Fréttablaðið - 12.04.2008, Blaðsíða 50
12. APRÍL 2008 LAUGARDAGUR8 ● fréttablaðið ● börn
Börn og unglingar geta hitað
upp fyrir heita sumardaga
í Kramhúsinu um þessar
mundir, þar sem nú eru að
hefjast vornámskeið og margt
spennandi í boði.
Kramhúsið er þekkt fyrir að
fara nýjar slóðir og verður þar
engin breyting á að þessu sinni.
Krump og hiphop er ein tegund
af nýjum dansi sem kenndur er
í Kramhúsinu, þar sem þátttak-
endur fá útrás fyrir reiði, leiða,
gremju og stress. Sandra Er-
lingsdóttir kennari lærði krump
í New York og segir hann götu-
dans sem átti upptök sín hjá
krökkum í fátækari hverfum
Los Angeles. Dansinn notuðu
þau til að fá útrás fyrir reiði
sem áður leiddi til slagsmála eða
eiturlyfjanotkunar.
„Krakkarnir í Kramhúsinu
skemmta sér vel í krumpinu,“
segir Sandra, sem byrjaði sjálf
að dansa þegar hún var aðeins
fimma ára. „Ég blanda saman
krumpi og hip hop hjá yngstu
krökkunum en eldri hóparnir
taka krumpinu á annan hátt og
fá meiri útrás. Það er svo gott
að hitna og svitna til að brjótast
út úr amstrinu og stressinu sem
hver og einn dílar við. Dansinn
er góð leið til að ná jafnvægi til
móts við annað áreiti í lífinu,“
segir hún rólega.
Af öðrum nýjum námskeið-
um má nefna afródans fyrir sjö
til tíu ára börn, en hópar geta
einnig bókað fjölskyldudaga og
allir dansað saman, bæði börn
og fullorðnir. „Í afró kynnast
börnin afrískri tónlist og rytma,
læra afríska söngva, þýðingu
þeirra og létta dansa. Taktur
er stór þáttur í námskeiðinu og
eins að leyfa börnunum að kynn-
ast þessari tegund tónlistar og fá
tilfinningu fyrir menningunni,“
útskýrir Þórunn Óskarsdóttir,
verkefnastýra hjá Kramhúsinu.
Að sögn Bryndísar Jónsdótt-
ur, hjá Kramhúsinu, líkar börn-
um einnig vel að geta prófað
aðrar tómstundir en þær sem
krefjast stöðugrar ástundunar
og keppni. „Hjá Kramhúsinu er
megináhersla lögð á leikgleði,
spuna og frelsi,“ segir Bryndís
brosandi. „Á dögunum voru tveir
leiklistarhópar að klára og settu
upp frábæra sýningu þar sem
þeir fjölluðu um ástina út frá
Rómeó og Júlíu. Framhaldshóp-
ur verður nú á vordögum og þar
kenna þrár frábærar leikkonur,
þær Harpa Arnardóttir, Álfheið-
ur Árnadóttir og Magnea Valdi-
marsdóttir. Þær sjá um að spinna
með krökkunum og líklega fá
borgarbúar að sjá afraksturinn
þegar sól hækkar á lofti.“
Þórunn bætir við að í júní hefj-
ist sumarskóli Kramhússins þar
sem börnum á aldrinum sjö til
tólf ára gefst kostur á fimm daga
námskeiði í leiklist og spuna, hip
hop og afródansi, myndlist og
jóga auk þess sem skyggnst er
í sirkusheiminn. „Hvert nám-
skeið endar með lítilli sýningu
þar sem foreldrum gefst kost-
ur á að sjá afrakstur vikunn-
ar. Á námskeiðinu verður lögð
áhersla á að virkja leikgleði og
sköpunarkraft og er markmiðið
að þroska persónuleika einstakl-
ingsins, samskiptahæfileika
og auka sjálfsöryggi.“ Reynd-
ir kennarar standa að námskeið-
inu en í Kramhúsinu hefur verið
starfrækt listasmiðja barna og
unglinga síðastliðin 25 ár. - vaj
Ráðstefnan Rödd barnsins verður
haldin í Borgarleikhúsinu 18. apríl. Þar
verður fjallað um leiðir til að hlusta á
raddir leikskólabarna og gefa sjónar-
miðum þeirra aukið vægi.
Ráðstefnan Rödd barnsins verður hald-
in í Borgarleikhúsinu 18. apríl. Þar verð-
ur fjallað um leiðir til að hlusta á raddir
leikskólabarna og hvernig tryggja megi
að þau hafi áhrif á viðfangsefni sín og um-
hverfi. Eins og segir í tilkynningu frá Leik-
skólasviði Reykjavíkurborgar, sem ásamt
RannUng stendur að ráðstefnunni, er við-
fangsefnið nýstárlegt og mikilvægt, og
fjallað er um hvernig megi tryggja vellíð-
an og gefandi námsumhverfi fyrir börnin
á þeirra forsendum.
Einn fyrirlesara er Kristín Dýrfjörð,
lektor við Háskólann á Akureyri. Fyrir-
lestur hennar kallast „Hvert barn er sinn
eigin kór“ og fjallar um aðferðir til að gefa
röddum barna vægi í leikskólastarfinu.
Heiti fyrirlestrarins er vísun Kristínar í
frægan uppeldisfræðing og heimspeking,
Loris Malaguzzi að nafni, sem lét eitt sinn
hafa eftir sér að hvert barn kynni hundrað
mál en frá því væru tekin níutíu og níu.
„Það eru ótal aðferðir til að gefa röddum
barna vægi,“ segir Kristín. „Það má ekki
gleyma því að raddir barna eru ekki bara
þessi rödd sem kemur úr kokinu, heldur
eru raddirnar miklu fleiri. Barn sem lyftir
höndum til starfsmanns er að tjá sig með
líkamanum. Barn sem leikur sér er dæmi
um rödd. Sömuleiðis þegar það syngur eða
teiknar. Að gefa röddum barna vægi og
hlusta er ekki bara að eiga í samræðum
heldur að veita þeim eftirtekt á miklu fjöl-
breyttari og nærfærnari hátt.”
Frá því að fyrsta uppeldisáætlunin um
leikskóla á Íslandi kom fram árið 1985
hefur verið inni í uppeldisáætluninni
ákvæði um barnafundi þar sem börn fá
að taka ákvarðanir um ákveðin mál, ræða
reglur og annað slíkt að sögn Kristínar.
Hún segir það samt sem áður ekki þýða
að börnin fái þá að ráða öllu. „Sumir telja
þetta þýða að börnin séu brúðumeistarar
leikskólakennara og þeir strengjabrúður
barnanna. En við fylgjum okkar markmið-
um í gegn, en tökum inn sjónarmið barna
með því að hlusta á þau,“ segir Kristín.
„Á einum leikskóla í Reykjavík er búið
að hanna spil þar sem þátttakendur eiga
á ákveðnum tímapunkti að segja hvað sé
skemmtilegt, erfitt, leiðinlegt eða áhuga-
vert í skólanum. Þannig er spilið notað
til að komast að því hverju börnin hafa
áhuga á. Næsta skref væri að kennararn-
ir spyrðu sjálfa sig hvers vegna eitthvað
er skemmtilegt eða leiðinlegt,“ bendir
Kristín á.
„Varðandi lýðræðislegt val í leikskólum
þá er mikilvægt að það standi um eitthvað
sem skiptir máli,“ heldur hún áfram. „Það
er til dæmis algengt að leikskólakennar-
arnir velji hvaða myndir eftir börnin for-
eldrar fá að sjá en það á að gera í samstarfi
við barnið, því myndin er stolt þess.“
Um þetta og fleira mun Kristín fjalla
í Borgarleikhúsinu 18. apríl. Aðrir fyrir-
lesarar eru Sue Dockett sem fjallar um
þátttöku ungra barna í rannsóknum, Anne
Trine Kjörholt sem flytur fyrirlesturinn
Beyond Listening, Jóhanna Einarsdóttir
sem ræðir ólíka sýn á börn og hvernig sú
sýn hefur áhrif á barnarannsóknir og loks
Anna Magnea Hreinsdóttir sem flytur fyr-
irlesturinn „Út af því að fjögurra ára stelp-
ur eru í leikskóla“. - nrg
Álfheiður Anna Pétursdóttir og Sandra Erlingsdóttir kenna hip hop, krump og afró hjá Kramhúsinu, þar sem börn og ungmenni
geta ýmist lært að tileinka sér rytma, sungið eða fengið útrás fyrir reiði og streitu. FRÉTTABLAÐIÐ/ARNÞÓR
Leikgleði,
spuni og frelsi
Kristín Dýrfjörð, lektor við Háskólann á Akureyri, fjallar um aðferðir til að gefa röddum barna vægi í leik-
skólastarfi. FRÉTTABLAÐIÐ/STEFÁN
Hvert barn hefur hundrað mál