Morgunblaðið - 03.03.2002, Blaðsíða 30
LISTIR
30 SUNNUDAGUR 3. MARS 2002 MORGUNBLAÐIÐ
FAENZA-tvíæringurinn er einn sá
virtasti á sviði leirlistar í heiminum
og stendur hann jafnan frá maí til
desember annað hvert ár. Bærinn
Faenza í Ravenna-héraði á Norður-
Ítalíu er frægur fyrir aldagamla leir-
listarhefð og er tvíæringurinn hald-
inn á vegum alþjóðlega leirlistar-
safnsins í borginni, sem þekkt er
fyrir safneign sína á leirlistaverkum
frá öllum skeiðum listasögunnar.
Kristín Garðarsdóttir var meðal
þeirra listamanna sem valdir voru úr
hópi tæplega þúsund umsækjenda
frá 59 löndum um þátttöku á sýning-
unni. Á hátíðina voru valin 130 verk
og var Kristínu boðið að sýna tvö
verka sinna.
„Þátttakan í sýningunni var mikil
viðurkenning fyrir mig enda um
mjög virta hátíð að ræða,“ segir
Kristín. „Í verkunum tveimur sem
ég sýndi tefldi ég saman andstæðum
í listsköpun minni. Ég sýndi annars
vegar tólf þunna, létta postulínsbolla
og hins vegar þykkan, þungan
bakka, sem ég kenni við ferhyrning.
Bollarnir eru unnir út frá veltiformi
sem ég hef verið að vinna með í ýms-
um myndum en í bakkanum vinn ég
með samspil pósitífs og negatífs
forms.“
Kristín segir hátíðina hafa verið
mjög glæsilega í ár, en hún fór til
Ítalíu til að vera viðstödd opnunina.
„Það var upplifun út af fyrir sig að fá
að sjá svo mikið af ólíkum og spenn-
andi leirverkum. Þá er það ekki síður
spennandi fyrir leirlistamann að
koma á þessar slóðir, og notaði ég
tækifærið til að skoða hið fræga
keramiksafn borgarinnar og ferðast
um héraðið. Ég skoðaði m.a. Bologna
og Ravenna, sem er fræg fyrir mós-
aíkskreytingar. Ég var reyndar ein á
ferð og þurfti aðallega að bjarga mér
á fingramáli þar sem fáir skildu
ensku og ég enga ítölsku. Oft urðu
þessi tjáskipti að sprenghlægilegum
uppákomum. Eftir ferðina hef ég
hins vegar smitast af Ítalíuveikinni
alræmdu!“ segir Kristín hlæjandi og
bætir því við að boð sem hún hlaut
ásamt nokkrum íslenskum lista-
mönnum um að sýna verk sín á sér-
stakri opnunarsýningu við vígslu
menningar- og fræðaseturs í bænum
Asti á Ítalíu í júní síðastliðnum hafi
verið einstaklega kærkomið í því
samhengi.
Viðburðaríkt ár
Kristín Garðarsdóttir er ein tíu
listamanna sem reka Meistara Jak-
ob, listhús við Skólavörðustíg, en þar
sýna listamennirnir og selja verk sín
og veita viðskiptavinum faglega ráð-
gjöf. Kristín segir undanfarið ár hafa
verið mjög viðburðaríkt og hafi sex
mánaða laun úr launasjóði lista-
manna gert henni kleift að einbeita
sér að listsköpuninni og undirbúa
sýningar. „Ég hélt einkasýningu í
Galleríi Ófeigs á árinu og sýndi í vor
á borðbúnaðarsýningu sem samtök-
in Handverk og hönnun stóðu fyrir.
Þá höfum við sem stöndum að Meist-
ara Jakob tekið þátt í ýmsum sýn-
ingarverkefnum og var sýningin í
Asti þeirra á meðal, auk sýningar í
Listasafni ASÍ sem haldin var í kjöl-
farið. Hópurinn sem um ræðir sam-
anstendur af tíu listamönnum sem
starfa ýmist á sviði leirlistar, veflist-
ar, grafíkur eða listmálunar. Nú
stendur hópurinn fyrir lítilli sýningu
í Listhúsi Ófeigs og sýni ég þar gler-
glös sem eru í beinu framhaldi af því
sem ég var með á Faenza-tvíæringn-
um.“
Að undanförnu hefur Kristín verið
að standsetja nýja vinnustofu í
Hamraborg 1 í Kópavogi og er því
rétt að byrja að vinna aftur þessa
dagana. En hvað er á döfinni?
„Framundan hjá mér þessa dag-
ana er þátttaka í tveimur sýningum,
annars vegar í Voss í Noregi, þar
sem hópurinn úr Meistara Jakob
sýnir saman, m.a. með norska lista-
manninum Egil Røed. Hin sýningin
verður í Stokkhólmi, opnuð 6. febr-
úar, og er haldin í tengslum við stóra
húsgagnahönnunarsýningu. Yfir-
skrift sýningarinnar sem ég tek þátt
í er 5X5 og verða þar sýnd verk eftir
fimm hönnuði frá hverju Norður-
landanna. Ég mun sýna gler og ker-
amík, en auk mín sýna Vala Torfa-
dóttir og Björg Ingadóttir í
Spaksmannsspjörum, Hannes Lár-
usson, Erla Sólveig Óskarsdóttir og
Steinunn Sigurðardóttir.“ Kristín
segist að lokum vera bjartsýn á
framtíðina á sínu sviði, þar sem tals-
verð vakning hafi átt sér stað gagn-
vart sérstæðum og persónulegum
nytjahlutum til daglegra nota. „Það
verður spennandi að taka þátt í sam-
vinnuverkefnum á borð við það sem
er að hefjast núna úti í Stokkhólmi.
Ég held að ástæða sé til að hafa
mikla trú á kynningu íslenskrar
nytjalistar og hönnunar á erlendum
vettvangi, enda er mikið að gerast í
þessari grein,“ segir Kristín að lok-
um.
Leirlist heima
og heiman
Nýlega lauk 52. alþjóðlega leirlistartvíæringnum í
Faenza á Ítalíu. Meðal þátttakenda var Kristín
Sigfríður Garðarsdóttir leirlistakona og ræddi
Heiða Jóhannsdóttir við hana af því tilefni.
Meðal verka sem Kristín sýndi á alþjóðlega leirlistartvíæringnum í
Faenza er bakkinn „Ferhyrningur“ þar sem unnið er með samspil
pósitífra og negatífra forma.
Morgunblaðið/Sverrir
Kristín Sigríður Garðarsdóttir
leirlistakona á vinnustofu sinni. heida@mbl.is
TUMI Magnússon, myndlistarmaður
og prófessor, heldur fyrirlestur í
LHÍ í Laugarnesi kl. 12.30 á mánu-
dag. Tumi fjallar um tímahugtakið,
hvernig það snýr að honum sjálfum
og nokkrum öðrum myndlistarmönn-
um og hvernig tíminn hefur tilhneig-
ingu til að laumast inn í verk þeirra.
Fyrirlestraröð um íslenska hönn-
unarsögu (1860–1960) hefst 11. mars.
Tímabilið hefst með brautryðjenda-
starfi Sigurðar Guðmundssonar
(1833–1874) og síðan verður þátttaka
Íslendinga í heimssýningum reifuð,
lýkur með umfjöllun um hönnunartil-
raunir sjötta áratugarins. Kennari
Arndís S. Árnadóttir.
Námskeið
Tölvunámskeið, Illustrator, hefst
nk. föstudag. Þar verður kennd let-
urnotkun og munsturgerð og settir
upp litlir bæklingar eða myndverk.
Nauðsynlegt er að þátttakendur hafi
grunnþekkingu á photoshop. Kenn-
ari er Höskuldur Harri Gylfason,
myndlistarmaður og grafískur hönn-
uður.
Fyrirlestrar og námskeið í LHÍ
VIÐ athöfn í Lista-
safni Íslands á
föstudag tók Mar-
grét Blöndal mynd-
listarmaður við
styrk úr sjóði Rich-
ards Serra en hann
er veittur annað
hvert ár.
Margrét fæddist
1970 og að loknu
námi við Mennta-
skólann í Reykjavík
og Handíða- og myndlistaskóla Ís-
lands stundaði hún framhaldsnám í
myndlist við Rutgers University í
Bandaríkjunum.
Í ávarpi við athöfnina sagði dr.
Ólafur Kvaran, safnstjóri Listasafns
Íslands, að list Margrétar hefði hún
sjálf kallað „jarðfræði heimilisins“.
Margrét er þekkt víða um heim fyrir
samstarf sitt við bandarísku lista-
konuna Roni Horn.
Styrkurinn nemur 400.000 kr. og
er því ein af veglegustu viðurkenn-
ingum sem veittar eru hérlendis á
lista- og menningarsviðinu. Sam-
kvæmt reglugerð sjóðsins er til-
gangur hans að efla höggmyndalist
á Íslandi með því að styrkja og
hvetja myndhöggvara.
Sjóðurinn var stofnaður árið 1990
að tilhlutan bandaríska myndhöggv-
arns Richard Serra í tilefni þess að
verk hans
„Áfangar“ var
reist í Viðey.
Serra ákvað að
gefa íslensku
þjóðinni andvirði
þess verks en
Listahátíð í
Reykjavík,
Reykjavík-
urborg og Lista-
safn Íslands tóku
að sér að reisa
það og stofna fyrrgreindan sjóð sem
ber nafn hans. Eftir að Listahátíð
lauk 1990 varð að samkomulagi að
Reykjavíkurborg hefði umsjón með
verki Serra í Viðey en Listasafn Ís-
lands umsjón með sjóðnum.
Samkvæmt skipulagsskrá sjóðsins
sem unnin var í samvinnu við sam-
tök listamanna er stjórnin skipuð
þremur mönnum: einum frá Sam-
bandi íslenskra listamanna, öðrum
frá Myndhöggvarafélaginu í
Reykjavík og hinum þriðja frá Lista-
safni Íslands, sem jafnframt er for-
maður stjórnar. Veita skal styrki úr
sjóðnum annað hvert ár og er ekki
veitt samkvæmt umsóknum.
Fjórir listamenn hafa áður fengið
styrki úr sjóðnum, Ólafur Sveinn
Gíslason, Sólveig Aðalsteinsdóttir,
Þorvaldur Þorsteinsson og Halldór
Ásgeirsson.
Margrét Blöndal
hlýtur styrk
Ólafur Kvaran, forstöðumað-
ur Listasafns Íslands, og verð-
launahafinn, Margrét Blöndal.