Morgunblaðið - 15.12.2005, Blaðsíða 64
64 FIMMTUDAGUR 15. DESEMBER 2005 MORGUNBLAÐIÐ
Ástin lífgar
þig við.
Stattu á þínu og láttu það vaða.
KING KONG kl. 5 - 7 - 9 og 11 b.i. 12 ára
Harry Potter og eldbikarinn kl. 6 og 9 b.i. 10 ára
Ferðalag keisaramörgæsanna kl. 6
Green Street Hooligans kl. 8 og 10.15 b.i. 16 ára
Noel kl. 6 og 8
Lord of War kl. 10 b.i. 16 ára
Reese
Witherspoon
Mark
Ruffalo
FRÁ ÓSKARSVERÐLAUNALEIK-
STJÓRANUM PETER JACKSON
****
E.P.Ó.
****
kvikmyndir.com
RAPPSVEITIN Goldie Lookin Cha-
in kemur frá bænum Newport í Suð-
ur-Wales á Bretlandi. Óstaðfestar
frásagnir herma að upphaf sveit-
arinnar sé að finna í alltof miklum frí-
tíma ungra manna í Suður-Wales í
upphafi þessarar aldar, sem leituðu
leiða til að drepa tímann sem mynd-
aðist á milli þess sem bjórdósin klár-
aðist og þess að vefja eina jónu.
Húmorinn var frá fyrstu tíð mjög
stór hluti af tónlistinni og textar
sveitarinnar eru enn í dag fullir af
háði – og þegar þeim tekst best til –
háðsádeilu á þann ímyndaða heim
sem rapparar í Bandaríkjunum búa
sér til og miðla til ungra hvítra
krakka í Suður-Wales … og ef til vill
norðar á bóginn.
Goldie Lookin Chain (GLC) eða
The Chain eins og hún er kölluð í
daglegu tali, á að baki heilar átta
breiðskífur. Fyrstu sex skífurnar
voru að vísu framleiddar og gefnar út
af þeim sjálfum en eftir að þeir gerðu
samning við plötufyrirtækið East/
West hafa tvær stórar hljóðvers-
plötur komið út; The Greatest Hits,
sem inniheldur meðal annars lög á
borð við „Guns don’t Kill People,
Rappers Do“ og „Your Mother’s Got
a Penis“, og svo Safe As Fuck sem
kom út á þessu ári en sagan hermir
að borgarstjóri Newport hafi kallað
þá félaga á fund sinn þegar hann
heyrði af nafni þeirrar plötu.
Hljómsveitin telur hátt í þrjátíu
meðlimi þegar hún kemur fram í
Newport en í grunninn er hún skipuð
átta meðlimum: Duain Xain Zedong,
2Hats, Maggot, Billy Webb, Eggsy,
Mike Balls, Adam Hussein og þann
sem undirritaður ræddi við, Mysti-
kal.
2.000 ára drúídi
Umboðsmaður The Chain, Colin
Dodd, tilkynnti mér áður en ég
hringdi í Mystikal (og eftir að ég
hafði eytt rúmum tíu mínútum í að
kenna honum að bera nafnið mitt
fram sómasamlega, auk allskyns út-
úrdúra um hljómsveitina Husker Du
sem af eðlilegum ástæðum bar mikið
á góma) að hann væri 2.000 ára gam-
all drúídi. Án þess að vita hvernig ég
ætti að taka þessum upplýsingum
þakkaði ég fyrir mig og sló næst á
þráðinn til rapparans. Mér til mik-
illar skelfingar var það djúpróma
rödd sem svaraði mér með virktum á
hinni línunni og með fullkomnum
framburði sagði: „Höskuldur, ég var
að bíða eftir því að þú hringdir.“
Ég byrjaði á því að spyrja hann að
því hvað honum fyndist um það að
vera að koma til Íslands.
„Við getum varla beðið. Mér skilst
að við séum að spila á stað sem heitir
NASA. Ég er ekki viss hvort það sé
planið að senda okkur til tunglsins en
nafnið hljómar mjög vel.“
Eru margar rapphljómsveitir
starfandi í Wales þessa dagana?
„Nei, (hlæjandi) ekki svo margar.
Það hefur lengi verið mjög alvarleg
neðanjarðar hiphop-sena í og í
grennd við Cardiff en við fáum yf-
irleitt allt hingað til Wales sem verð-
ur vinsælt í London. Ég get samt
ekki sagt að það séu margar rapp-
sveitir sem komi frá Wales“
Hvað aðskilur ykkur frá öðrum
hiphop-hljómsveitum á Bretlandi?
„Ég held að það sé óþarfi að láta
staðar numið við Bretland vegna
þess að það eru svo fáar hiphop-
hljómsveitir í Bretlandi en ef ég ætti
að taka það til sem aðskilur okkur frá
öllum öðrum hljómsveitum sem ég
hef heyrt í, þá röppum við um það
sem hendir okkur í okkar daglega lífi
en ekki um það að keyra um í lágreið
með gyllta hjólkoppa og glingur um
hálsinn. Við gætum vel gert það eins
og aðrar sveitir hafa gert en við
myndum ekki hafa minnstu hugmynd
um hvað við værum að rappa.“
En á hvaða stigi kemur húmorinn
og háðið inn í textana?
„Ég held að fólk flokki okkur sem
grín-rappsveit vegna þess að það á í
erfiðleikum með að flokka okkur
öðruvísi en ef við fáum fólk til að
hlæja um leið og það hlustar á tónlist-
ina okkar er það bara plús. Mig grun-
ar samt að Newport hafi haft mikil
áhrif okkur og það sem við lendum í í
Newport sem er á köflum svo súr-
realískt að það er ekki hægt að með-
taka það án þess að snúa því upp í
grín.“
Charlotte Church
Ég hafði áður haft af því spurnir að
eitthvert mál hefði komið upp á milli
Goldie Lookin Chain og landa þeirra,
söngkonunnar Charlotte Church og
spyr Mystical út í það.
„Oooo Churchy,“ segir hann þá
eins og hann sé (á mjög dónalegan
hátt) að rifja upp kynnin af gamalli
kærustu. „Við hittum hana eftir allt
vesenið og ég held að stríðsöxin hafi
verið grafin. En þetta er mjög fyndin
saga. Þetta var á þeim tíma sem við
vorum enn að selja plöturnar okkar á
krám og í sjoppum Newport og einn
daginn hringir einhver blaðamaður
frá London – sem ætti í raun að vera
nóg til að fólk tryði ekki orði af þessu
öllu – og spyr: „Sælir strákar, hvað
eruð þið margir, hvað er að gerast,
hvernig tónlist er þetta?“ og þar fram
eftir götunum. Þú verður að skilja að
Englendingar líta á Wales sem pínu-
lítinn stað þar sem allir eiga að
þekkja alla svo að þegar við sögðum
blaðamanninum frá því að einn okkar
ætti kærustu sem væri nýorðin átján
og væri nýkomin með bílpróf, væri
samt atvinnusöngkona og gréti það
ekki að fá sér í tána; þá lagði hann
saman tvo og tvo og fékk út fimm-
tán.“
Ég skil.
„Hins vegar skal ég viðurkenna
það fyrir þér að um leið og við sáum
að þessi blaðamaður væri algjör
kjáni, þá ýttum við aðeins undir orð-
róminn. Blaðamenn hringdu í hrönn-
um og spurðu okkur út í þetta; „Svo
að Churchy er kærasta einhvers ykk-
ar? Þá svöruðum við yfirleitt mjög
loðið; „Kannski, það gæti verið, hvað
finnst þér?“ Svo fór þetta úr bönd-
unum.“
Hótaði fyrirtækið hennar ekki að
kæra ykkur?
„Nei, nei … eða ég man það ekki,
kannski. Þegar plötufyrirtækið henn-
ar hafði samband við okkur, buðumst
við til að sýna þeim póstinn sem fór á
milli okkar og blaðamannsins og þar
var hægt að sjá, á svörtu og hvítu, að
þessi blaðamaður spann þetta upp
frá rótum … með smá hjálp frá okk-
ur.“
En þið hafið sem sagt hitt hana síð-
an?
„Ó, já. Hún er mjög fín stelpa og
vildi að við hittum ömmu hennar og
afa.“
HA?
„Já, ég segi það satt. Þetta var í
janúar þegar Tsunami-tónleikarnir
voru haldnir. Við hittum hana bak-
sviðs og hún bauð okkur í húsbílinn
sinn og kynnti okkur fyrir ömmu
hennar og afa og svo var dottið í það.“
Stærsti smellurinn ykkar „Guns
Don’t Kill People, Rappers Do“, inni-
heldur mikið grín á kostnað banda-
rískra rappara, ekki satt?
„Þú gætir sagt að það væri á
kostnað þeirra. En svo gætirðu líka
sagt að þetta væri byggt á mjög vís-
indalegum athugunum á skaðsemi
rappara annars vegar og skotvopna
hins vegar. Ég held þegar öllu er á
botninn hvolft sé þetta spurning um
að snúa hlutunum á hvolf því að þessi
rapp- og tónlistarheimur er orðinn
svo skrumskældur að hinn venjulegi
tónlistaraðdáandi er fyrir löngu kom-
inn úr tengslum við innihald text-
anna.“
Heldurðu að fólk eigi eitthvað sam-
eiginlegt lengur með 50 Cent eða
Eminem?
„Nei, … að vísu er til fullt af við-
bjóðslega ríku fólki í heiminum sem
ætti að skilja hvað þeir eru að blaðra
um en við hin getum ekki með nokkr-
um hætti samsamað okkur við þá
með sama hætti. Sá dagur mun aldrei
rísa að ég eigi eftir að ganga niður að-
algötuna í Newport með gullfestar
um hálsinn og tíkur upp á báða arma
– að vísu hefur það gerst en þá var
það í myndbandi sem við gerðum og
ég þurfti að láta mér nægja platgull
og tíkur sem voru frekar við-
mótsillar.“
Eruð þið spilaðir mikið á bresku
útvarpsstöðvunum?
„Já, já. Nokkur laganna hafa náð
ágætum árangri á listunum en það er
mjög varasamt að taka mark á því ef
mið er tekið af öllu draslinu sem þar
er spilað. Það er samt fyndið, við vor-
um að tala um það um daginn að við
höfum oft heyrt lög sem komust ekki
jafnhátt og okkar lög sem voru samt
umsvifalaust notuð í sjónvarps-
auglýsingar fyrir hitt og þetta eða
heimildarþætti ýmiss konar. Ein-
hverra hluta vegna verða lögin okkar
ekki fyrir valinu, … ég furða mig á
því … “
Er það takmarkið?
„Það yrði viðbjóðslega fyndið, eða
hvað? Að vera að horfa á hálfleik í
fótbolta og svo myndi „Half-Man
Half-Machine“ allt í einu hljóma und-
ir þvottaefna-auglýsingu. Frábært.“
Verðið þið byrjaðir að túra þegar
þið komið hingað?
„Uuuuh, nei. Tónleikarnir á Íslandi
verða þeir fyrstu áður en við förum í
stórt hljómleikaferðalag um Stóra-
Bretland. Mér skilst að við fáum að
hanga á Íslandi í tvo, þrjá daga áður
en sá túr hefst.“
Hverju geta tónleikagestir átt von
á?
„Margir sem sjá okkur spila segja
að þá fyrst byrji lögin að smella sam-
an því að þau fjalla öll á einhverju
stigi málsins um að skemmta sér. En
það er mismunandi hvernig ólíkar
þjóðir upplifa tónleikana okkar. Þeir
sem skilja ekki textana hafa hingað
til hrósað okkur fyrir tónlistina eina,
sömplin og hljóðin og svo það að það
er mjög fyndið að sjá átta fábjána
hoppandi um sviðið, bölvandi eins og
þeir eigi lífið að leysa.“
Tónlist | Velska hiphop-sveitin Goldie Lookin Chain heimsækir Ísland í febrúar á næsta ári
Málpípur með-
almannsins
Hiphop-sveitin Goldie Lookin Chain er frá bænum Newport í Wales.
Goldie Lookin Chain leikur á NASA
föstudaginn 10. febrúar. Miðasala
hefst í dag kl. 10 og fer miðasala
fram í verslunum Skífunnar í
Reykjavík, verslunum BT á Ak-
ureyri og Selfossi, á Event.is og á
Miði.is. Miðaverð er 3.700 + mið-
agjald og aðeins 550 miðar eru í
boði.
Eftir Höskuld Ólafsson
hoskuldur@mbl.is