Morgunblaðið - 24.12.2002, Blaðsíða 11

FRÉTTIR
MORGUNBLAÐIÐ ÞRIÐJUDAGUR 24. DESEMBER 2002 11
AÐ MÖRGU er að huga fyrir jólin
og margur bíleigandinn sættir sig
ekki við annað en hreinan og strok-
inn bíl um hátíðirnar. Ragnar Ósk-
arsson hjá Bílaþvottastöðinni Spikk
og span við Bíldshöfða hafði í nógu
að snúast seinnipartinn í gær við að
taka bílana í jólabað.
Morgunblaðið/Ingó
Bíllinn í jólabað
SÖNGKONURNAR Hjördís Elín
Lárusdóttir og Guðrún Árný Karls-
dóttir afhentu í gær forráðamönnum
Barnaspítala Hringsins 50 þúsund
króna framlag sem renna á til upp-
byggingar spítalans.
Að sögn Hjördísar var vel tekið á
móti þeim og var þeim boðið að heim-
sækja spítalann þegar hann verður
formlega opnaður 26. janúar nk.
Nítjánda desember sl. sungu þær
á tónleikum í Seltjarnarneskirkju og
var ákveðið að láta aðgangseyri
renna óskiptan til spítalans. Undir-
leikari á tónleikunum var Þórir Úlf-
arsson en einnig komu fram karla-
kórinn Stefnir auk þess sem
brasskvartett sté á svið.
50 þúsund til
barnaspítalans
AFTANSÖNGUR í Grafarvogs-
kirkju verður útvarpað á Netinu á
aðfangadag og verður útsendingin
aðgengileg frá mbl.is.
Prestur verður sr. Vigfús Þór
Árnason og organisti Hörður Braga-
son. Kór Grafarvogskirkju syngur,
einsöngvari er Egill Ólafsson. Birgir
Bragason leikur á kontrabassa,
Bryndís Bragadóttir á lágfiðlu og
Hjörleifur Valsson á fiðlu. Til að
horfa á útsendinguna þarf ókeypis
hugbúnað frá Microsoft, Windows
Media Player, sem hægt er að sækja
til Microsoft ef hann er ekki til stað-
ar á tölvu viðkomandi.
Þegar líður að útsendingunni, sem
hefst kl. 18, verður hægt að smella á
tengilinn Aftansöngur í Grafarvogs-
kirkju undir liðnum Nýtt á mbl.is
efst til hægri á forsíðu mbl.is. Síminn
Internet annast tæknilega hlið út-
sendingarinnar.
Messa á mbl.is
HÉRAÐSDÓMUR Reykjavíkur
hefur dæmt þrjá menn í þriggja
mánaða fangelsi fyrir að falsa fimm
þúsund króna seðla. Refsingin er
skilorðsbundin til tveggja ára.
Mennirnir notuðu tölvu og litaprent-
ara í eigu eins þeirra til að falsa seðl-
ana en 14 slíkir voru notaðir í við-
skiptum. Þáttur þeirra í fölsunum
var misstór en alls voru 54 seðlar
falsaðir. Mennirnir játuðu brot sín.
Auk tölvubúnaðarins var lítilræði af
fíkniefnum gert upptækt. Hjördís
Hákonardóttir kvað upp dóminn.
Kolbrún Sævarsdóttir saksóknari
sótti málið f.h. ríkissaksóknara, Jó-
hannes Rúnar Jónsson hrl. var til
varnar fyrir einn þeirra en hinir voru
ekki með skipaða verjendur.
Dæmdir fyrir
að falsa seðla
SJÓÐUR íslenskra kvenna fékk
úthlutað 10 milljónum króna á fjár-
lögum 2003 til stuðnings lækningu
á mænuskaða. Framkvæmdastjóri
Alþjóða heilbrigðismálastofnunar-
innar (WHO) hefur sýnt málinu
áhuga og er áfram unnið að því að
stofna hérlendis samstarfsmiðstöð
í málefnum mænuskaddaðra.
Í júní 2001 var haldið hér á landi
málþing um mænuskaða, sem Al-
þjóða heilbrigðismálastofnunin og
íslensk stjórnvöld stóðu fyrir að
frumkvæði Auðar Guðjónsdóttur,
hjúkrunarfræðings. Þar vaknaði
hugmynd að stofnun alþjóðlegs
gagnabanka um mænuskaða og
hefur verið unnið að málinu síðan.
Jón Kristjánsson, heilbrigðisráð-
herra, segir að í vor hafi hann
skrifað Gro Harlem Brundtland,
framkvæmdastjóra WHO, bréf
vegna málsins og í svari hennar
síðsumars hafi komið fram að hún
vildi stuðla að því að hér yrði kom-
ið á fót samstarfsmiðstöð í mál-
efnum mænuskaddaðra. Ef af yrði
myndi sú miðstöð væntanlega rísa
við Landspítalann – háskólasjúkra-
hús og hefði málið verið rætt við
forsvarsmenn sjúkrahússins og
Auði Guðjónsdóttur. „Við hittumst
aftur eftir áramótin,“ segir Jón og
bætir við að þá verði farið yfir
framhaldið.
Jón segir að ekki hafi verið tekin
ákvörðun um frekari stuðning að
svo stöddu enda eigi fjárveitingin
að vera nægileg til að koma málinu
á verulega hreyfingu. Viss skilyrði
þurfi að uppfylla til að koma
gagnabankanum á fót, en málið sé í
ákveðnum farvegi og áhugi sé fyrir
því að ýta því áfram.
Mænuskaðagagna-
banki á fjárlögum
HJÖRLEIFUR Guttormsson, fyrr-
verandi alþingismaður og ráðherra,
gagnrýnir Ingibjörgu Sólrúnu Gísla-
dóttur harðlega í grein sem birtist í
DV í gær. Í greininni segir Hjörleif-
ur óraunsætt að Ingibjörg Sóllrún
geti haldið stöðu sinni lengur sem
borgarstjóri og „leikið þannig tveim-
ur skjöldum“. Því muni Sjálfstæð-
isflokkurinn nú leita samstarfs við
aðra flokka um stjórn Reykjavíkur,
að hans mati, og fari svo byrji Ingi-
björg afskipti sín af landsmálum með
„sviðna jörð að baki“. Þá segir Hjör-
leifur: „Ekki verður annað séð en
hér sé um sögulegan afleik af hennar
hálfu að ræða. Hver getur treyst
stjórnmálamanni til frekari forystu
sem gengur jafn rækilega á bak orða
sinna? Nóg var fyrir Samfylkinguna
að hafa Össur á oddinum með þann
ótrúverðuga blæ sem lengi hefur
fylgt honum sem stjórnmálamanni,
þótt meinsæri Ingibjargar bættist
ekki við í áru flokksins.“
Hjörleifur segir ljóst að Ingi-
björgu verði teflt fram sem „aðal-
trompi og leiðtogaefni Samfylking-
arinnar“.
Hafa orðið þáttaskil
Valgerður Sverrisdóttir, iðnaðar-
og viðskiptaráðherra, fjallar um
framboðsmál Ingibjargar Sólrúnar í
pistli á vefsíðu sinni valgerdur.is.
Þar segir hún m.a.: „Ákvörðun Ingi-
bjargar Sólrúnar Gísladóttur um
framboð til Alþingis er tekin með
hagsmuni Samfylkingarinnar í huga.
Reykjavíkurlistanum er fórnað. Að
sjálfsögðu hefði það átt að liggja fyr-
ir við borgarstjórnarkosningarnar í
maí sl. að það kæmi til greina af
hálfu Ingibjargar Sólrúnar að skella
sér í þingframboð. Það hefði í mínum
huga breytt afstöðu Framsókn-
arflokksins til samstarfsins um
Reykjavíkurlistann. Ingibjörg Sól-
rún hélt því ítrekað fram að hún væri
ekki á leið í þingframboð fyrir örfá-
um mánuðum, þegar hún leitaði eftir
endurkjöri sem borgarstjóri. Ekkert
hefur gerst sem kallar á breytt við-
horf hennar til þess. Það verður að
álíta sem svo að þetta framboð hafi
ávallt komið til greina af hennar
hálfu.
Tvennt stendur upp úr við ákvörð-
un Ingibjargar Sólrúnar. Annars
vegar hefur hún gengið svo berlega á
bak orða sinna að hún stendur
sködduð eftir. Hins vegar kallar
framkoma Samfylkingarinnar fram
spurningar um hæfni hennar til sam-
starfs við aðra stjórnmálaflokka.
Þetta tvennt verður Samfylkingunni
til vandræða í komandi þingkosn-
ingum.
Ingibjörg Sólrún á fullt erindi í
landsmálin, en þá verður hún að
fórna borgarstjórastólnum. Það hafa
orðið þáttaskil. Nú lít ég á Ingi-
björgu Sólrúnu Gísladóttur sem
hvern annan andstæðing minn í póli-
tík. Því kveð ég hana sem samherja
og þakka fyrir samstarfið.“
Spunafréttir
Björn Bjarnason, alþingismaður
og oddviti Sjálfstæðisflokksins í
borgarstjórn Reykjavíkur, fjallar
einnig um framboðsmál borgarstjóra
í pistli á vefsíðu sinni bjorn.is. Segist
Björn hafa þóst heyra „spunafréttir“
í hádegisfréttum Bylgjunnar og
hljóðvarps ríkisins á sunnudag sem
ættu rætur að rekja til þeirra, sem
vilji skapa óvild á milli sjálfstæð-
ismanna og framsóknarmanna í von
um, að það spilli fyrir því, sem um sé
slúðrað vegna upplausnarinnar inn-
an R-listans.
Vísar Björn m.a. til fréttar á
Bylgjunni um að Björn og Guðlaug-
ur Þór Þórðarson, stjórnarmenn af
hálfu Sjálfstæðisflokksins í Orku-
veitu Reykjavíkur, hefðu gagnrýnt
Alfreð Þorsteinsson og gefið hafi
verið til kynna, að þess vegna gætu
framsóknarmenn ekki litið sjálf-
stæðismenn réttu auga sem sam-
starfsmenn, ef R-listinn liðaðist í
sundur.
„Mórallinn í spunanum var þessi:
Hvernig í ósköpunum halda menn,
að þeir Björn Bjarnason og Alfreð
Þorsteinsson geti starfað saman eft-
ir það sem á undan er gengið vegna
ágreinings innan stjórnar Orkuveitu
Reykjavíkur eða gagnrýni Björns á
Alfreð? Ef einhver hefði ætlað að
spinna á þann veg, að víst gætum við
Alfreð starfað saman, hefði sá hinn
sami getað vakið athygli á því, að við
höfum um áratugaskeið átt saman
sæti í stjórn Samtaka um vestræna
samvinnu, en Alfreð er í þeim armi
Framsóknarflokksins, sem styður
NATO-aðild og varnarsamstarfið við
Bandaríkin á tímum kalda stríðsins
og síðan. Brast sú samstaða ekki á
miklu meiri spennutímum í íslensk-
um stjórnmálum en nú ríkja,“ segir
Björn í pistlinum.
Hörð gagnrýni
á borgarstjóra
HLUTVERK endurskoðenda hjá
Reykjavíkurborg mun verða skýrara
og veigameira en mögulegt er með
núverandi fyrirkomulagi, að því er
fram kemur í greinargerð starfshóps
sem fjallað hefur um undirbúning
breytinga á endurskoðun hjá borg-
inni. Stefnt er að því að leggja niður
embætti Borgarendurskoðunar frá
og með 28. febrúar á næsta ári sam-
kvæmt tillögu borgarstjóra og for-
seta borgarstjórnar.
Samkvæmt tillögunni verður öll-
um starfsmönnum stofnunarinnar,
átta talsins, sagt upp störfum frá og
með 1. janúar nk. Jafnframt er lagt
til að til starfa taki ný deild, innri
endurskoðunardeild, sem í skipuriti
heyri beint undir borgarstjóra. Störf
í nýju endurskoðunardeildinni verða
auglýst laus til umsóknar og er mið-
að við að starfsemin hefjist 1. mars
2003. Fram kemur að borgarstjóri
muni kanna hvort finna megi önnur
störf við hæfi hjá Reykjavíkurborg
handa þeim starfsmönnum sem
missa vinnuna hjá Borgarendur-
skoðun. Þess má geta að í september
sl. var fjórum starfsmönnum Borg-
arendurskoðunar sagt upp störfum.
Í greinargerð starfshóps sem unn-
ið hefur að breytingum á endurskoð-
un hjá borginni segir að innri endur-
skoðun sé sú starfsemi sem miði að
því að tryggja að innra eftirlit sé
virkt og áhættu sé stýrt. Eigi það
bæði við um fjárhagslega þætti
starfseminnar svo og aðra þætti
hennar.
Innri endurskoðanda sé ætlað að
skoða með skipulegum hætti þá
verkferla sem unnið sé eftir hjá við-
komandi fyrirtæki eða stofnun, leita
að veikleikum og gera tillögur að úr-
bótum. Hann á einnig m.a. að kanna
hvort unnið sé í samræmi við ákvarð-
anir stjórnenda, hvort starfsreglur
séu virtar og lög og aðrar viðmiðanir.
Fram kemur að ytri endurskoð-
andi borgarinnar hafi ekki það hlut-
verk að fylgjast frá degi til dags með
virkni eftirlits borgarinnar og ein-
stakra stofnana hennar. Hins vegar
hefði innri enduskoðun það hlutverk
m.a. að koma upp um misferli, veita
ráð um úrbætur í eftirliti og sinna
ýmsum þeim aðgerðum sem auka
skilvirkni borgarkerfisins.
Í tillögu borgarstjóra og forseta
borgarstjórnar segir að hlutverk
hinnar nýju innri endurskoðunar
verði ólíkt verkefnum Borgarendur-
skoðunar, stjórnskipuleg staða verði
önnur og tilkall til þekkingar annað
en sé hjá ytri endurskoðun. Lagt er
til að hin nýja innri endurskoðunar-
deild muni ekki bera nafnið Borg-
arendurskoðun.
Málefnalegar ástæður
Þar segir enn fremur að Reykja-
víkurborg hafi eitt sveitarfélaga nýtt
sér heimild í sveitarstjórnarlögum
að fela sérstakri endurskoðunar-
stofnun á vegum sveitarfélagsins að
endurskoða borgarsjóð, stofnanir og
fyrirtæki borgarinnar.
Þar segir að búið sé að bjóða út
enduskoðunarþjónustu fyrir A-hluta
borgarsjóðs og B-hluta fyrirtækin,
Reykjavíkurhöfn, Fráveitu og Bíla-
stæðasjóð Reykjavíkur. Þá hafi lög-
giltir endurskoðendur verið ráðnir
til að sinna endurskoðun annarra
fyrirtækja borgarinnar. Bent er á að
þar með séu í raun brostnar forsend-
ur sem sé að finna í 68. gr. sveit-
arstjórnarlaga fyrir því að borgin
haldi úti enduskoðunarstofnunum.
Á fundi borgarráðs sl. þriðjudag
óskaði Vilhjálmur Þ. Vilhjálmsson,
borgarfulltrúi D-lista, umsagnar
borgarlögmanns um hvort hann teldi
að með vísan til samþykktar borg-
arstjórnar 18. apríl sl. um framtíð
Borgarendurskoðunar, væru mál-
efnalegar ástæður til að leggja niður
deildina.
Afgreiðslu málsins var frestað á
fundi borgarstjórnar í fyrradag.
Ný innri endurskoðunardeild tekur við af Borgarendurskoðun eftir áramót
Öllum átta starfsmönnum
verður sagt upp störfum
♦ ♦ ♦
♦ ♦ ♦