Fréttablaðið - 03.06.2004, Blaðsíða 47
FIMMTUDAGUR 3. júní 2004
■ TÓNLEIKAR■ TÓNLISTARHÁTÍÐ
35
Með tónlist í farangrinum
Tónlistarhátíðin „Við Djúpið“verður haldin í annað sinn á
Vestfjörðum í dag og fram yfir
helgi. Á dagskránni verða ýmis
tónlistarnámskeið fyrri hluta
dagsins en síðan verða tónleikar
síðdegis og á kvöldin alla dagana.
„Við reynum að fara sem víð-
ast, þótt við verðum mest í tónlist-
arskólanum á Ísafirði,“ segir Guð-
rún S. Birgisdóttir flautuleikari,
sem hefur skipulagt hátíðina.
Miðpunktur hátíðarinnar verður á
Ísafirði, en tónleikar verða í Bol-
ungarvík, Flateyri og víðar í sveit-
arfélaginu Ísafjarðarbæ.
Guðrún er komin vestur ásamt
fjórum öðrum valinkunnum tón-
listarmönnum, þeim Pétri
Jónassyni gítarleikara, Jóhönnu
Linnet söngkonu, Árna Heiðari
Karlssyni píanóleikara og Hall-
dóri Haraldssyni píanóleikara,
fyrrverandi skólastjóra Tónlistar-
skóla Reykjavíkur, sem jafnframt
verður gestur hátíðarinnar.
„Við erum öll höfuðborgarrott-
ur, en þetta er í annað skipti sem
við förum vestur. Nemendurnir
koma líka margir frá höfuðborg-
arsvæðinu, en svo bætast í hópinn
nemendur að vestan. Fyrirkomu-
lagið hjá okkur verður svipað og í
sumarskóla, sem tíðkast víða í út-
löndum, nema hér verðum við í
okkar íslensku náttúru.“
Eitt af markmiðum hátíðarinn-
ar er að auka samskipti og tengsl
milli listamanna á Vestfjörðum og
á höfuðborgarsvæðinu. Markmið-
ið er að þessi hátíð verði árviss
viðburður, og þá verði boðið þang-
að þekktum listamönnum, inn-
lendum sem erlendum.
„Tónleikadagskráin verður
býsna fjölbreytt hjá okkur. Við
byrjum á fimmtudag með
franskri tónlist fyrir flautu og pí-
anó. Á föstudaginn verða galatón-
leikar í Bolungarvík þar sem við
spilum öll saman. Á laugardeginn
verður Jóhanna Linnet með djass-
tónleika ásamt Árna Heimi og
Pétri, og svo ætlar Halldór að
slútta þessu á sunnudaginn með
einleikstónleikum á píanó þar sem
hann leikur Liszt og Schubert.“ ■
Geðveikir tónleikar fyrir geð-veikt fólk“ er yfirskrift á tón-
leikum á Gauknum í kvöld þar
sem fram koma hljómsveitirnar
Úlpa og Han Solo.
Úlpudrengirnir hafa verið á
tónleikaferðalagi erlendis mánuð-
um saman, bæði í Bandaríkjun-
um, Bretlandi og á Norðurlöndun-
um og víðar.
Þeir eru komnir heim til þess að
gera nýja plötu og láta sig hverfa
inn í stúdíóið eftir þessa tónleika á
Gauknum í kvöld, og koma svo
varla út úr skápnum aftur fyrr en
að upptökum loknum seinna í sum-
ar. En þá fara þeir líka á fulla
keyrslu með tónleikahald.
„Fyrsta platan þeirra, Mea
culpa, seldist fljótt upp svo marg-
ir eru að bíða eftir þessari nýju
plötu, sem verður svolítið öðru-
vísi en sú fyrsta,“ segir Gustavo
Blanco, góðvinur þeirra Úlpufé-
laga sem skipulagt hefur tónleik-
ana í kvöld.
„Úlpa hefur verið að spila á
Geðhjálpartónleikum, sem eru
haldnir alltaf einu sinni á ári. Í
ljósi ýmissa atburða nýverið
fannst okkur kominn tími til að
minna á það fólk sem lifir með
geðsjúkdóma og aðstandendur
þeirra. Með því að koma á þessa
tónleika er fólk um leið að styrkja
Geðhjálp.“ ■
Úlpa fyrir geðveika
ÚLPA
Hljómsveitin Úlpa kemur fram ásamt Han Solo á tónleikum til styrktar geðveikum á
Gauknum í kvöld.
Á LEIÐINNI VESTUR
Guðrún S. Birgisdóttir flautuleikari, Jóhanna Linnet söngkona, Halldór Haraldsson píanóleikari, Árni Heiðar Karlsson píanóleikari og Pétur
Jónasson gítarleikari verða með námskeið og tónleika á tónlistarhátíðinni Við Djúpið, sem nú er haldin í annað sinn.