Fréttablaðið - 07.09.2007, Page 38

7. SEPTEMBER 2007 FÖSTUDAGUR2 fréttablaðið heilsa & hreyfing
Akureyringurinn Örn Haraldsson, 17 ára, á sér
allsérstakt áhugamál, jafnvel hættulegt myndu
sumir segja. Þegar hann er ekki í skólanum
prílar hann upp byggingar, hoppar yfir
girðingar og tekur heljarstökk á milli húsþaka.
„Franski herinn fann upp á þessari tækni, sem þótti á
sínum tíma góð aðferð til að flýta sér á milli staða,“
útskýrir eldhuginn Örn og bætir við að hún sé líka
notuð til að flýja og handsama glæpamenn.
Tæknin sem Örn talar um flokkast undir jaðar-
íþróttir og gengur undir ýmsum heitum úti í heimi,
svo sem parkour eða free running, þótt um eina og
sama hlutinn sé að ræða. Hún gengur meðal annars út
á að hlaupa upp veggi og yfir girðingar, hoppa á milli
bygginga og lenda án þess að verða fyrir hnjaski.
Almennt var lítið vitað um þessa íþrótt þar til leik-
stjórar frönsku kvikmyndarinnar Yamakasi – Les sam-
ouraïs des temps modernes (2001) drógu hana fram
í dagsljósið, en þar sjást iðkendur hennar sýna listir
sínar.
Hún hefur ekki átt marga fylgismenn hérlendis þótt
þeim hafi fjölgað á síðustu árum og ekki langt síðan
Örn og vinur hans, Oddur Páll Reyes Laxdal, fóru að
stunda hana. Fífldirfska þeirra vakti reyndar í fyrstu
hörð viðbrögð á Akureyri þar sem óttast var að yngri
og óreyndari aðilar tækju að apa eftir þeim.
Örn tekur fram að það hafi þó alls ekki verið ætlunin
og til marks um það birtu þeir tilkynningu á heimasíðu
sinni, www.blog.central.is/favorite-jump, þar sem varað
var við að menn og sérstaklega börn færu að príla án
þess að vera vel undirbúin. Sjálfur segist Örn hafa æft
fimleika og man ekki eftir sér öðruvísi en spriklandi.
Foreldrarnir séu búnir að sætta sig við áhugamálið,
þótt þeim hafi ekki verið gefið um það í upphafi.
En mætti ekki frekar líta á íþróttina sem heilsu-
spillandi heldur en heilsusamlega? „Alls ekki,“ svarar
Örn. „Ég hef aldrei slasast. Oddur slasaðist reyndar
einu sinni, en þá var hann að sýna hvernig fram-
kvæma ætti bragð. Hann handleggs- og nefbrotnaði.“
Sem sannar hversu nauðsynlegt er að ana ekki út í
óvissuna.
Félagarnir hafa stundað iðju sína um nokkurt skeið
fyrir norðan og Örn viðurkennir að þeir séu farnir að
horfa annað til að þróa kunnáttuna. Stefnan er sett á
Reykjavík þar sem til stendur að leigja íþróttasal og svo
er draumurinn að fara til Frakklands. Eftirvæntingin
leynir sér ekki í þeim töluðu orðum. roald@frettabladid.is
Málin geta endað með ósköpum ef ekki er farið varlega og það
þarf að undirbúa sig vel. Örn segir alls ekki til þess mælst að
börn api eftir sér.
Lýsingar Arnars eru á köflum ótrúlegar en myndirnar tala sínu máli eins og hér sést þar sem Örn tekur kollhnís aftur fyrir sig og
lendir á öðru þaki.
Fer á heljarstökki
milli húsþaka
Staðið á höndum. Hér kemur kunnátta Arnar úr fimleikum að
góðum notum.
Parkour eða free running eru mismunandi heiti á jaðaríþrótt
sem nýtur mikilla vinsælda úti í heimi og gengur meðal annars
út á hopp milli húsþaka.
HÆTT AÐ REYKJA Á NETINU Gagnvirka heimasíðan
reyklaus.is var opnuð formlega á dögunum af heilbrigðisráðherra,
Guðlaugi Þór Þórðarsyni. Heimasíðan er ný leið sem þeir geta nýtt
sem vilja hætta að reykja en öll aðstoð á síðunni er ókeypis.
Á síðunni eru upp-
lýsingar um leiðir til að
hætta að reykja og gefin
tækifæri til að taka ýmis
próf. Einnig er hægt að
skrá sig á síðuna og fá
þá sendan einstaklings-
miðaðan stuðning í
tölvupósti, aðgang að
dagbók, gestabók og
umræðuvettvang þar
sem fólk getur deilt
reynslu sinni og fengið
stuðning frá öðrum sem
eru í sömu aðstæðum.
Göngum saman-hópurinn stendur fyrir göngu á sunnudaginn
til styrktar rannsóknum á brjóstakrabbameini. Gangan hefst
klukkan 10.30 við Nesstofu á Seltjarnarnesi og genginn verður
lítill hringur um nesið.
Göngugjald er tvö þúsund krónur fyrir fullorðna en frítt er
fyrir börn. Eftir gönguna verður boðið upp á heita súpu og brauð
og óskað er eftir því að þátttaka sé tilkynnt á gongumsaman@
gongumsaman.is. - eö
Styrktarganga um
Seltjarnarnesið
Gangan hefst
klukkan 10.30
við Nesstofu.