Morgunblaðið - 04.06.2004, Blaðsíða 27
LISTIR
MORGUNBLAÐIÐ FÖSTUDAGUR 4. JÚNÍ 2004 27
GRADUALEKÓR Langholts-
kirkju fer í tónleikaferð um
helgina. Fyrstu tónleikarnir verða
í Dalabúð í Búðardal í kvöld kl. 21.
Á laugardeginum verða tónleikar í
Hólmavíkurkirkju kl. 17. Á sjó-
mannadaginn 6. júní syngur kórinn
við messu í Ísafjarðarkirkju og
heldur tónleika í kirkjunni kl. 17
sama dag.
Á efnisskrá verða sýnishorn af
verkefnaskrá vetrarins. Fluttir
verða þættir úr Gloriu eftir Vivaldi
og einnig úr páskaverkinu Håb eft-
ir danska tónskáldið John Høybye.
Auk þess verða á efnisskránni vor-
og sumarlög, íslensk og erlend m.a.
Johann Strauss.
Einsöngvarar úr röðum kór-
félaga verða María Vigdís Kjart-
ansdóttir og Þóra Sif Friðriksdótt-
ir en þær luku báðar grunnprófi nú
í vor frá söngdeild Kórskóla Lang-
holtskirkju en það samsvarar 3.
stigi eftir gamla tónlistarskóla-
kerfinu.
Sl. sumar fór kórinn í tónleika-
ferð til Finnlands, þar sem hann
var gestur á Sympatti-kórahátíð-
inni. Kórarnir héldu sameiginlega
tónleika í upphafi og í lok ferðar-
innar en fóru síðan hver fyrir sig í
viku tónleikaferð um Finnland.
Kórfélagar eru á aldrinum 12–18
ár. Stjórnandi kórsins hefur frá
upphafi verið Jón Stefánsson.
Gradualekórinn á faraldsfæti
Eitt óbrigðult merki þessað sumarið sé gengið ígarð er þegar Brúðubíll-inn hefur starfsemi sína,
en í dag frumsýnir Brúðubíllinn
Bláref barnapíu í Árbæjarsafninu
kl. 14. Allt var á fullu við undirbún-
ing þegar blaðamaður kom við í
Brúðubílnum, þar sem hann stóð á
vesturbakka Tjarnarinnar, fyrir
neðan leikskólann Tjarnarborg,
fyrr í vikunni og náði tali af Helgu
Steffensen, umsjónarmanni Brúðu-
bílsins; Vigdísi Másdóttur, sem
stjórnar brúðunum ásamt Helgu,
og Birgi Ísleifi Gunnarssyni, bíl-
stjóra og tæknimanni sýning-
arinnar. „Ég er svo heppin að hafa
sama fólkið með mér í Brúðubíln-
um núna og í fyrrasumar, enda af-
ar gott að vera með vant fólk með
sér,“ segir Helga, en Vigdís stjórn-
aði brúðunum með Helgu síðasta
sumar og Birgir hefur keyrt
Brúðubílinn síðustu fjögur sumur.
Þau voru bæði sammála um að ekki
væri hægt að hugsa sér skemmti-
legri sumarvinnu, enda fátt
ánægjulegra en að sýna krökkum
brúðuleiksýningu.
Líkt og síðustu sumur mun
Brúðubíllinn sýna á gæsluvöllum
Reykjavíkur og útivistarsvæðum í
júní og júlí. Boðið verður upp á
tvær sýningar í sumar, því í júní
mun Brúðubíllinn sýna Bláref
barnapíu en í júlí verða sagðar
Sögur úr Brúðubílnum. Sýnt er
tvisvar á dag, annars vegar kl. 10
og hins vegar kl. 14 og tekur hver
sýning um 30 mínútur, enda mik-
ilvægt, að sögn Helgu, að sníða
sýningarnar að þörfum barnanna
og hafa þær ekki of langar. Sem
fyrr er tónlistin fyrirferðarmikil í
sýningum Brúðubílsins og segist
Helga velja lög sem sungin eru á
leikskólunum þannig að krakkarnir
eigi auðvelt með að taka undir.
Í gegnum tíðina hefur oft verið
ákveðið þema ríkjandi á hverju
sumri og í ár má segja að þema
Brúðubílsins séu refir og úlfar.
„Þannig vill til að í fyrra bættist
Blárefur í leikarahóp Brúðubílsins
og varð hann svo vinsæll meðal
áhorfenda að við sáum ástæðu til
að hafa hann aftur með í sumar,“
segir Helga og það er engum of-
sögum sagt að Blárefur sé vinsæll,
því meðan þremenningarnir voru
að æfa leikinn fylgdust krakkarnir
á Tjarnarborg spennt með og
gerðu sitt besta til að ná athygli
Blárefs, ýmist með vinki eða hróp-
um. Þegar æfingunni síðan lauk
trítlaði Vigdís, í hlutverki Blárefs,
yfir til þeirra til að heilsa upp á
þau og vakti það mikla kátínu
krakkanna.
Blárefur er einmitt í aðal-
hlutverki í Bláref barnapíu því í
sýningunni situr hann uppi með
þrjá litla frændur sína sem hann
þarf að passa. Hann kemst að því
hve mikið púl það er að vera
barnapía og reynir allt hvað hann
getur til að fá Lilla til að hjálpa sér
við verkið. Yrðlingunum þremur
finnst enda miklu skemmtilegra hjá
Lilla þar sem hann er mun dug-
legri að segja þeim sögur heldur en
Blárefur frændi. Meðal gesta sem
líta í heimsókn er Úlli úlfur, en
hann segir yrðlingunum þremur
hina réttu útgáfu af samskiptum
sínum við grísina þrjá. Því að sögn
Úlla má rekja ógæfu grísanna til
þess að hann var einfaldlega með
hræðilegt kvef þennan dag, auk
þess sem erindi hans til grísanna
var að hann vantaði bolla af sykri
til að geta bakað afmælisköku
handa ömmu sinni. Það verður síð-
an hver að gera upp við sig hvorri
sögunni hann trúir.
Handrit, brúðugerð og leikstjórn
er í höndum Helgu Steffensen. Um
leikraddir sjá Sigrún Edda Björns-
dóttir, Þórhallur Sigurðsson
(Laddi), Pálmi Gestsson, Valur
Freyr Einarsson, Helga Steffensen
og Vigdís Másdóttir. Tónlistar- og
upptökustjóri er Vilhjálmur Guð-
jónsson og búningar í höndum
Ingibjargar Jónsdóttur. Næstu
sýningar verða mánudaginn 7. júní
kl. 10 við Arnarbakka og kl. 14 við
Brekkuhús, en allar nánari upplýs-
ingar um sýningardaga og -staði
má finna í Dagbók Morgunblaðsins
og á vef ÍTR, en Brúðubíllinn
starfar á vegum ÍTR. Sem fyrr
mun Brúðubíllinn leggja land undir
fót og fara í leikferð út á land í
ágúst og september, en hægt er að
panta Brúðubílinn hvert á land sem
er. Þess má að lokum geta að sýn-
ing Brúðubílsins í sumar er, að
sögn Helgu, tileinkuð Jóni E. Guð-
mundssyni, myndlistarmanni og
brautryðjanda í brúðugerð, sem
nýverið féll frá, en það var Jón sem
stofnaði Brúðubílinn seint á átt-
unda áratugnum og rak hann í
nokkur ár áður en Helga tók við
árið 1980.
Brúðubíllinn frumsýnir í Árbæjarsafninu í dag
Blárefur snýr aftur
og gerist barnapía
Morgunblaðið/Ásdís
Helga Steffensen, Birgir Ísleifur Gunnarsson og Vigdís Másdóttir ásamt kunnuglegum persónum Brúðubílsins.
silja@mbl.is