Morgunblaðið - 22.06.2003, Blaðsíða 16

16 SUNNUDAGUR 22. JÚNÍ 2003 MORGUNBLAÐIÐ
E
LDHÚSBORÐIÐ
hjá hjónunum Þóru
Guðmundsdóttur og
Arngrími Jóhanns-
syni, stofnendum
flugfélagsins Atl-
anta, hefur lengi
verið miðpunktur
ýmissa mikilvægra ákvarðana um
rekstur félagsins. „Það er líklega
eins gott að það getur ekki talað,“
segir Þóra þar sem þar hafi farið
fram margs konar umræður og
vangaveltur um starfsemina, stund-
um viðkvæmar og stundum erfiðar
en þó aðallega áhugaverðar.
Þau hjón standa á nokkrum tíma-
mótum eftir breytingar á eignar-
haldi félagsins nokkru fyrir síðustu
áramót. Rætt var við þau á dög-
unum í tilefni þessara tímamóta og
rétti vettvangurinn var áðurnefnt
eldhúsborð. Magnús Þorsteinsson,
sem lengi hefur stundað alþjóða-
viðskipti, keypti í nóvember hlut
Búnaðarbankans í fyrirtækinu og
bætti við nokkru hlutafé auk þess
sem hann keypti einnig hlut af hjón-
unum. Á hann nú 51,5% í félaginu
en þau Þóra og Arngrímur 48,5%.
Hjónin og Magnús sitja í stjórn fé-
lagsins og Arngrímur er eftir sem
áður stjórnarformaður. Forstjóri er
Hafþór Hafsteinsson, sem lengi hef-
ur starfað hjá fyrirtækinu og tók
við forstjórastarfinu í september
2001. Arngrímur segir Hafþór hafa
sýnt mikla skipulagshæfileika allt
frá því hann hóf störf hjá félaginu
fyrir allmörgum árum en hann
starfaði m.a. við flugumsjón, var
stöðvarstjóri, flugmaður, flug-
rekstrarstjóri og síðan forstjóri.
Hjónin segjast nú hafa dregið sig
talsvert út úr daglegu amstri í
rekstrinum. En hvernig gengur að
láta öðrum eftir hina daglegu
stjórnartauma?
„Það er erfitt,“ segir Þóra strax,
„þetta er barnið okkar og það er
ekki nema 15 ára en auðvitað þurfa
foreldrar að sleppa hendinni af
börnum sínum fyrr eða síðar.“ Arn-
grímur segir að með hraðri stækk-
un fyrirtækisins síðustu árin og
mjög aukinni veltu, um 20 millj-
arðar króna á ári, hafi verið svo
komið að fleiri yrðu að axla skuld-
bindingar sem svona rekstur krefð-
ist. „Þetta var því líka ákveðinn létt-
ir fyrir okkur. Við áttum fyrirtækið
ein og reyndar voru nokkrir í fjöl-
skyldunni með örlítinn hlut. Það
gekk ekki að skuldbinda aðra í slík-
um rekstri og Búnaðarbankinn, sem
keypti hlut fyrir nokkrum árum,
hafði alltaf sagt að hlutverk hans
væri bankastarfsemi en ekki flug-
rekstur. Þess vegna var það orðið
ljóst að fá þurfti sterkan aðila í fé-
lagið. Við vorum í raun líka búin að
vera of upptekin af daglegri stjórn
og verkefnum félagsins og því orðið
nauðsynlegt að taka fjármálin í dá-
litla skoðun og endurskipuleggja
þau. Með tilkomu Magnúsar var
nokkrum skammtímalánum breytt í
lengri lán og félagið var þá tilbúið í
næsta áfanga til að stækka og
þróast og stendur sá tími nú yfir.
Þannig að með þessari endurskipu-
lagningu er peningalegum áhyggj-
um létt af okkur. Fyrirtækið stend-
ur mjög vel, eiginfjárhlutfallið er
30% sem er mjög sterkt og við
sjáum ekki fram á annað en áfram-
haldandi vaxtarmöguleika.“
Höfðu lengi þekkst
Hvernig lágu leiðir ykkar Magn-
úsar saman?
„Hann fann mig eiginlega,“ segir
Arngrímur. „Við höfum þekkst
lengi og Magnús, sem er sérfræð-
ingur í viðskiptum á alþjóðlega vísu,
er líka einkaflugmaður, á þrjár litl-
ar flugvélar og það er hægt að ræða
við hann um flug þar sem hann er
líka vel heima í þeim efnum. En það
er fyrst og fremst þekking Magn-
úsar í viðskiptum sem við njótum
góðs af.“
Arngrímur og Þóra segja að þrátt
fyrir breytingar á eignarhaldi sjái
þau ekki neina byltingu fram und-
an, frekar verði um hægfara þróun
að ræða. „Við erum því alveg róleg
með þetta og við í stjórninni og
Hafþór forstjóri ræðum jafnan um
reksturinn nokkrum sinnum í viku.“
Arngrímur nefndi vaxtarmögu-
leika og er spurður nánar um það
atriði. „Við höfum alltaf viljað ráða
ferðinni og viljað stækka smám
saman. Núna eru 28 þotur í rekstri
Morgunblaðið/Jim Smart
Þóra Guðmundsdóttir og Arngrímur Jóhannsson við eldhúsborðið góða þar sem þau hafa löngum ráðið ráðum sínum varðandi rekstur Atlanta.
Erfitt en líka
ákveðinn léttir
Þotur frá Atlanta í litum Saudia Air í pílagrímaflugi.
Morgunblaðið/RAX
Hér er Arngrímur Jóhannsson í essinu sínu, undir stýri á Pitts Special.
Ljósmynd/Tryggvi Valgeirsson
Boeing 747-risaþota Flugfélagsins Atlanta var aðalsýningargripurinn með ís-
lenska og bandaríska fánann á flugsýningu í Oshkosh í Bandaríkjunum.
Með breyttu eignarhaldi í flugfélaginu Atlanta eru stofnendurnir, hjónin
Þóra Guðmundsdóttir og Arngrímur Jóhannsson, smám saman að láta
öðrum eftir daglega stjórnartauma. Jóhannes Tómasson ræddi við þau um
þessar breytingar um leið og þau rifjuðu upp fyrstu árin.
Stofnendur Atlanta draga sig úr daglegu amstri í rekstrinum