Fréttablaðið - 08.03.2008, Page 54

8. MARS 2008 LAUGARDAGUR12 ● fréttablaðið ● ferðaklúbburinn 4x4 25 ára
Samantekt: Sveinbjörn
Halldórsson og Ólafur Ólafsson.
Á aðalfundi 1985 kom sú hugmynd
að halda sýningu á vegum
Ferðaklúbbsins 4x4. Ákveðið var
að halda hana 19 maí 1985 í porti
Austurbæjarskólans. Á sýninguna
fengust um það bil 40 bílar af
ýmsum stærðum og gerðum. Hún
stóð frá klukkan 10 til 20 og var
aðsókn mjög góð, um það bil 1.700
gestir komu. Ekki var annað að
heyra en þeir væru ánægðir með
þetta framtak, og þótti sýningin
takast vel í alla staði.
Í ágústmánuði 1987 var farið
að líta á Reiðhöllina í Víðidal sem
líklegt húsnæði fyrir bílasýningu.
Sýningartíminn var ákveðinn
dagana 16. til 18. október. Mikinn
undirbúning þurfti til að svona
sýning gæti heppnast vel. Þurfti
meðal annars að þrífa höllina,
slétta gólf í sal og leggja gólfplötur
yfir. Milli 40 og 50 bílar frá
félagsmönnum og auk þess sýndu
16 fyrirtæki vörur sínar. Um það bil
4.000 manns greiddu aðgangseyri,
en frítt var inn fyrir yngri en 12
ára. Ekki var annað að heyra á
gestum en að vel hefði tekist til.
Fyrripart vetrar 1988 til ´89 var
byrjað að ræða um hvort tímabært
væri að halda sýningu á bílum
félagsmanna. Tvær sýningar höfðu
áður verið haldnar og verið mikill
áhugi fyrir þeim. Samningar náðust
við eigendur Reiðhallarinnar í
Víðidal um sýningu Ferðaklúbbsins
4x4 helgina 13. til 15. október
1989. Aðkoma að Reiðhöllinni var
skelfileg. Húsinu hafði verið lokað
að aflokinni dýrasýningu, án þess
að tekið væri til. Hliðarsalur var
þakinn af hrossataði og fleira í
þeim dúr. Eina leiðin til hreinsunar
var að nota brunaslöngur hússins
og smúla það. Mikil vinna var
lögð í gólfið og voru meðal annars
fengin 40 tonn af sandi til að
slétta undir plöturnar. Sýningin
sjálf fékk mjög góða dóma. Yfir
5.500 miðar seldust og einnig voru
nýttir 200 boðsmiðar. Voru 47 bílar
félagsmanna á sýningunni.
Sýningarnefnd Ferðaklúbbsins
4x4 hóf störf fyrir alvöru
fyrripart sumars 1991. Reiðhöllin
þótti sem fyrr besti kosturinn
sem sýningarsvæði. Samningar
tókust við forsvarsmenn hennar.
Þetta ár var ákveðið að stækka
sýninguna og tók Ferðaklúbburinn
4x4 sýningartjald á leigu hjá
Kolaportinu til að staðsetja
fyrir utan Reiðhöllina. Áhugi
fyrirtækja á sýningarsvæði var
með ólíkindum. Laugardaginn 5.
október 1991 hófst starf af fullum
krafti í Reiðhöllinni.
Á föstudegi 11. október 1991
klukkan 17 opnaði Markús Örn
Antonsson þáverandi borgarstjóri
sýninguna með viðhöfn. Hún
stóð frá föstudeginum 11. til
sunnudagsins 13. október og var
sýningin vegleg í alla staði og
klúbbnum til mikils sóma. Fjöldi
sýningargesta var heldur fleiri en
á síðustu sýningu eða 6.147 manns
sem greiddu sig inn, allt að 55 bílar
félagsmanna voru sýndir.
Árið 1993 var ákveðið að standa
enn einu sinni að jeppasýningu.
Nafn sýningarinnar var ákveðið
Ferðabílar og fagurt land.
Samningar tókust við forsvarsmenn
Laugardalshallarinnar um af-
not á húsinu helgina 23. til 26.
september. Reynt var að fá leigð
sýningartjöld sem notuð voru á
sjávarútvegssýningunni ern það
gekk ekki eftir, var því ákveðið
að loka af útisvæði fyrir framan
Laugardalshöllina og nýta það fyrir
sýninguna, ekið var möl og grjóti
á svæðið og útbúið skemmtilegt
umhverfi og bílum stillt þar upp
á skemmtilegan hátt. Veður var
þokkalegt á föstudeginum, en á
laugardeginum, sem var áætlaður
aðalaðsóknardagurinn rigndi eins
og hellt væri úr fötu og dró það
verulega úr aðsókninni. Tóku 37
fyrirtæki þátt í sýningunni ásamt
40 bílum félagsmanna á innisvæði
og 25 bílar á útisvæði. Fjöldi gesta
var um 10.000 .
Ferðaklúbburinn 4x4 hélt enn
eina jeppasýninguna haustið 1995.
Henni var eins og síðast valinn
staður í Laugardalshöllinni. Sú
nýjung var á þessari sýningu að
valin var bílavalsnefnd sem leitaði
upp bíla á sýninguna. Nýtt nafn
var valið á sýninguna: Ferða og
útivistarsýning fjölskyldunnar.
Nefndir í Ferðaklúbbnum tóku
meiri þátt í sýningunni og kynntu
starfsemina. Meðal annars setti
Hjálparsveit Ferðaklúbbsins
mikinn svip á sýninguna. Félagar
í henni stilltu upp stórri mynd af
Hvannadalshnjúk á vegg. Þar fyrir
neðan vöfðu þeir bíl í hvítan dúk
líkt því að hann væri á kafi í snjó.
Við hliðina stilltu þeir upp öðrum
bílum og útbúnaði þeim sem þeir
nota í ferðum sínum. Þá sýndi
Umhverfisnefndin hvað félagið
var að gera í „grænum málum“. Í
kjallara hallarinnar var stillt upp
myndum frá ýmsum aldurskeiðum
jeppamennskunnar og auk þess var
kynning á klúbbnum. Stórt útisvæði
var nýtt undir sýningarbíla þar
sem Laugardalshöllin var þegar
orðin of lítil. Tóku 43 fyrirtæki
þátt í sýningunni, auk þess sem 30
bílar félagsmanna voru sýndir og
aðrir 30 bílar félagsmanna voru á
útisvæði. Sóttu 15 þúsund gestir
sýninguna.
„Dagana 25. til 27. september
1998 mun Ferðaklúbburinn 4x4
halda mjög viðamikilli sýningu á
jeppum og búnaði til ferðalaga og
útiveru í Laugardalshöllinni undir
heitinu „Ferða- og útivistarsýning
Fjölskyldunnar.“.“ Þannig
hljóðaði bréf sem sent var til
fyrirtækja sumarið 1998 þar sem
þeim var kynnt sjötta sýning
Ferðaklúbbsins 4x4. Þar var einnig
minnst á það sem klúbburinn
lagði mikla áheyrslu á, það er
bílana, og var þeim lýst á þennan
máta: „Enginn þarf að efast um
það að margvíslegt augnakonfekt
verður á þessari sýningu sem
fyrri sýningum Ferðaklúbbsins
4x4. Reynt verður að hafa sem
fjölbreyttasta jeppaflóru til sýnis.
Allt frá lítið sem miðlungs breyttum
fjölskyldubílum og upp í bíla sem
verkfræðingar bílaverksmiðjanna
myndu varla kannast við að eiga
nokkurn þátt í að hafa hannað.
Eins og flestum er kunnugt eru
verksmiðjuframleiddir bílar aðeins
„hráefni til iðnaðar“ í augum sannra
íslenskra jeppamanna. Þeir allra
hörðustu í bransanum láta alls ekki
sjá sig á óbreyttum bíl í umferðinni
heldur aka nýjum bíl í skjóli
myrkurs inn í bílskúr þar sem hann
er rifinn í spað og endurbættur á
hinn margvíslegasta hátt. Síðan er
raðað á mælaborðið öllum tækjum
og tólum sem nauðsynleg eru til
staðsetningar og fjarskipta þannig
að varla er pláss fyrir óþarfa hluti
eins og stýri og þess háttar.“
Mikið var lagt upp úr að kynna
félagið og var allur kjallari og
anddyri undirlagt af klúbbnum.
Í kjallaranum var mikið safn
ljósmynda frá fyrri tíð og farið
var yfir feril jeppans á Íslandi,
einnig var settur upp vísir að
skála og var þar haldin heljarinnar
skemmtun á laugardeginum að
hætti fjallamanna. Var þetta
nýmæli sem mæltist vel fyrir og
var kjallarinn alltaf þéttskipaður
af sýningargestum. Á sýningunni
var 31 fyrirtæki og 31 bíl
félagsmanna inni og á útisvæði
voru hátt í 30 bílar félagsmanna.
Sýningin var nokkuð vel sótt var
áætlað að um 10.000 gestir hefðu
sótt hana.
Sjöunda sýning Ferðaklúbbsins
4x4 var haldin í Laugardalshöllinni
eins og fyrri sýningar. Sýningin
var haldin 5. til 7. október 2001.
Var hún vegleg eins og vanalega.
Þessi sýning var frábrugðin
öðrum sýningum félagsins og var
reynt að hafa hana opna og að
höfða meira inn á fjölskyldufólk
en áður. Áhersla var lögð á svæði
þar sem fólk og börn gátu brugðið
á leik og lært um leið. Einnig
voru haldnar ráðstefnur sem
voru vel sóttar og vöktu athygli.
Ferðaklúbburinn var að með
öfluga kynningu á sýningunni.
Fjöldi sýningarbíla var 30.
Sýningin var stór og var fjöldi
sýningargesta 6.000.
Ekki er sýningarstarfi
Ferðaklúbbsins 4x4 lokið og er
ætlun klúbbsins á 25 ára afmæli
sínu að halda eina veglegustu
sýningu sem um getur af
sérbúnum fjallajeppum. Ákveðið
hefur verið að sýningin verði
haldin í september 2008 í Fífunni í
Kópavogi, sem er 9.600 fermetrar
að stærð auk útisvæðis og fleira.
Ferðaklúbburinn 4x4 er með
þessu að standa að einni stærstu
sýningu sérútbúinna bíla sem
haldin hefur verið. Mun mikið
verða lagt í hana og verður öllum
bílaumboðum og fyrirtækjum
tengdum ferða- og fjallamennsku
boðin þátttaka. Ferðaklúbburinn
mun leggja mikið kapp á að kynna
25 ára sögu Ferðaklúbbsins 4x4,
auk sögunnar af ferðamennsku
Íslendinga í gegnum tíðina og
jeppaferðum almennt. Áætlaður
fjöldi sýningarbíla er um 300
bæði bílar félagsmanna auk bíla
frá bílaumboðunum. Mikil vinna
er framundan til að sýningin
verði að veruleika en félagsmenn
ferðaklúbbsins hafa sýnt það að
svona sýningar er hægt að halda
hér á Íslandi
Sýningar Ferðaklúbbsins 4x4 frá 1985 til 2008
Ferðaklúbburinn 4X4 hefur haft veg og vanda af því að skipuleggja fjölda bílasýninga í gegnum árin.