Fréttablaðið - 23.02.2007, Blaðsíða 42

fréttablaðið farið á fjöll 23. FEBRÚAR 2007 FÖSTUDAGUR4
Sala á sumarferðum hefur farið
vel af stað hjá Heimsferðum að
sögn Tómasar J. Gestssonar fram-
kvæmdastjóra. Gríska eyjan
Ródos kemur ný inn í ár og hefur
fólk strax tekið við sér.
„Ródos hefur vinninginn í ár og
hefur slegið í gegn. Síðan fylgja
Fuerteventura, Mallorca, Costa
del Sol og Montreal fast á eftir
hvað varðar vinsældir,“ segir
Tómas.
Ferðir til Montreal í Kanada
eru nýjar af nálinni en hægt verð-
ur að fara þangað á vegum Heims-
ferða frá maí og fram í september.
„Þetta er nýjung á íslenskum
markaði og verða ýmsir möguleik-
ar í boði fyrir ferðalangana.
Hægt verður að eyða hluta af
dvölinni í Mont Tremblant sem er
sumarleyfisstaður með vatni og
strönd. Þar er mikið af alls kyns
sporti svo sem golfi og nóg að gera
fyrir fjölskylduna. Þá eru sumir
að fara í sérferðir svo sem til
Niagara-fossanna, Quebec eða
Ottawa en síðan eru auðvitað
margir sem vilja bara eyða tíma
sínum í Montreal,“ segir Tómas
sem kveðst ekki geta kvartað enda
séu flestir áfangastaðir að vaxa í
vinsældum.
Ródos hefur vinninginn
Heimsferðir fara af stað með ferðir til grísku eyjunnar Rodos.
Mont Tremblant í Montreal er sumar-
leyfisstaður með vatni og strönd.
Sigrún Kristjánsdóttir hefur
mikinn áhuga á útivist og
hefur tvívegis farið í hjólreiða-
ferðir á vegum Bændaferða.
Annars vegar hjólaði hún frá
Austurríki til Slóveníu og hins
vegar frá Austurríki til Ítalíu.
„Ég fór í hjólaferðina til Austurrík-
is og Slóveníu í júní 2005,“ segir
Sigrún og bætir því við að í raun sé
það sambýlismanni hennar, Pálma
Bjarnasyni, að þakka að þau drifu
sig í ferðirnar.
„Við fórum með rútu frá
München til bæjarins St. Michael í
Austurríki og þar byrjaði hin eigin-
lega hjólaferð. St. Michael er lítill
bær uppi í fjöllum og stendur við
ánna Mur.“
Sigrún segir leiðina hafa legið í
gegnum þröngan dal og síðan yfir
sléttur, austan megin við Alpana,
en ferðin var samtals rúmlega 450
km. „Þessi ferðamáti er allt öðru-
vísi en að ferðast á bíl eða rútu.
Þarna er maður úti og skynjar
umhverfið miklu betur og fær mun
meira út úr slíkum ferðum,“ segir
Sigrún og heldur áfram. „Þú heyrir
allt, finnur mismunandi lykt og
fleira, auk þess sem það hreinsar
hugann að sitja á hjólinu og horfa í
kringum sig á fallegt umhverfi.“
Sigrún segist stöðugt hafa séð
eitthvað alveg nýtt sem hún hafi
ekki séð áður. „Það var svo gaman
að vera í sveitinni á sveitahótelun-
um. Þar heyrir maður í kúnum með
kúabjöllurnar og borðaði góðan
mat og fyrir mér var þetta frábær
og yndisleg upplifun.“
Spurð hvort ferðin hafi verið
erfið segir Sigrún: „Þessi ferð var
ekkert sérstaklega erfið þótt hún
hafi aðeins verið það fyrir mig. Ég
hafði svo lítið hjólað fyrir ferðina,
þó að hópurinn hafi hjólað saman
einu sinni í viku hér heima frá því
um vorið.“
Sigrún segir það hafa breytt
miklu að vera búin að hitta og
kynnast ferðafélögunum fyrirfram
en ekki bara þegar í ferðina var
komið. „Það er allt of oft sem
maður er rétt að byrja að kynnast
fólkinu þegar ferðalaginu er að
ljúka,“ segir hún en hópurinn hélt
áfram að hittast og hjóla fram á
haustið.
Á síðasta ári fór Sigrún í aðra
hjólaferð en þá frá Austurríki til
Ítalíu. „Við flugum til Mílanó og
þaðan var okkur ekið til Landeck í
Austurríki. Þar byrjaði hjólaferðin
meðfram ánni Inn og yfir skarð
sem heitir Reschen, til Ítalíu,”
segir Sigrún. „Þar tók við áin Etsc,
sem við hjóluðum niður með að
endanum á Gardavatninu. Við
fórum með báti yfir vatnið og hjól-
uðum frá bænum Garda til Fen-
eyja en þar endaði ferðin.“
Sigrún segir að þótt þessi ferð
hafi líka tekið sjö daga þá hafi hún
verið erfiðari en sú fyrri. „Við hjól-
uðum 550 km í þessari ferð og yfir
meira og erfiðara landslag. Annars
gekk ferðin alveg eins og smurð
vél en það sem mér fannst svo
skemmtilegt var að fararstjórinn
okkar hafði aldrei hjólað þessar
leiðir áður. Þess vegna voru þetta
dálítið eins og óvissuferðir, þótt
hann hafi auðvitað legið yfir kort-
um og bókum fyrir ferðirnar,“
segir Sigrún hlæjandi og bætir við:
„Það var eitthvað lítið til af bókum
um leiðina frá Gardavatninu til
Feneyja en það var bara gaman að
villast aðeins af leið. Við bara sner-
um við aftur og lentum aldrei á
eftir áætlun að ráði. Það var
skemmtilegt að velta því fyrir sér
hvort og hvenær við kæmumst nú
á leiðarenda og hvort allt gengi
upp.“
Sigrún segist vona að hún kom-
ist í fleiri svona ferðir enda sé
boðið upp á skemmtilegar nýjar
ferðir í ár. „Þetta er skemmtilegur
ferðamáti fyrir fólk sem hefur
gaman af að vera úti og upplifa
náttúruna. Svo er náttúrlega gaman
að lenda í góðum félagsskap en
báðir hóparnir voru mjög vel sam-
stilltir og skemmtilegir. Það er
gríðarlega mikilvægt að hafa góða
ferðafélaga og skiptir jafnvel öllu
máli,“ segir Sigrún.
sigridurh@frettabladid.is
Frábær ferðamáti
Smá hvíld á leiðinni frá Auer til Troble
við Gardavatn. Erla Magnúsdóttir, Egg-
ert Vigfússon og Hulda Vilhjálmsdóttir
kasta mæðinni. MYND/SIGRÚN KRISTJÁNSDÓTTIR
Sigrún Kristjánsdóttir er hér til hægri á myndinni en við hlið hennar stendur einn af
ferðafélögunum, Ólafía Magnúsdóttir. MYND/PÁLMI BJARNASON
MasterCard
Mundu
ferðaávísunina!