alan Smith sagði að ýmis
vandamál hefðu komið upp á.
„Loftslagsbreytingin hafði þau
áhrif að hann var oft með flensu
og ýmsa kvilla sem komu í veg
fyrir að hann gæti æft og tekið
framförum. Hann gat æft samfara
því sem meiðsli voru meðhöndluð,
en þegar veikindi voru annars veg-
ar var ekkert hægt að gera."
Þetta var ekki aðeins erfitt tíma-
bil fyrir Wilkinson og Smith.
Sigurður var nær því að bugast
og oftar en ekki efaðist hann um
ákvörðun sína. „Ég vissi hvað ég
þurfti að gera þegar ég kom hing-
að, en þetta var mun erfiðara en
ég gerði mér grein fyrir. Ég varð
að vera mjög sterkur andlega til
að gefast ekki upp,“ er haft eftir
Sigurði. Smith sagði að þrek Sig-
urðar hefði veriö lítið betra en hjá
meðalmanni, en hann hefði styrkst
mikið og það kæmi berlega í Ijós
í leikjunum. Fyrstu tvö árin hefði
verið undirbúningstírnabil, en nú
• Sigurður hefur þurft að leggja mikið á sig til að ná árangri. Hann hefur þyngst um 6 kg sfðan hann kom
til Sheffield og þrekið er 50 til 60% meira en það var.
• Mikið mæðir á miðvallarleikmönnum í hverjum knattspyrnuleik.
Þeir stjórna að miklu leyti gangi leiksins og oftar en ekki er það
undir þeim komið hver úrslitin verða. Sigurður Jónsson er engin
undantekning og í leikjum sínum með Sheffield að undanförnu hefur
hann vakið athygli fyrir yfirvegun, góða knattmeðferð og sérlega
góðar og nákvæmar sendingar.
væri hann tilbúinn til að sýna hæfi-
leika sína.
Almennt er talið að Wilkinson
leggi meiri áherslu á krafta en feg-
urð, en hvernig er hægt að ná því
besta út úr Sigurði? Wilkinson seg-
ir að ailir hjá Sheffield séu beðnir
um að gera sitt besta. Sigurður
hafi þurft að leggja mikið á sig og
hann hafi aldrei verið betri, en
þrekið sé enn ekki nógu gott. „En
hann hefur aðra hæfileika, sem
fólk gæti sagt að bæti fyrir þrekið.
Ég segi hins vegar að þessir hæfi-
leikar blómstri best með því að
byggja upp og styrkja aðra þætti."
Mikið álag er á leikmönnum í
ensku deildinni og ef þeir ætla að
standa sig, verða þeir að geta leik-
ið vikulega þrátt fyrir mikla hörku
og baráttu. Wilkinson segir að það
sé undir Sigurði komið, hvort hann
geti leikið heilt tímabil án þess að
vera stöðugt í meðferð hjá sjúkra-
þjálfara daginn fyrir leik, „en fái
hann tækifæri held ég að hann
geti það. Sigurður hefur þroskast
og viðhorfið er rétt þ.e. vilji til að
sigra. Auðvitað viljum við allir sigra
með stíl, en það gerist ekki alltaf
og Siggi hefur fengið að kynnast
þvj," sagði Wilkinson.
í greininni er sagt að Sigurður
hafi fengið um 40 þúsund pund
við undirskrift samnings og það
sé fjárfesting sem þurfi að vernda
og gefa tíma til að þroskast og
dafna. Það sé löng leið milli Akra-
ness og Sheffield, en hvort Sigurð-
ur Jónsson hafi gert rétt getur
hann einn dæmt um.