Morgunblaðið - 28.12.2004, Blaðsíða 25

MORGUNBLAÐIÐ ÞRIÐJUDAGUR 28. DESEMBER 2004 25
MENNING
Það er allt á milljón, mikiðlíf og fjör,“ segir MagnúsGeir Þórðarson, leik-hússtjóri Leikfélags Ak-
ureyrar, en hann leikstýrir söng-
leiknum Óliver! sem frumsýndur
verður í Samkomuhúsinu í kvöld,
þriðjudagskvöldið 28. desember.
Það eru orð að sönnu, fólk á þönum
um allt hús, uppi á sviði og svölum
og á kaffistofunni, einn skrifar af
kappi á fartölvu, annar hellir upp á
og tilkynnir um nýtt kaffi, svo er
greinilega gott að halla sér aðeins í
rökkrinu í skotinu frammi við fata-
hengið, jafnvel þó verið sé að ryk-
suga og gera fínt þar rétt hjá.
Charles Dickens samdi söguna
um munaðarleysingjann Oliver
Twist um miðja 19. öldina og naut
hún strax mikilla vinsælda. Söng-
leikurinn Oliver er eftir Lionel
Bart og hefur verið með vinsælustu
söngleikjum heims frá því hann var
frumsýndur fyrir rúmum 40 árum,
árið 1960. Þá er kvikmyndaútgáfan
löngu orðin sígild. Í sögunni vakti
Dickens athygli á kjörum þeirra
sem minna mega sín og þar birtast
með eftirminnilegum hætti hin sí-
gildu átök hins góða og illa. Sagan
er, auk hins góða boðskapar,
spennandi, fyndin og skemmtileg,
persónurnar fjölbreyttar og litrík-
ar og bófaforinginn Fagin er löngu
kominn í hóp þeirra persóna sem
teljast sígildar í heimi bókmennt-
anna. Söngleikur Lionels Barts sló
í gegn um leið og hann var frum-
sýndur og var árum saman sýndur
fyrir fullu húsi í helstu borgum
heims, London og New York. Hann
hefur upp frá því reglulega ratað á
svið leikhúsa víða um heim og kvik-
mynd sem gerð var eftir sögunni
árið 1968 hlaut fjölda Ósk-
arsverðlauna. Síðast var söngleik-
urinn Óliver sýndur hér á landi í
Þjóðleikhúsinu árið 1989 og fékk
góða aðsókn.
Í mörg horn að líta
Sýning Leikfélags Akureyrar á
söngleiknum nú er afar viðamikil,
með stærstu uppsetningum félags-
ins frá upphafi en þegar best lætur
eru 47 manns á sviðinu í einu. Alls
taka um 60 manns þátt í flutningi
verksins, „og það er í ansi mörg
horn að líta, þakið hefur bók-
staflega verið að springa af húsinu
á stundum“, segir Magnús Geir.
Hann segir félaginu kleift að ráðast
í þetta stórvirki m.a. vegna þess að
búið er að lækka fastan kostnað og
þá hafi samstarf tekist með nokkr-
um aðilum, Sinfóníuhljómsveit
Norðurlands sem leggur til 13
hljóðfæraleikara sem leika með á
sýningum, Norðurorka tekur þátt
sem og KEA-Hótel, Visa og PWC.
Nú þegar er orðið uppselt á átta
fyrstu sýningarnar og segir Magn-
ús Geir það hljóta að vera eins-
dæmi. „Það virðist vera alveg rosa-
legur áhugi fyrir söngleiknum og
þá er líka ánægjulegt að finna að
LA er í miklum meðbyr um þessar
mundir. Fólk virðist líka almennt
vera spennt fyrir verkinu og leik-
urunum og þá má heldur ekki
gleyma því að þetta er einn vinsæl-
asti söngleikur allra tíma, í hópi
gömlu góðu söngleikjanna sem fólk
er almennt hrifið af,“ segir Magnús
Geir inntur eftir þessum geysilega
áhuga á sýningunni. Þá nefndi
hann einnig að fólk þekkti lögin úr
leiknum, þau væru grípandi og
skemmtileg „nánast hvert einasta
lag er þekkt og fólk hefur dillað sér
við þau árum saman, það er fátítt í
söngleik að svo til öll lögin eru frá-
bær“, og nefnir einnig að sögu-
þráðurinn, gleðin og sorgin höfðaði
ávallt til almennings. „Það var að
mínu mati komin tími til að Leik-
félag Akureyrar setti upp stóra
sýningu og við gátum komið því svo
fyrir að dæmið gekk upp núna,“
segir Magnús Geir, en hann nefndi
að sýningin væri í raun stærri en
húsið, „það er verið að leika upp
um alla veggi. Þetta var nokkurt
púsluspil að koma þessu öllu heim
og saman en það er að ganga upp.“
Þá nefndi leikstjórinn að alllangt
væri um liðið frá því söngleikur var
sýndur á Akureyri og eins að sig
hafi langað að bjóða upp á góða
skemmtun fyrir alla fjölskylduna.
Kraftmikið og gott fólk
Magnús Geir segir leikhópinn
ungan að árum, það hefði verið
meðvituð ákvörðun sín að hafa
þann háttinn á. „Þetta er mjög
kraftmikið og gott fólk sem tekur
þátt í sýningunni,“ segir hann.
„Þetta er sígild saga og ég valdi
þá leið í uppsetningunni að vera
henni trúr, þannig að sýningin er
alveg laus við alla stæla, þetta er
gamaldags og góð söngleikja upp-
setning,“ segir Magnús Geir. „Ég
vil fyrst og fremst koma sögunni
óbrenglaðri til skila, við erum ekki
að fara byltingarkenndar leiðir
hvað uppsetningu varðar; rista
verkið á hol og snúa upp í and-
hverfu sína, þannig held ég að
verkið höfði til sem flestra.“
Svo sem fyrr segir er uppselt á
fyrstu átta sýningarnar, en að sögn
Magnúsar Geirs er sýningarfyr-
irkomulagið þannig „að þetta er
keyrt hratt“ og sýnt frá fimmtu-
degi til sunnudags, fjórar sýningar
í viku og stefnt að því að sýningum
ljúki í febrúar, „en nú þegar er orð-
ið uppselt fram í miðjan janúar og
það er bara alveg æðislegt, við er-
um mjög ánægð með þau viðbrögð
sem við höfum þegar fengið,“ segir
Magnús Geir.
Leikhús | Leikfélag Akureyrar frumsýnir söngleikinn Óliver eftir Lionel Bart í Samkomuhúsinu
Sýningin eiginlega
stærri en húsið
Sungið og dansað. Alls taka um sextíu manns þátt í uppfærslu Leikfélags Akureyrar á Óliver.Óliver og Fagin. Gunnar Örn Stephensen og Ólafur Egill Egilsson.
Morgunblaðið/KristjánNansí, Fagin og strákarnir ráða ráðum sínum.
maggath@mbl.is
Höfundur:
Lionel Bart.
Leikstjóri:
Magnús Geir Þórðarson.
Hljómsveitarstjóri:
Guðmundur Óli Gunnarsson.
Leikmynd og búningar:
Sigurjón Jóhannsson.
Ljósahönnuður:
Þórður Orri Pétursson.
Danshöfundur:
Ástrós Gunnarsdóttir.
Gervahönnuður:
Fríða María Harðardóttir.
Framleiðslustjóri:
Ingibjörg Ösp Stefánsdóttir.
Þýðing: Gísli Rúnar Jónsson.
Helstu hlutverk: Ólafur Egill
Egilsson, Gunnar Örn Steph-
ensen, Þórunn Erna Clausen,
Jón Páll Eyjólfsson, Margrét
Eir Hjartardóttir, Ólafur Rún-
arsson, Esther Talia Casey, Jó-
hann Axelsson, Ninna Rún
Pálmadóttir, Skúli Gautason,
Þorsteinn Bachmann, Saga
Jónsdóttir.
Alls taka 18 börn þátt í sýning-
unni, 13 hljóðfæraleikarar og 6
manna kór.
Óliver!