Morgunblaðið - 15.11.2005, Qupperneq 22

22 ÞRIÐJUDAGUR 15. NÓVEMBER 2005 MORGUNBLAÐIÐ
MINNSTAÐUR
AKUREYRI
AUSTURLAND
Neskaupstaður | Nemendur í
10. bekk Nesskóla í Neskaup-
stað hafa í áratugi farið í
starfskynningu til flestra fyr-
irtækja í bæjarfélaginu á
hverjum miðvikudegi yfir
vetrartímann. Þannig fá
krakkarnir góða innsýn í at-
vinnulífið og kynnast hinum
fjölbreyttustu atvinnugrein-
um, s.s. fiskvinnslu, hársnyrt-
ingu, leikskólakennslu, lífrík-
isrannsóknum,
hjúkrunarstörfum og skrif-
stofustörfum, svo fátt eitt sé
nefnt. Hér má sjá Sólveigu
Kristínu Björgólfsdóttur og
Svein Má Ásgeirsson munda
víðsjár og spreyta sig á
greiningu ferskvatnslífvera
hjá Náttúrustofu Austur-
lands.
Morgunblaðið/Kristín Ágústsdóttir
Innsýn í
atvinnulíf
Egilsstaðir | Undanfarin ár hafa
Austfirðingar tekið sig saman og efnt
til Daga myrkurs í lok nóv-
embermánaðar. Í ár verða þeir
haldnir í fimmta sinn frá fimmtudeg-
inum 17. nóvember til sunnudagsins
20. nóvember nk.
Á hátíðinni koma heimamenn sam-
an og skemmta sér og öðrum í
skammdeginu með ýmsu móti. Farn-
ar verða kyndlagöngur í nokkrum
bæjum, hlýtt á draugasögur, haldin
sérstök notalegheitakvöld, sett upp
bílabíó, myrkraböll, sundlauga-
skemmtanir, handverkssýningar og
fjölda menningarviðburða er hleypt
af stokkunum. M.a. verður þreytt
svokallað Faðirvorahlaup á Djúpa-
vogi, kvöldmjaltir verða á Norðfirði,
afturganga á Seyðisfirði, ástareldur
kveiktur á Eskifirði og kynning á
myrkraverkum á Egilsstöðum, svo
fátt eitt sé nefnt.
Skólarnir á Austurlandi hafa alltaf
tekið þátt í hátíðinni með því að til-
einka námsefni þessara daga hátíð-
inni og er þemað hjá börnunum þessa
daga ljós, skuggar, draugar, stjörn-
ur, norðurljós og margt fleira tengt
myrkrinu. Á leikskólunum munu
börnin koma með ljós með sér og
skoða skugga og rannsaka myrkrið.
Mikið verður um tilboð í versl-
unum á svörtum vörum, ljósum ým-
iss konar og dekri sem hægt er að
njóta í rökkrinu og flug- og bifreiða-
fyrirtæki verða með tilboð á ferðum
austur.
Morgunblaðið/Steinunn Ásmundsdóttir
Leikið í svartnættinu Ýmsir menningarviðburðir og skemmtilegheit
verða á Austurlandi á Dögum myrkurs.
Myrkraverk á
Austurlandi
Vopnafjörður | Frítt var yfir láð
og lög í Vopnafirði á dögunum
þegar fréttaritari blaðsins, Jón
Sigurðarson, gekk til rjúpna á
Hellisheiði ásamt hundi sínum
Hectori. Böðvarsdalur blasir við
og lengra má sjá Hágangana.
Svo frískt var veðrið og um-
hverfið fagurt að tápið og fjörið
varð um of fyrir blessað hunds-
pottið. Hector fann sig því knúinn
til að hreykja sér hátt og
spangóla af öllum mætti út í víð-
áttuna.
Rjúpnaveiði gengur ágætlega
og töluvert af fugli, þó veiðimenn
séu almennt heldur kurteisir
hvað fjölda felldra fugla varðar.
Morgunblaðið/Jón Sigurðarson
Spangólað í víðáttuna
Egilsstaðir | Í haust fóru yfir 161
þúsund plöntur frá gróðrarstöðvun-
um Barra og Sólskógum á Fljóts-
dalshéraði til gróðursetningar. 93
þúsund plöntur voru gróðursettar á
svæði Héraðsskóga og tæp 69 þús-
und á svæði Austurlandsskóga. Hjá
Héraðsskógum var mestu plantað af
rússalerki, vörtubirki, alaskaösp og
sitkagreni, en hjá Austurlandsskóg-
um var mest gróðursett af sitkaelri,
rússalerki og birki. Töluvert hefur
verið jarðunnið nú í haust þótt snjór
og bleyta hafi gert mönnum lífið
leitt.
Þá gerðu Vopnafjarðarhreppur og
Austurlandsskógar nýverið með sér
samkomulag vegna framkvæmda á
jörðinni Þorbrandsstöðum í Hofsár-
dal. Er um að ræða mólendi í vest-
anverðum Þorbrandsstaðahálsi ofan
og utan við það land sem búið er að
skipuleggja sem sumarbústaðaland.
Búið er að gróðursetja um 70 þúsund
plöntur í land Þorbrandsstaða á veg-
um félagsskapar sem kallar sig
Landbót og hóf að gróðursetja á
jörðinni eftir 1990, en nú taka Aust-
urlandsskógar yfir umsjón með
svæðinu.
Mikið gróðursett af
rússalerki í haust
KRISTJÁN Þór Júlíusson bæjar-
stjóri sagðist ekki sammála því að
aðeins sé verið að hlusta á raddir ör-
fárra íbúa Akureyrar á kostnað
fjöldans þegar kemur að umferðar-
málum í Lundar- og Naustahverfi
og á Eyrarlandsholti. „Í því ferli
sem málið var sett í hafa verið
haldnir fundir með hagsmunaaðilum
og íbúum, bæði í viðkomandi hverfi
og eins opnir fundir. Þar gafst fólki
kostur á að koma sínum sjónarmið-
um á framfæri. Vissulega er það rétt
að það heyrðist meira í þeim sem
voru á móti en það höfðu allir tæki-
færi til að láta skoðanir sínar í ljós,“
sagði Kristján Þór.
Eins og fram kom í Morgun-
blaðinu fyrir helgina, hefur umferð
stórra bíla um Mýrarveg verið
bönnuð um nætur og helgar, að
kröfu íbúa á Eyrarlandsholti. Einnig
kom fram að íbúar við Mýrarveg og
í Naustahverfi væru mjög ósáttir við
að Dalsbrautin yrði ekki byggð
áfram frá Þingvallastræti suður að
Miðhúsabraut, sem skilur að
Naustahverfi og Eyrarlandsholt.
Íbúar í Lundarhverfi hefðu lagst
eindregið gegn því. Mikil umferð er
um Þórunnarstræti og hluta Þing-
vallastrætis og hefur það einnig ver-
ið gagnrýnt.
Kristján Þór sagði að sú gagnrýni
væri að hluta til rétt. Hann vísaði til
samþykktar bæjarstjórnar frá því í
sumar, á tillögu í átta liðum um sam-
ráðsferli vegna tengibrauta og
skipulagsmála í Lundar- og Nausta-
hverfi. Bæjarstjóri óskaði eftir því
að umhverfisráð gerði tillögur um
útfærslu á hluta tillaganna og hefði
eftir föngum samráð við íbúa Lund-
ar- og Naustahverfis.
Í tillögu eitt er lagt til að kannað
verði til hlítar hvaða möguleikar eru
á vegtengingu frá Naustahverfi nið-
ur á Drottningarbraut. Einnig að
hafinn verði undirbúningur að gerð
Miðhúsabrautar og miðað við að hún
liggi vestan Mjólkursamlags.
Í þriðja lagi að Dalsbraut verði
tekin út úr aðalskipulagi og þess í
stað gert ráð fyrir göngu- og hjól-
reiðastíg í vegstæðinu. Jafnframt
verði teknar upp viðræður við KA
um mögulega stækkun á núverandi
íþróttasvæði félagsins og um nýtt
svæði í Naustahverfi.
Kristján Þór sagði að þeir sem
gagnrýndu þessi mál þyrftu að hafa
þessa samþykkt bæjarstjórnar til
hliðsjónar og skoða málin í sam-
hengi. „Mér finnst umræðan um
þessi umferðarmál vera mjög lituð
af því að umferðin sé eitthvert stór-
kostlegt vandamál á Akureyri. Ég
er ekki sammála því. Það er við-
burður ef bílar þurfa að bíða ein ljós
á háannatíma. Því hljóta menn að
spyrja sig hversu mikla fjármuni og
land eigi að leggja í umferðarmann-
virki. Ég get að ekki séð að umferð-
in á Akureyri sé vandamál og verður
það ekki næstu árin. Vissulega er
umferðin mismikil eftir því hvaða
tími dags er og mest er hún í kring-
um kl. 8 á morgnana. Á öðrum tím-
um dags er þetta ekki nokkur vandi.
Miklu nær væri þá að skipuleggja
hlutina með tilliti til þess að dreifa
álaginu í umferðinni, heldur en að
byggja endalaust nýjar götur vítt og
breitt um bæinn fyrir hundruð millj-
óna króna.“
Kristján Þór Júlíusson bæjarstjóri
Umferðin í bænum
ekki vandamál
Eftir Kristján Kristjánsson
krkr@mbl.is
Um ljóð Jónasar | Atli Heimir
Sveinsson tónskáld flytur fyrirlestur
um ljóðskáldið Jónas Hallgrímsson á
Amtsbókasafninu á Akureyri á Degi
íslenskrar tungu, á morgun, 16. nóv-
ember kl. 17.15.
Ræðir hann m.a. um lög sem hann
hefur gert við ljóð Jónasar og gefur
dæmi um ljóð og lag. Menningar-
félagið Hraun í Öxnadal ehf. efnir til
fyrirlestrarins en það var stofnað
2003 og hefur keypt jörðina Hraun í
Öxnadal og hyggst á næsta ári opna
þar minningarstofur um skáldið,
náttúrufræðinginn, stjórnmálamann-
inn og teiknarann Jónas Hall-
grímsson. Einnig á að opna þar íbúð
fyrir skáld, listamenn og fræðimenn –
og leiðtoga í stjórnmálum og atvinnu-
lífi. Þá verður í landi Hrauns í Öxna-
dal opnaður fólkvangur – náttúrulegt
útivistarsvæði fyrir almenning.
  
Líftækni | Ragnar Aðalsteinsson
flytur fyrirlestur um réttarreglur á
réttarsviðum sem tengjast líftækni
og varpar fram spurningum um lög-
fræðileg og siðferðileg álitaefni á
þessu sviði. Hann verður í stofu
L203 á Sólborg og hefst kl. 12 í dag,
þriðjudag.
  
Fjárhagsaðstoð | Á fundi félags-
málaráðs var lagt fram yfirlit yfir
veitta fjárhagsaðstoð fyrstu 10 mán-
uði ársins. Veitt aðstoð nemur 38,8
milljónum króna, sem er 11,4%
hærri upphæð en á sama tíma í
fyrra. Á sama fundi var tekið fyrir
erindi frá starfskonum Aflsins, syst-
ursamtaka Stígamóta á Norðurlandi
þar sem sótt er um styrk til reksturs
systursamtakanna á Norðurlandi.
Félagsmálaráð samþykkti styrk
að upphæð 200.000 krónur. Einnig
var tekið fyrir erindi frá Stígamót-
um þar sem skorað er á bæjaryf-
irvöld að taka þátt í rekstri Stíga-
móta. Í bókun félagsmálaráðs
kemur fram að ráðið getur ekki orð-
ið við erindinu.
MJÖG góð aðsókn hefur verið að
skíðasvæðinu í Hlíðarfjalli en þar
hefur verið opið í þrjá daga að und-
anförnu. Fjöldi fólks, víðs vegar af
landinu, var þar á skíðum og snjó-
brettum í fallegu veðri sl. laug-
ardag en lokað var á sunnudag
vegna veðurs. Helgina áður var op-
ið báða dagana. Guðmundur Karl
Jónsson, forstöðumaður Skíðastaða,
sagði að skíða- og brettafólk hefði
tekið vel við sér að undanförnu
enda aðstæður í Hlíðarfjalli með
allra besta móti. Til stendur að hafa
opið í fjallinu á morgun, miðviku-
dag, á fimmtudag og föstudag frá
kl. 16–20 og um næstu helgi frá kl.
10–17. Guðmundur Karl sagðist
vonast til að geta opnað Stromp-
lyftuna í vikunni en fram að þessu
hefur stólalyftan Fjarkinn verið í
gangi, sem og toglyftan upp að
skíðahótelinu, sem aldrei var gang-
sett í fyrravetur vegna snjóleysis.
Skíðaskóli barna hefur tekið til
starfa í Hlíðarfjalli, fyrr en áætlað
var en að sögn Guðmundar Karls,
er það gert vegna mikillar eft-
irspurnar.
Frestuðu æfingaferð
til Noregs
Afrekshópur Skíðafélags Ak-
ureyrar, sem ætlaði í æfinga- og
keppnisferð til Geilo í Noregi, hefur
frestað ferð sinni, vegna snjóleysis
og hlýinda í Noregi. Þess í stað
mun hópurinn stunda æfingar í
Hlíðarfjalli, þar til hægt verður að
halda til Noregs.
Morgunblaðið/Kristján
Hlíðarfjall Mjög góð aðsókn hefur verið að skíðasvæðinu að undanförnu og
á laugardag var þar fjöldi fólks í sól og blíðu og yngstu börnin nutu hand-
leiðslu skíðakennara í Skíðaskólanum.
Margir á skíðum og
brettum í Hlíðarfjalli